Usa ka Pulyetong May Bag-ong Dagway
ANG impormasyon sa nag-unang artikulo gipresentar sa tibuok yuta sa 1986 panahon sa “Balaang Kalinaw” Distritong mga Kombensiyon sa mga Saksi ni Jehova. Dinhi among gisuma ang dugang makaiikag nga mga komento nga gihimo sa mamumulong:
“Tan-awa! Ginabag-o Ko ang Tanang Butang.” Kana mao ang titulo sa usa ka pulyeto nga gipatik sa Watch Tower Society niadto pang 1959. Ang usa ka pulyetong ingon niining matanga gihangyo sa mga misyonaryo sa Hapon. Gibati nga may panginahanglan didto sa usa ka basahong magpresentar sa mensahe sa Gingharian sa tin-aw, yanong paagi sa kaayohan sa mga tawo nga dili kaayo sinati sa Bibliya mismo. Ilalom sa pagdumala sa Watch Tower Society, kapin sa 30 ka misyonaryo miapil sa pagtigom sa impormasyon sa pulyeto. Kini bang bag-ong pulyeto mitagana sa panginahanglan samtang kini nahimong pangunang instrumento sa pagsugod ug bag-ong mga pagtuon sa Hapon?
Ang mga resulta mopahayag sa kaugalingon. Panahon sa pagluwat sa pulyetong “Tan-awa!,” may kinatas-ang ihap nga 1,390 ka magmamantala sa Hapon. Karong adlawa, ang kinatas-ang ihap maoy 114,480 ka magmamantala. Halos kining tanan gipailaila sa pagtuon sa Bibliya pinaagi sa pulyetong “Tan-awa!” Sulod sa miaging 27 ka tuig, kapin sa 8,750,000 ka kopya niining pulyetoha gipanagtag sa Hapones nga pinulongan lamang. Ug sa miaging 20 ka tuig, ang Hapon nagtahog bag-ong kinatas-ang ihap sa mga magmamantala sa Gingharian kada bulan gawas sa duha. Bisan tuod pihong may ubang hinungdan nga nakatabang niining maayong pag-uswag, walay duhaduhang ang paggamit sa pulyetong “Tan-awa!” sa pagsugod sa mga pagtuon sa Bibliya maoy usa ka dakong hinungdan.
Kining pulyetoha karon gisagnunot sa panahon, sumala sa presenteng mga panginahanglan karon, ug giluwatan panahon sa “Balaang Kalinaw” nga mga kombensiyon ingong brochure nga samag gidak-on sa magasin nga may 32 ka panid. Ang usa ka bag-ong bahin gidugang sa topikong “Daotang mga Butang—Nganong Gitugotan Kana sa Diyos?” Dugang pa, ang kataposang mga parapo gisulat pag-usab aron hatagan ang estudyante sa mainitong pagdasig nga makig-uban sa organisasyon ni Jehova. Karon ang basahon makitang may dagko, daling mabasang letra ug daghag matulon-anong ilustrasyon. Ang matahom bag-o, upat-ug-kolor nga hapin gihulagway nga pinagamay diha sa atbang nga panid.
Kini bang bag-ong brochure o pulyeto, “Tan-awa! Ginabag-o Ko ang Tanang Butang,” gamiton lamang sa Oriente? Pihong kini epektibo kaayo didto. Bisan pa niana, gituohan nga ang pulyetong “Tan-awa!” mahimong mapuslanon usab sa pagsugod ug mga pagtuon sa Bibliya sa kanataran sa tibuok kalibotan. Milabay ang halos 30 anyos sukad sa paggama sa orihinal nga pulyeto. Sulod sa maong panahon, ang kahibalo sa Bibliya mius-os ngadto sa bag-ong kinaubsang punto, bisan diha sa kayutaan nga nagaangkong Kristohanon. Inay sa pagpatalinghog gikan sa ilang mga ginikanan sa ilado kaayong mga estorya gikan sa Bibliya, ang bag-ong kaliwatan nakatubo uban ang mga mata ug mga igdulongog nga natapot sa telebisyon, nga nagasuhop sa bisan unsang ginatanyag sa kalibotan. Kini, duyog sa ubang kabaldahan sa nabuang-sa-kalingawan nga kalibotan, nakakuhag bililhong mga takna nga magamit unta alang sa espirituwal nga kaugmaran. Ang kaliwatan karon, kon kaha diha sa Kakristiyanohan o sa laing dapit, diyutay kaayong nahibaloan bahin sa Pulong sa Diyos. Gikinahanglan niini ang ‘gatas sa Pulong,’ sumala sa gipahayag nga tin-aw sa pulyetong “Tan-awa!”—Hebreohanon 5:12.
Sa tibuok kalibotan, may mga tawo kansang mga kasingkasing mahilig sa pagkamatarong ug malipay nga makakat-on sa unsang paagi sila mailhan uban sa “dakong panon” nga molabang-buhi sa Armageddon. (Pinadayag 7:9, 14) Sa atong balay-balay nga pag-alagad, tingali atong hikaplagan ang daghan nga makaangay sa nindot nga hulagway sa hapin sa pulyeto ug sa makapadaning kabatbatan sa Paraiso sa unang mga parapo. Sa balikduaw, atong magamit ang han-ay sa mga kasulatan nga gisitar sa pagpaluyo nianang mga parapoha sa pagpakita nga kining paglaoma dili lamang kay usa ka damgo. Unya, pinaagi sa regular nga pagtuon sa Bibliya, nga magagamit sa pulyetong “Tan-awa!,” kita makatabang kanila sa pagsugod sa pagsubay sa dalan sa kinabuhi. Sumala sa giingon ni Jesus sa pag-ampo ngadto sa iyang Amahan: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug sa imong gipadala, si Jesu-Kristo.”—Juan 17:3.
Hinaot kitang tanan madasigong magagamit sa pulyetong “Tan-awa!” sa pagpadan-ag sa kamatuoran sa Gingharian, nga ang “dakong panon” moduyog sa nahibiling mga dinihogan sa harianong pagkasaserdote aron sa ‘pagpasidlak sa ilang kahayag atubangan sa mga tawo.’ (Mateo 5:16) Hinaot ang mahimayaong ngalan sa Soberano Ginoong Jehova bug-os mabalaan. Hinaot ikapasundayag sa tanang panahon nga ang mga saad ni Jehova nga Diyos, ang Maglalalang sa langit ug sa yuta, sa kanunay “kasaligan ug matuod.” Siya mao ang magapahayag gikan sa iyang trono sa langit: “Tan-awa! Ginabag-o ko ang tanang butang.”—Pinadayag 21:5.