Pagtabang sa Dili Makanunayong mga Magmamantala
1 Si Jesus miingon: “Ang bisan kinsa nga magapatalinghog niining akong mga pulong ug magatuman niini mahisama sa usa ka tawong but-an, kinsa nagtukod sa iyang balay ibabaw sa bato.” (Mat. 7:24) Kini nagakahulogan sa pagpatunghag maayo kaayong mga bunga, apil ang pagwali sa maayong balita. Ang maong pagkamaunongon magtaganag sama-bato nga pundasyon nga dili mapukan sa mga bagyo sa kalisdanan.
2 Ang pipila sa atong taliwala maoy mga magmamantala nga dili regular, ug kini makapabalaka gayod kanato. Unsa may magpahinabo sa usa nga palabyon ang interong bulan nga walay pakig-ambit sa pagsangyaw ug paghimog tinun-an?
3 Ang pipila hayan seryosong nasakit, ug ang uban nag-unyaunya sa pag-alagad sa kanataran hangtod hinapos na ang bulan, nga sa ilang kaugalingon naapsan sa wala dahomang mga suliran nga nagpapugong kanila sa pagpakig-ambit sa pagsangyaw. Ang uban basin kulang ug pagpabili sa ministeryo ingong bahandi sa pag-alagad nga kinahanglang pagaunahon. (2 Cor. 4:7) Ang pagpit-os gikan sa dili magtutuong kapikas mahimong makapaluya usab. Ang kapakyasan sa paghupot kanunay ug maayong mga batasan sa pagtuon ug pagkaregular sa pagtambong sa mga tigom nakaapektar sa uban, mao nga sila nawad-an sa ilang pagpanabot sa pagkadinalian. (2 Ped. 3:11, 12) Adunay nakaapektar sa ilang kasingkasing. Busa sila dili mapalihok sa pagsulti gikan sa kadagaya niana. (Mat. 12:34) Kon unsa man ang rason, gusto ta silang tabangan.
KON UNSAY MAHIMO SA MGA ANSIYANO
4 Manlimbasog gayod ang mga ansiyano sa pagkasayod sa mga kahimtang ug mga panginahanglan sa tanan diha sa kongregasyon aron sila makabulig kanila. Sa ilang mga miting ang mga ansiyano magtala gayod kon kinsa ang mga dili makanunayon ug tinoon kon kinsa ang makaabag kanila ug kon sa unsang paagi. Ang sekretaryo motala gayod sa bisan unsang hilig ngadto sa pagkadiregular sa pag-alagad sa kanataran sa dihang isulat kana sa ‘Congregation’s Publisher Record card.’
KON UNSAY MABUHAT SA MGA KONDUKTOR SA PAGTUON SA BASAHON
5 Sa kada bulan ang sekretaryo mohatag gayod sa mga konduktor sa Pagtuon sa Basahon ug listahan kanilang wala makareport, aron matabangan gilayon. (Tan-awang Atong Ministeryo sa Gingharian sa Hulyo, 1984, panid 3.) Sa kalulot pagaduolon sa konduktor sa pagtuon ang mga dili regular aron tinoon kon unsay nakababag kanila ug kon sa unsang paagi siya makatabang. (Prov. 27:23) Human masayri ang iyang mga kahimtang, ang konduktor maghikay gayod nga mosangyaw uban kaniya o ang laing hamtong nga magmamantala o payunir makakuyog kaniya sa pagsangyaw. Ang paghatag ug mapuslanong mga sugyot bahin sa pag-andam ug eskedyol nga haom sa ilang mga kahimtang makabulig man usab. Sila ba makaplano nga regular nga mosangyaw sa unang Domingo o ikaduha ug ikaupat nga mga Sabado sa bulan?
6 Sa dihang moduaw sa mga grupo sa pagtuon sa libro, ang magtatan-aw sa pag-alagad makahikay man nga duawon ang mga diregular uban sa konduktor sa pagtuon. Busa ang duha ka hamtong igsoong mga lalaki ang magkaambitay sa paghatag ug tambag ug dayon tabangan sila nga makatukod ug sama-bato nga pundasyon sa pagkamaunongon sa sugo ni Kristo sa pagsangyaw ug paghimog mga tinun-an. Mao nga sila tingali matukbil nga ang pagsangyaw nga buluhaton ikabutang nga una sa ilang listahan sa unang mga butang nga ilang ginabuhat. (Roma 10:10) Manlimbasog gayod kita niining paagiha aron ipakita ang atong gugma alang ‘kanilang may kalabotan kanato sa pagtuo.”—Gal. 6:10.