Pagduyog sa Pagmaya sa Ika-82 nga Klase sa Gilead

“KITA dili mga Kristohanon kon maayo lamang ang panahon. Kita malipayon gayod nga maania dinhi.” Pinaagi nianang mga pulonga gibuksan sa tsirman ang espesyal tibuok-adlawng tigom sa Jersey City Assembly Hall of Jehovah’s Witnesses sa Dominggo, ang unang adlaw sa Marso. Sa gawas, kusog ang ulan niadto. Sa sulod, kadto ang adlaw sa graduwasyon alang sa 24 ka estudyante sa ika-82 nga klase sa Gilead. Sa paglantaw sa malipayong mga nawong sa mga estudyante, si Theodore Jaracz sa Nagamandong Lawas nagpadayon sa pagsulti: “Dayag nga sila ikag ug mangayaon mahitungod sa ilang mga palaaboton. Sanglit ang Bibliya nagaingong ‘pagmaya uban sa mga tawong nagamaya,’ natino ko nga kitang tanan samag pagbati!” Ang pakpak nga misugat sa maong pahayag nagpamatuod nga miuyon ang tanang 4,557 nga mitambong.

Ang unang mamumulong sa programa mao si John Barr, usa usab ka membro sa Nagamandong Lawas. Nga mikutlog daghan gikan sa Salmo 104, iyang gipakita nga dili lamang gilalang ni Jehova ang tanang butang, buhi ug dili buhi, kondili gilalang usab niya ang usa ka dapit nga pagapuy-an sa matag linalang. Siya mipadayon sa pag-ingon: “Karon, samtang kamo mangadto sa inyong asaynment, hunahunaa: ‘Si Jehova nagbutang kanako dinhi.’ Ayaw gayod hikalimti kana.”

Ang sunod nga mipahayag mao ang usa ka membro sa Watchtower Farms nga Komite, si John Stuefloten. Iyang gipahinumdoman ang mga estudyante: “Ang sanglitanan nagaingon kanato: ‘Paghatag sa usa ka tawong makinaadmanon ug siya mahimong labi pang makinaadmanon.’” (Proverbio 9:9) Sa lima ka bulan ang mga estudyante gihatagan sa tugob espirituwal nga pagkaon. Sa walay duhaduha, sa maong adlaw sa graduwasyon ilang gibating busog sa espirituwal. “Apan,” matud sa mamumulong, “mao pay inyong pagsugod!” Iyang gidasig ang mga estudyante sa pagpadayon sa pagtubo sa kaalam ug kaluoy aron mas makaarang sa pagtabang sa uban.​—Proverbio 3:27.

Si George Gangas sa Nagamandong Lawas misugod uban ang pila ka maayong-pagkapiling pulong mahitungod sa kalipay. Iyang gipahinumdoman ang mga graduwado nga sila nagaalagad sa “Diyos nga malipayon” ug nagpahayag: “Inyong hikaplagan ang kalipay diha sa inyong langyawng mga asaynment.” Ngano? “Tungod kay si Jehova nagapadala kaninyo didto aron sa pagluwas sa katawhan gikan sa pagkaulipon.”

Si George Couch sa Brooklyn Bethel nga Komite naghisgot mahitungod sa kabalaka. Iyang giila nga ang mga estudyante nasinati sa kabalaka. Ang mga hagit sa pagtungha sa Gilead, pagpuyo sa Brooklyn Bethel, ug ang pagsangyaw sa New York City ngatanan nagpahinabog diyutayng kabalaka. Karon ang mga estudyante mabalak-on mahitungod sa ilang misyonaryong mga asaynment. Apan ang makataronganong kabalaka dili usa ka kaaway. “Ang kabalaka makatabang sa pagdasig kanato sa pagbuhat sa atong kinamaayohan,” siya misaysay, ug iyang gidasig ang mga estudyante sa pagsalig kang Jehova ug pagbuhat sa ilang kinamaayohan diha sa ilang mga asaynment.

Ang instruktor sa tunghaan si Jack Redford ang sunod miadto sa dapit sa mamumulong. Siya nagpasidaan batok sa dili-makataronganong pagsaway. Sa paghisgot sa mga pananglitan sa Bibliya sa madalidalion nga mga panghukom nga nakapahinabog mga suliran sa ulahi, iyang gikutlo ang mga pulong ni Jesus: “Hunong kamo sa paghukom aron kamo dili pagahukman.” (Mateo 7:1) Ang ika-82 nga klase naghawas sa usa ka Diyos sa gugma. Ang mga estudyante gipadala ngadto sa ilang mga asaynment aron magmabination, dili hinawayon.

Ang instruktor sa Gilead si Ulysses Glass nagkutlo sa proverbio sa Bibliya: “Dili iya sa matulin ang lumba, ni ang gubat sa mga kusgan.” (Ecclesiastes 9:11) Ang sangpotanan sa usa ka butang dili magaagad sa tanang panahon sa atong kinaiyanhong mga katakos. Sa misyonaryong buluhaton, kini labaw pang subsob maylabot sa pagtuo ug pagkaandam modawat sa usa ka hagit. Ang mamumulong nagdayeg sa ika-82 nga klase tungod sa pagkalig-on, pagkakasaligan, ug pagkadili-mabalhinon. Ang maong mga hiyas magbutang kanila sa maayong kahimtang.

Ang kataposang mamumulong sa buntag, ang presidente sa Watch Tower Society si Frederick Franz, mipahayag nga ang graduwasyon sa ika-82 nga klase nagbayaw sa pagtuo niadtong nagsugod sa tunghaan sa mangiob nga mga adlaw sa Gubat sa Kalibotan II. Siya namulong mahitungod sa ngalang Gilead, nga misaysay nga kini usa ka pulong sa Bibliya nga nagkahulogan “Tumpi sa pamatuod.” (Itandi ang Genesis 31:43-53.) Ang mga misyonaryo sa Gilead nga nagapabiling matinumanon sa ilang mga asaynment nagaalagad nga usa ka tumpi sa pamatuod. Sila buhing pamatuod sa kamatuoran.

Unya nadawat sa mga estudyante ang ilang mga diploma, ug ang buntag natapos uban sa pagbasa sa usa ka sulat sa pasalamat gikan sa ika-82 nga klase. Ang mga estudyante mipahayag nga ‘ang panalangin ni Jehova mao ang nagapadato.’ Tungod niana, sila miingon, “Si Jehova nagpabati kanamo nga samag 24 ka kinadatoang tawo sa yuta!”—Proverbio 10:22.

Sa hapon, human sa pinamubong pagtuon sa Watchtower, gipasundayag sa mga estudyante ang nindot nga programa. Kadto gitapos uban sa mga pulong sa kinasingkasing nga apresasyon ngadto sa ilang mga ginikanan, kansang kadili-hakog ug pagpaluyo nagtugot sa ilang mga anak sa paglakaw ug pagkahimong mga misyonaryo.

Ang programa sa estudyante gisundan sa pagpasundayag sa tukma-panahong drama, nga tapos niana ang tsirman, si Theodore Jaracz, mihatag sa pila ka panapos nga komento. Ug dako gayong sorpresa ang gitagana sa Sosyedad sa maong kataposang mga gutlo! Ang mamumulong mipahibalo nga sa dili madugay buksan sa Sosyedad ang usa ka bag-ong tunghaan, ang Tunghaan sa Ministeryong Pagbansay, aron sa pagbansay sa sinugdan sa ulitawong mga ansiano ug ministeryal nga mga alagad. Ang tanan mihatag ug linaing pagtagad sa gipahibalo sa tsirman ang usa sa mga kinahanglanon sa pagtambong sa bag-ong tunghaan: kaandam “sa pag-alagad sa bisan diin may panginahanglan sa tibuok-kalibotang natad.”

Ang balita mahitungod sa maong bag-ong tunghaan gisugat sa masipang pakpak. (Ang dugang detalye bahin niini gihatag sa sunod nga artikulo.) Unya ang programa natapos sa awit ug pag-ampo sa pasalamat kang Jehova. Dayon ang tanan nanggawas ngadto sa ngiob ang langit nga gabii sa New Jersey. May diyutay pang ulan sa kahanginan, apan diyutay ra ang nagtagad niana. Ang tanang kasingkasing nagmaya pa duyog sa ika-82 nga klaseng migraduwar sa Gilead.

[Hulagway sa panid 26]

Mga Graduwado sa Ika-82 nga Klase sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubang ngadto sa likod, ug ang mga ngalan gilista gikan sa wala patuo sa matag lumbay.

(1) Gish, L.; Evans, E.; Dean, S.; Hanson, R.; Suomalainen, A.; DuBose, D.

(2) Wallenberg, P.; Wallenberg, M.; Bauer, O.; Suomalainen, H.; Taylor, B.; DiStefano, G.

(3) Scott, K.; Evans, M.; Taylor, A., Jr.; Lindby, J.; Hanson, C.; Holmkvist, M.

(4) Sampson, T.; Gish, T.; Ball, D.; DuBose, J.; Dean, T.; Scott, D.