Mga Magmamantala sa Gingharian Nagtaho

Dili-pormal nga Pagsangyaw Namunga

GISUGDAN ni Jesus ang usa ka kabildohay nga misangpot sa dili-pormal apan epektibo kaayong pagsangyaw sa miingon siya ngadto sa usa ka babayeng Samaritanhon sa usa ka atabay: “Paimna ra ko.” (Juan 4:7) Karong adlawa kita susamang mahimong epektibo kaayo kon kita igmat sa tanang higayon sa dili-pormal nga pagsangyaw. Usa ka igsoong lalaki sa Australia nakahaling sa usa ka dili-pormal nga kabildohay pinaagi sa pagbasa sa inadlaw nga teksto sa usa ka bangko sa parke. Namatikdan sa usa ka mausisaong tawo ang basahon ug miingon siya nga interesado usab siya sa Kasulatan. Siya dili-magtutuman nga Katoliko nga natudloan sa ebolusyon sa Katolikong tunghaan ug karon wala na mahibalo kon unsay pagatuohan. Gihikay sa igsoong lalaki nga mokuhag librong Life—How Did It Get Here? By Evolution or by Creation? alang kaniya.a Duha ka adlaw sa ulahi gidala niya ang libro ngadto sa trabahoan sa lalaki, nga unya nasayran lamang niya nga siya wala diha. Ang iyang sekretarya halos nagsakmit sa libro, nga nag-ingon: “Nagpaabot kami niining libroha.”

Duha ka oras sa ulahi ang igsoong lalaki nakadawat ug tawag sa telepono gikan sa tawo nga naghangyog duha pa ka kopya sa librong Creation ug mihangyo sa Saksi nga duawon siya sa iyang opisina. Sa pag-adto sa igsoon sa maong opisina, nakaplagan niya ang tawo ug duha pa nga lain nga diha. Nasugdan ang usa ka pagtuon sa Bibliya uban kanila, apil ang sekretarya, ug gihikay nga ang igsoon moduaw kaduha sa usa ka semana. Sa mga semana sa ulahi ang trato sa lalaki, usa ka ‘born-again Christian,’ kanunayng nagpadalag mga nota nga nangutanag mga pangutana sa Bibliya. Sa kataposan, siya mikuyog sa pagtuon, ingon man ang kasosyo sa negosyo sa tawo ug iyang higala, kinsa usa ka ebolusyonista.

Gipadayon niya ang ilang mga pagtuon sa Bibliya nga regular sa lima ka bulan, nga ang ikaduhang pagtuon kada semana gihimo sa parke. Dayon ang trato sa sekretarya mikuyog sa grupong nagtuon. Wala madugay, ang kasosyo sa unang tawo ug iyang higala mibalhin ngadto sa Idaho sa Tinipong Bansa, diin sila nagpadayon sa pagtuon. Pila ka semana sa ulahi, ang unang tawo giduol sa bug-os estranghero, kinsa nangutana kon unsay nahitabo sa mga panaghisgot sa Bibliya sa parke. Mopatim-aw, siya nanimati diay sa ilang mga pagtuon. Gihimo ang kahikayan nga siya magtuon usab.

Unsay resulta nianang tanan? Napulog-walo ka bulan sukad sa unang kontak sa parke, ang unang tawo ug iyang trato, ang kanhi ‘born-again Christian,’ nagminyo ug nabawtismohan. Ang sekretarya ug iyang trato naminyo usab ug nabawtismohan. Ang kasosyo ug iyang higala nga nangadto sa Tinipong Bansa nabawtismohan ug usa kanila karon nagaalagad nga regular ingong auxiliary payunir. Ang usang namati sa mga panaghisgot sa Bibliya sa parke nagpadayon sa iyang mga pagtuon. Unya siya mibalhin ngadto sa Ireland, ug siya nagapanan-aw nga mabawtismohan!

Kining tanan nahitabo kay ang usa ka igsoong lalaki nagpahimulos sa iyang pahulay nga tingpaniudto sa paghimog dili-pormal nga pagsangyaw, ug gipanalanginan ni Jehova ang iyang paningkamot. Hinaot kita susamang magpahimulos sa tanang higayon sa pagsabwag sa maayong balita ngadto niadtong gigutom alang sa mensahe sa Gingharian ni Jehova!

[Footnote]