Pagtanyag sa Maayong Balita​—Pinaagig Paggamit sa Tracts sa Matag Higayon

¹ Ang pipila ka tanom magpatunghag mga ginatos o mga linibo pa gani nga mga binhi. Niining paagiha ginatino ni Jehova nga ang kinabuhi sa maong tanom padayong magalambo ibabaw sa yuta.​—Gen. 1:29, 30.

² Sa susama, si Jehova nagahimo sa binhi sa kamatuoran sa Gingharian nga dagaya dili lang diha sa mga baba sa iyang mga alagad kondili usab pinaagig pinatik nga mga basahon. Hunahunaa ang ginatos ka milyong mga libro, mga pulyeto, mga magasin, ug ‘brochures’ nga gikapang-apod-apod na sa miaging katuigan. Dili pa dugay ang bag-ong hugpong sa tracts gipatik. Kita ba nagagamit niini aron ipakaylap ang maayong balita sa matag higayon?

³ Aron magamit ang tracts nga epektibo, gikinahanglan tang masinati niana. Ang angayan nga gidak-on niini magpadali sa pagdala ug pipila bisan asa kita moadto. Labaw nga importante, ang mensahe nga anaa sa matag ‘tract’ maoy matin-aw, ngadto sa punto, ug madanihon. May maaninaw ka bang daghang kahigayonan aron kini magamit?

⁴ Buluhatong Pamalaybalay: Nakaplagan sa daghang magmamantala nga ang pagtanyag sa ‘tract’ nga walay bayad diha sa pasiuna magbukas sa dalan sa panaghisgot. Hayan buot mong sulayan kini uban sa kinabag-ohang Ulohan nga Mahisgotan, ginamit ang Kinabuhi sa Malinawong Bag-ong Kalibotan o Kon Nganong Ikaw Makasalig sa Bibliya. Sa inyong panaghisgot basin imong mahibaloan nga ang maong tawo bag-o pang namatyan sa usa ka minahal. Pagkatukma nga ipaambit kaniya ang makapahupay nga mensahe diha sa ‘tract’ nga Unsay Paglaom Alang sa Namatay nga mga Minahal? O ang panaghisgot tingali magbutyag nga ang maong tawo adunay pipila ka kalibog maylabot sa gituohan sa mga Saksi ni Jehova. Ang ‘tract’ nga Unsay Gituohan sa mga Saksi ni Jehova? mahimong mao gayod ang gikinahanglan. Sagad ang tagbalay mahinangop sa pagdawat sa tract bisan pa kon ang tanyag sa literatura balibaran. Wala kita mahibalo kon unsang epekto ang mahimo sa usa ka ‘tract’ diha nianang tawhana o sa uban pa sa panimalay nga hayan makabasa niana.​—Eccl. 11:6.

⁵ Impormal nga Pagpamatuod: Sulod sa atong kalihokan sa inadlawng naandan, hayan makakontak kita sa daghang kalibotanong tawo. Bisan asa kita, ang tracts makabulig kanato nga maandam sa paghatag ug pamatuod. Ang pagtanyag ug usa ka ‘tract’ sagad mobukas sa dalan alang sa binaba nga pagpamatuod.

⁶ Sa imong dapit trabahoan, ang mga kaubanan ba sa trabaho nagahisgot sa mga kapit-osan ug mga suliran sa pagkinabuhi? Kon sila gayod “nagapanghupaw ug nagaagulo” tungod sa daotang mga kahimtang sa kalibotan, ang impormasyon diha sa Kinabuhi sa Malinawong Bag-ong Kalibotan makapapukaw uban ang pagsanong diha sa ilang mga kasingkasing, nga nagaabli sa dalan alang sa dugang panaghisgot.​—Ezek. 9:4.

⁷ Kamo bang mga batan-on sa eskuwelahan nakadungog sa mga magtutudlo o kaubanang mga estudyante nga nagaduhaduha sa pagkakasaligan sa Bibliya? Kon Nganong Ikaw Makasalig sa Bibliya nagapakita sa siyentipikanhon ug kasaysayanhong pagkatukma sa Bibliya nga mahimong magpahaling sa ilang interes sa dugang pang pagkat-on.

⁸ Si Jesus miingon nga ang atong nataran sa pagsangyaw mao ang interong kalibotan. (Mat. 13:38; 24:14) Busa, bisan asa nga adunay mga tawo​—sa trabahoan, sa eskuwelahan, diha sa lawak hulatanan sa usa ka doktor o dentista, sa merkadohan o bisan diha sa ato mismong ganghaan sa dihang moduaw ang mga tawo alang sa lainlaing mga rason​—tugoting ipakaylap ta ang mga binhi sa kamatuoran, nga nagasalig nga ang uban mahulog sa “maayong yuta” ug magabunga ngadto sa kadayegan ni Jehova.​—Mat. 13:23.