Pangutana

◼ Unsa ang hustong paagi sa pag-ihap sa mga nagatambong sa tigom?

Ang Deuteronomio 31:12, 13 nagapakita kon kinsa ang angayng motambong sa mga tigom: “Pagatigomon mo ang katawhan, ang mga lalaki ug mga babaye, ug ang mga bata ... aron nga sila magapatalinghog ug aron nga sila magatuon.” Sa dihang nagaihap sa nagatambong, dayag nga atong ihapon ang tanang mga hamtong. Hinuon, ang pagpatalinghog ug pagkakat-on gikan sa mga tigom gikinahanglan sa tanan, bisan “ang mga bata.” Sa panahon ni Nehemias, “ang tanan nga may igong salabotan sa pagpatalinghog” nagbarog “sukad sa sayo sa buntag hangtod sa kaudtohon” aron pagpaminaw sa pagbasa sa Balaod. (Neh. 8:1-8) Dayag nga ang mga mamiminaw naglakip sa daghang kabataan. Bisan kon sila wala makasabot sa tanang butang, sila makapabili nga sila kinahanglang mahigugma, magasimba, ug mosugot kang Jehova nga Diyos. Tino, nga ang mga kabataan nga nakabenepisyo sa mga tigom angayng ihapon ingong bahin sa nagatambong.

Dayag nga ang usa ka masuso nga gikugos sa inahan nga dili pa makasabot kon unsay nagakahitabo dili angayng ihapon. Gawas pa niini, ang pagkanaihap nagadepende sa paghatag ug pagtagad. Hinuon, dili matinud-anon ang pagdahom sa usa ka bata nga magahupot ug idlot nga pagtagad sa tibuok tigom. Apan, kon ang bata nahibalo kon unsay nagakahitabo, nagapakitag pagtahod kon unsay ginapamulong, siya angayng ihapon bisan pag ang iyang pagtagad maglatagaw sa pupanahon.

Ang mga ginikanan kinahanglang magbansay sa ilang mga bata sa pagpabili sa mga tigom pinaagig pagtudlo kanila nga hilom nga maglingkod ug magahatag ug pagtagad sa panahon sa mga panaghisgot sa pamilya sa Bibliya. Ang pipila nagabasa ngadto sa ilang mga bata aron pag-ugmad ug pagpabili alang sa espirituwal nga mga butang. (Tan-awa ang Agosto 1, 1988, nga Bantayanang Torre, panid 13, parapo 13.) Ang uban nagahatag sa mga bata ug mga asaynment sa pagkuhag mga nota sa tinong mga ngalan o mga puntos nga gigamit sa mga tigom nga ikaasoy ngadto sa pamilya sa ulahi. Maoy dili maalamon nga magdalag mga dulaan, mga librong koloranan, o susamang mga butang ngadto sa mga tigom sa tuyo nga huptang okupado ang bata.

Ang attendants nga nagaihap kinahanglang magasusi sa kasilyas ug uban pang mga dapit aron nga ilang ikaapil kadtong temporaryong mihawa sa ilang lingkoranan. Gisugyot nga ang pag-ihap himoon sulod sa kataposang tunga sa tigom.