Gitahod ang mga Katungod sa mga Pasyente

‘Dili gayod ako moopera nga walay dugo. Kon gusto ka gayod nga magpaopera, kinahanglang mosugot ka sa akong paagi sa pagtambal. Kay kon dili, pangita na lang ug laing doktor.’

ANG mga pulong sa doktor wala makatarog sa pagtuo ni Cheng Sae Joo, usa sa mga Saksi ni Jehova nga nagpuyo sa Thailand. Nahiling nga adunay meningioma, usa ka matang sa tumor sa utok, gikinahanglan gayod nga maoperahan si Cheng. Apan determinado siya sa pagsunod sa sugo sa Bibliya: “Padayong magpahilayo . . . gikan sa dugo.”​—Buhat 15:28, 29.

Miduaw ug laing duha ka ospital si Cheng, nga mas gustong magpatambal diha sa iyang kaugalingong nasod kon mahimo. Sa iyang kahigawad, ang mga doktor didto mibalibad usab sa pag-opera nga walay dugo. Sa kataposan, nakontak ni Cheng ang Neurological Institute sa Women’s Medical College sa Tokyo pinaagi sa Hospital Information Services (HIS) sa Thailand. Kadtong ospitala nakatambal na ug kapin sa 200 ka pasyente nga may tumor sa utok nga ginamit ang gamma knife, usa sa labing bag-ong kaplag sa terapiya pinaagig radyasyon.

Gihimo ang mga kahikayan nga moestar si Cheng sa mga Saksi nga Hapones nga nagpuyo duol sa ospital. Gitagbo siya sa usa ka grupo diha sa tugpahanan sa ayroplano, lakip sa duha ka Saksi ni Jehova nga makasultig Thai ug usa ka hawas sa HIS. Human sa usa ka semana nga mga pagsusi, giadmit si Cheng sa ospital diin gitambalan siya pinaagi sa gamma knife. Ang pamaagi mikabat lamang ug duolan sa usa ka oras. Migawas sa ospital sa pagkasunod adlaw, si Cheng talipauliay nag balik sa Thailand sa pagkasunod adlaw human niana.

“Dili gayod nako mahanduraw ang dako kaayong tabang nga mahatag pinaagi niining kahikayana,” miingon si Cheng. “Nakadayeg gayod ako sa gugma nga gipakita maingon man sa kooperasyon tali sa daghang tawong nalangkit.”

Sa pagtaho niining balitaa, ang mantalaang Mainichi Shimbun sa Hapon mikomento: “Hangtod karon, ang relihiyosong mga katarongan sa pagdumili sa mga pag-abunog dugo ang gipasiugda. Apan, ang mga pag-abunog dugo adunay dili maayong mga epekto sama sa AIDS, sa risgo nga maimpeksiyon sa virus sama sa hepatitis C, ug mga alerdyi. Tungod niini nga katarongan adunay mga pasyente nga dili gustong magpaabunog dugo bisan unsa pay ilang relihiyosong tinuohan.”

Ang mantalaan dugang miingon: “Daghang pasyente nga midumili sa mga pag-abunog dugo napugos sa pagbalhin ug mga ospital, apan adunay panginahanglan alang sa kausaban sa bahin sa medikal nga mga institusyon labot sa pagtahod sa kabubut-on sa pasyente. Ang may-kasayoran nga pag-uyon (usa ka pasyente nga nagdawat ug bug-os nga katin-awan kon unsay nalangkit ug unya pag-uyon sa pagtambal) gikinahanglan, ug ang mga kaso sa mga pag-abunog dugo dili eksepsiyon. Kinahanglang ilhon nga dili kini usa ka isyu nga nalangkit ang usa lamang ka relihiyon.”

Sama kang Cheng Sae Joo, daghan nga gustong magpatambal nga walay dugo kinahanglang mobalhin sa ubang mga ospital. Bisan pa, ilang gipabilhan ang mga paningkamot sa mga doktor nga andam sa pagtahod sa mga katungod sa ilang mga pasyente.

Ang Hospital Information Services gitukod sa mga Saksi ni Jehova sa mga sanga sa Watch Tower Society sa pagpangita sa kooperasyon sa mga doktor nga nagatahod sa ilang mga pagtuo. Sa tibuok kalibotan, ang HIS nagtukod ug mabuligong mga relasyon tali sa mga ospital, mga doktor, mga empliyado sa pag-atiman sa panglawas, mga abogado, ug mga huwes.