“Adunay Kahimuot Diha sa Imong Tuong Kamot Hangtod sa Kahangtoran”

Sumala sa giasoy ni Lois Didur

Kanunay ka bang makaingon, ‘Nagmahay ko sa akong desisyon’? Hinuon, sa akong 50 ka tuig sa bug-os panahong pag-alagad kang Jehova, wala gyod koy gimahayan. Paasoya ko kon ngano.

NATAWO ko sa 1939 ug nagdako sa kabanikanhan sa Saskatchewan, Canada, uban sa akong upat ka igsoong babaye ug usa ka igsoong lalaki. Malipayon ang kinabuhi sa kaumahan diha sa kapatagan. Usa ka adlaw niana, gisangyawan sa mga Saksi ni Jehova ang akong papa ug ako silang gipangutana kon duna bay ngalan ang Diyos. Ilang gipakita kanamo ang ngalang Jehova diha sa Salmo 83:18. Tungod niana, gusto kong mahibalo ug dugang bahin sa Diyos ug sa iyang Pulong.

Kaniadto, ang mga bata motungha sa usa ray lawak nga eskuylahan hangtod sa grade 8. Magsakay silag kabayo o magbaktas ug daghang kilometro paingon sa eskuylahan. Ang mga pamilya maoy motagana sa panginahanglan sa magtutudlo. Usa niana ka tuig, turno na sa akong ginikanan ang pagpaestar sa bag-ong magtutudlo, si John Didur.

Wala ko mahibalo nga kining batan-ong lalaki interesado pod diay sa Pulong sa Diyos. Kas-a akong gidayeg ang komunismo ug sosyalismo, nga niadto gipaluyohan ni Papa. Sa malumong tingog, si John mitubag: “Walay tawo nga may katungod sa pagmando sa iyang isigkatawo. Diyos lang ang may katungod.” Kini mitultol sa daghang makaiikag nga panaghisgot.

Kay natawo sa 1931, si John nakadungog na sa mga kalisdanan sa gubat. Dihang miulbo ang Gubat sa Korea sa 1950, gipangutana niya ang lainlaing lider sa simbahan bahin sa ilang kalangkitan sa gubat. Ang tanan miingon nga pwede rang moapil sa gubat ang mga Kristohanon. Sa ulahi, iyang gipangutana usab ang mga Saksi ni Jehova. Ilang gipakita sa Bibliya ang baroganan sa unang mga Kristohanon bahin sa gubat. Si John nabawtismohan sa 1955. Pagkasunod tuig, nabawtismohan pod ko. Gusto namong moalagad kang Jehova sa tibuok kinabuhi ug kusog. (Sal. 37:3, 4) Pagka-Hulyo 1957, kami nagminyo.

Ang among anibersaryo sa kasal sagad maatol sa kombensiyon. Malipay kaayo mi nga makauban ang linibo ka igsoon nga nagtahod sa kaminyoon. Una ming nakatambong ug internasyonal nga kombensiyon niadtong 1958. Lima mi nga nag-awto paingon sa New York City gikan sa Saskatchewan. Sulod sa usa ka semana, mobiyahe mig adlawan ug matulog sa tolda inigkagabii. Nalipay kaayo mi dihang nahimamat namo ang usa ka brader sa Bethlehem, Pennsylvania, ug gidapit mi nga moestar sa ilang balay nianang gabhiona. Tungod sa iyang kamaabiabihon, nakaabot mi sa New York City nga hinlo ug hapsay. Sa maong dakong kombensiyon gibati namo ang talagsaong kalipay sa pag-alagad kang Jehova! Sama sa gisulat sa salmista, “adunay kahimuot diha sa imong tuong kamot hangtod sa kahangtoran.”—Sal. 16:11.

PAGPAYUNIR

Pagka-1959, nagpayunir mi ug nagpuyo sa usa ka gamayng treyler nga balay ibabaw sa usa ka bungtod sa Saskatchewan. Layo kaayo ang imong malantaw ug ang pipila niana among teritoryo.

Usa ka adlaw niana, nakadawat mig sulat gikan sa sangang buhatan. Nagdali kog adto kang John nga nag-ayo ug traktor. Kami gidapit nga mahimong espesyal payunir sa Red Lake, Ontario. Kay wala mahibalo kon diin kini, gipangita dayon namo ni sa mapa.

Lahi kaayo ni sa kapatagan nga among gigikanan. Duna kiniy dagkong lasang ug gagmayng lungsod nga duol sa mga minahan ug bulawan. Sa unang adlaw samtang nangita mig kasak-an, usa ka batang babaye ang nakadungog sa among panag-estoryahay sa iyang silingan. Siya mipauli ug giingnan ang iyang mama, kinsa nagpasaka namo nianang gabhiona. Didto mi natulog sa silong diin yuta ang salog ug bungbong. Pagkaugma, nakakita mig balay nga may duha ka lawak apan walay gripo ug mga gamit, gawas lang sa heater nga sugnorag kahoy. Namalit mig segunda-manong mga gamit ug nakontento ra.

Ang kinadul-ang kongregasyon maoy 209 kilometros ang gilay-on. Daghang trabahante sa minahan naggikan sa Europe, ug gusto nilang makabatog Bibliya sa ilang pinulongan. Sa mubo lang nga panahon, duna na mi 30 ka Bible study. Sulod sa unom ka bulan, naporma ang gamayng kongregasyon.

Samtang nag-Bible study sa usa ka babaye, gitawgan sa bana niini ang ilang pari aron paadtoon sa ilaha ug tul-iron ang iyang asawa. Pag-abot sa pari, giingnan mi nga angay namong itudlo ang Trinidad ug ang uban pang pagtulon-an. Gikuha sa babaye ang ilang Katolikong Bibliya ug giingnan ang pari nga pamatud-an ang gisulti niini. Giitsa sa pari ang Bibliya diha sa lamesa ug miingon nga wala siyay angayng pamatud-an. Pagbiya sa pari, miingon kini kanila sa pinulongang Ukrainian nga kinahanglang palayason mi ug dili na pabalikon. Wala siya mahibalo nga si John makasabot ug Ukrainian!

Wala madugay, mibiya mi sa Red Lake kay si John bansayon alang sa sirkitong buluhaton. Apan mga usa ka tuig sa ulahi, dihang si John naghatag sa pakigpulong sa bawtismo panahon sa distritong kombensiyon, ang maong bana maoy usa sa mga kandidato! Ang nahitabo uban sa pari nagtukmod kaniya sa pagsusi sa Bibliya.

PULIKI SA NAGAPANAWNG BULUHATON

Sa sirkitong buluhaton, duna miy talagsaong pribilehiyo nga makaestar sa lainlaing pamilya. Nasuod mi nila. Kas-a gipaestar mi sa usa ka lawak sa itaas nga walay heater panahon sa tingtugnaw. Sayo sa buntag, madungog namo ang edarang sister nga hinayhinayng mosulod sa among lawak aron sindihan ang gamayng kosinilya. Dayon mobalik siya nga magdalag planggana ug init nga tubig aron makapangandam mi. Daghan kog nakat-onan sa iyang gipakitang konsiderasyon ug kaayo.

Ang sirkitong buluhaton mas nakapasuod nako kang Jehova. Sakop sa usa ka sirkito sa Alberta ang usa ka minahang lungsod sa Far North, diin may sister nga nagpuyo. Giunsa pag-atiman sa organisasyon kining nalain nga sister? Kada unom ka bulan, mag-ayroplano mi paingon didto. Sulod sa usa ka semana mosangyaw mi ug magtigom uban niya, sama sa ginahimo sa dagkong kongregasyon sa siyudad. Kini maoy maayong pahinumdom sa mahigugmaong pag-atiman ni Jehova sa matag usa niya ka alagad.

Nakigsinulatay mi sa mga igsoon nga among giestaran kaniadto. Kana nagpahinumdom nako sa unang regalo nga gihatag ni John kanako—usa ka mabulokong kahon nga punog sulatanang papel. Malipayon kaayo ming nakigsinulatay sa among mga higala gamit ang maong mga papel. Gitipigan ko gihapon ang maong kahon.

Samtang nag-alagad sa usa ka sirkito sa Toronto, gitawgan mi sa usa ka brader sa Bethel sa Canada ug gipangutana kon gusto ba ming moalagad sa Bethel. Gusto niyang mahibaloan ang tubag pagkaugma. Amo kining gidawat.

PAG-ALAGAD SA BETHEL

Sa matag kausaban sa among asaynment, nasinati namo ang kalipay sa pag-alagad kang Jehova. Nagpadayon kana dihang mibalhin mi sa Bethel niadtong 1977. Kay nakauban namo ang pipila sa mga dinihogan, nakita namo ang ilang magkalahing personalidad ug halalom nga pagtahod sa Pulong sa Diyos.

Ganahan mi sa bag-ong rutina sa Bethel. Pananglitan, ang among sinina anaa na sa hunos imbes sa maleta, ug naasayn sa usa ka kongregasyon. Gawas sa akong trabaho, malipay kong mag-tour guide sa mga igsoon nga moduaw. Isaysay nako ang mga buluhaton sa Bethel, mamati sa mga komento sa mga bisita, ug tubagon ang ilang mga pangutana.

Dali rang milabay ang mga tuig, ug sa 1997, si John gidapit nga motungha sa School for Branch Committee Members sa Patterson, New York. Human niadto, gipangutana mi kon gusto namong mobalhin sa Ukraine. Gidasig mi nga pamalandongon ug iampo kana. Nianang gabhiona, nakadesisyon mi nga mobalhin.

LAING KAUSABAN—UKRAINE

Nakatambong mi sa dakong internasyonal nga kombensiyon sa St. Petersburg, Russia sa 1992 ug dayon sa Kiev, Ukraine sa 1993. Tungod niini, nasuod mi sa mga igsoon sa Eastern Europe. Nagpuyo mi sa ikaduhang andana sa usa ka karaang balay sa Lviv, Ukraine. Sa bentana makita ang usa ka tugkaran nga may gamayng hardin, dakong sunoy nga pula, ug mga himungaan nga may mga piso. Morag naa ra mi sa umahan sa Saskatchewan. Dose mi nga nagpuyo sa balay. Kada buntag sayo ming mobiyahe agi sa siyudad aron motrabaho sa Bethel.

Unsay among gibati nga nia na mi sa Ukraine? Usa ka dakong pribilehiyo nga makauban ang daghang igsoon nga nakaagom ug mga pagsulay, pagbando, ug pagbilanggo. Apan nagpabiling lig-on ang ilang pagtuo. Dihang amo silang dayegon, sila moingon, “Gihimo namo ni para kang Jehova.” Wala gyod sila mobating gipasagdan. Bisan karon, kon may pasalamatan ka tungod sa iyang kaayo, lagmit siya motubag, “Pasalamati si Jehova,” nga miila sa Tinubdan sa tanang maayong butang.

Sa Ukraine, daghan ang magbaktas lang paingon sa tigom, busa may panahon silang mag-estoryahay ug magdinasigay. Dangtan kinig usa ka oras o kapin pa. Dunay kapin sa 50 ka kongregasyon sa Lviv, 21 niini ang naggamit sa usa ka dakong Kingdom Hall complex. Matag Dominggo, nindot kaayong tan-awon ang daghang igsoon nga manambong sa tigom.

Dali ra namong nasuod ang mga igsoon, kinsa mga buotan ug matinabangon. Kon duna koy dili masabtan sa ilang gisulti, bisan hangtod karon, sila mapailobon kaayo. Ang ilang mga mata daw nakigsulti na kanako.

Usa ka pananglitan sa tinuod nga pagsalig taliwala sa mga igsoon nahitabo panahon sa internasyonal nga kombensiyon sa Kiev sa 2003. Mao pay pagkanaog namo sa tren dihang may batang babaye nga miduol namo ug miingon, “Nawala ko. Dili nako makit-an akong lola.” Nakita sa bata ang among badge ug nahibalo nga kami mga Saksi. Wala siya mahadlok ug mohilak. Ang asawa sa magtatan-aw sa sirkito nga kauban namo nagdala sa bata ngadto sa Lost and Found Department sa estadyum. Wala madugay nagkita ra sila sa iyang lola. Natandog ko pag-ayo sa pagsalig sa maong bata, bisan taliwala sa linibo ka tawo.

Sa Mayo 2001, ang mga igsoon gikan sa lainlaing nasod miadto sa Ukraine aron motambong sa dedikasyon sa bag-ong mga pasilidad sa among sangang buhatan. Human sa espesyal nga pakigpulong sa usa ka estadyum sa Dominggo sa buntag, daghan kaayong igsoon ang nagbaktas paingon sa Bethel aron mag-tour. Dili gyod ko malimot sa akong nakita! Nakadayeg ko sa kahilom ug kaorganisado sa mga igsoon. Misamot ang akong kalipay sa pag-alagad kang Jehova.

MAKAPASUBONG KAUSABAN

Ikasubo, sa 2004, si John nadayagnos nga may cancer. Miadto mi sa Canada aron magpatambal. Halos wala niya makaya ang unang sesyon sa chemotherapy, ug pipila siya ka semana sa intensive care. Maayo gani kay naulian siya sa panimuot. Bisan tuod maglisod siya sa pagsulti, makita sa iyang mga mata ang pagpasalamat sa tanang miduaw.

Apan wala gyod siya maayo, ug siya namatay sa ulahing bahin nianang tuiga. Gibati ko nga usa ka dakong bahin sa akong kinabuhi ang nawala. Kami ni John malipayon kaayong nag-alagad kang Jehova. Unsa nay akong buhaton? Mibalik ko sa Ukraine. Mapasalamaton kaayo ko sa mainitong gugma sa pamilyang Bethel ug sa mga igsoon sa kongregasyon didto.

Wala gyod mi gimahayan sa among mga desisyon. Malipayon ang among kinabuhi duyog sa kinamaayohang mga kauban. Nahibalo ko nga daghan pa kog makat-onan sa pagkamaayo ni Jehova, ug naglaom ko nga makapadayon sa pag-alagad kaniya hangtod sa kahangtoran kay nakaplagan gayod nako ang ‘kahimuot diha sa tuong kamot ni Jehova.’

[Blurb sa panid 6]

“Wala gyod mi gimahayan sa among mga desisyon”

[Hulagway sa panid 3]

Pagminyo namo ni John

[Hulagway sa panid 4]

Dihang espesyal payunir ko sa Red Lake, Ontario

[Hulagway sa panid 5]

Uban ni John sa Ukraine, 2002