Mga Magmamantala sa Gingharian Nagtaho

Si Jehova Labi Pang Gamhanan Kay sa Iyang mga Kaaway

ANG Yawa ug ang iyang mga demonyo dugay nang naningkamot sa pagbalda sa pagsangyaw sa maayong balita pinaagi sa bakak nga relihiyon ug espiritismo. Ang Bibliya naghisgot bahin sa daotang tinguha ni Satanas diha sa 2 Corinto 4:4 diin kini nag-ingon nga “ang diyos niini nga sistema sa mga butang nagbuta sa mga hunahuna sa mga dili-magtutuo, aron nga ang banwag sa mahimayaong maayong balita bahin sa Kristo, kinsa mao ang larawan sa Diyos, dili makalapos paglamdag.”

Apan si Jehova nga Diyos labi pang gamhanan kay kang Satanas. Walay mahimo ang mga kaaway ni Jehova sa pagsanta sa katumanan sa iyang balaang kabubut-on, nga mao nga “ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Ang mosunod nga mga taho gikan sa mga magmamantala sa Gingharian sa Australia nagpasiugda niini.

◻ Human sa 20-ka-tuig nga paglikay sa relihiyon, usa ka babaye misugod sa pagbasa pag-usab sa Bibliya. Gumikan sa nabag-ong interes sa Bibliya nakabaton siyag daghang pangutana, busa siya miampo sa Diyos alang sa tabang sa pagkaplag sa mga tubag. Buot niyang mangita sa kamatuoran, apan siya nasayod nga ang pagbalik sa iyang karaang relihiyon dili makasulbad sa iyang suliran. Hinunoa, misugod siya sa iyang pagpangita pinaagi sa pagduaw ug tindahan sa mga ginamit nga libro ug nangutana kon sila may mga libro bahin sa relihiyon.

Ang tag-iya sa tindahan nahinumdom nga siya adunay usa ka relihiyosong libro, dili sa tindahan, kondili sa balay. Ang ulohan sa libro mao ang Ikaw Mabuhing Walay Kataposan sa Paraiso sa Yuta, nga gipatik sa mga Saksi ni Jehova. Ang babaye mahinamong nagbasa sa libro ug nakakaplag sa mga tubag sa daghan niyang mga pangutana sa Bibliya. Tapos mangita sa mga Saksi ni Jehova diha sa direktoryo sa telepono, nakontak ra gayod niya sila ug misugod sa pagtuon sa Bibliya nga regular.

◻ Usa ka batan-ong babaye nagpaanunsiyo diha sa usa ka lokal nga mantalaan nga may ibaligya siyang anting-anting. Ang anunsiyo naghisgot niana ingong usa ka ‘edad medya nga anting-anting nga gamhanan kaayo.’ Usa sa mga Saksi ni Jehova nakamatikod sa anunsiyo. Siya mihukom sa pagtawag sa numero sa telepono nga gihatag ug makig-estorya sa babaye mahitungod sa tuboran sa gituohang gahom sa anting-anting. Usa ka diskusyon bahin sa hunahuna sa Bibliya sa kalihokan sa demonyo ang misunod. Ang batan-ong babaye nga may anting-anting mitug-an nga sa miaging adlaw lamang, siya miampo sa Diyos alang sa tabang sa iyang mga suliran sa mga demonyo. Ang Saksi mihimog mga kahikayan alang sa laing diskusyon pinaagi sa telepono.

Sa dihang siya mitawag, ang batan-ong babaye wala sa balay. Ang inahan mitubag sa telepono ug miingon: “Wala ko masayod kon unsay imong gisulti sa akong anak babaye, apan usa ka milagro ang nahitabo!” Siya miasoy nga human sa unang pagtawag sa telepono, ang iyang anak babaye naglabay sa tanan niyang satanasnong mga hulagway ug mga libro ug misugod sa pagbasa sa Bibliya.

Wala madugay, ang mga kahikayan gihimo alang sa personal nga pagduaw sa batan-ong babaye. Midawat dayon siya sa usa ka regular nga pagtuon sa Bibliya uban sa mga Saksi ni Jehova. Misugod usab siya sa pagpakig-uban sa mga Saksi pinaagi sa pagtambong sa Kristohanong mga tigom. Sa makausa pa, si Jehova nagparot sa mga demonyo pinaagi sa pagpalamdag sa tukmang kahibalo sa mga kamatuoran sa Bibliya.