Pangandam Karon Alang sa Dugang Buluhaton sa Unahan
1 Sa panahon sa ting-ani, kadtong nalangkit mas puliki kay sa naandan. Ug sa panahon sa pagkadinalian, ang mga tawo nagapanikaysikay gayod kay sa naandan. Kita nagapuyo sa usa ka panahon sa pag-ani ug usa ka panahon sa pagkadinalian. Adunay daghang pagabuhaton. Ikaw ba andam sa paglampos sa tanan nga gikinahanglan?—Mat. 9:37, 38; 13:39; Luc. 13:24; 1 Tim. 4:10.
ANG MEMORYAL
2 Ang panahon sa Memoryal mao ang labing importanteng panahon sa tuig alang sa katawhan ni Jehova. Niining tuiga ang Memoryal pagahimoon sa gabii sa Martes, Abril 10. Ikaw ba nagahimog mga kahikayan aron walay makabalda kanimo ug sa imong pamilya sa pagtambong? Ikaw ba nagapanghatag ug mga imbitasyon ngadto sa mga paryente ug mga higala? Komosta na man ang mga interesado diha sa inyong teritoryo, imong mga estudyante sa Bibliya, ug kanhing mga estudyante sa Bibliya?—Luc. 22:19; Pin. 22:17.
3 Ang mga ansiyano sagad nagahikay alang sa bug-os nga paghinlo sa Kingdom Hall sa dili pa ang Memoryal aron ang tanan maandam. Gihimo ba ang mga kahikayan para sa mamumulong sa Memoryal, ang mga emblema ug kadtong magasilbi niana, maingon man ang ekstra nga lingkoranan ug igong ‘attendants’ para niining espesyal nga okasyon?
DUGANG PAKIG-AMBIT SA PAG-ALAGAD SA KANATARAN
4 Ang Memoryal magpahinumdom kanato sa halad ni Jesus sa atong kaayohan. Busa kini linaing tukmang panahon sa pagtagad kon unsaon sa pagpauswag sa atong kalihokan sa ministeryo sa kanataran. Kini ang usa ka paagi sa pagpadayag sa atong apresasyon sa dili-takos nga kalulot ni Jehova pinaagi sa iyang Anak.
5 Ikaw ba makaalagad ingong katabang nga payunir sa Marso, Abril ug Mayo? Sa Marso aduna kita ing kampanya sa pagmantala sa gamhanang mensahe nga anaa sa librong Pinadayag, ug segurado nga buot tang manlimbasog sa atong kaugalingon niining buluhatona. Sa Abril kita motanyag sa suskrisyon sa Bantayanang Torre, ug aduna kita ing espesyal nga mga artikulo, sama sa “Who Will Lead Mankind to Peace?” (Abril 1) ug “World Peace—What Will It Really Mean?” (Abril 15). Ang Awake! mopasiugda sa “Is There Life in Outer Space?” (Abril 8) ug “What Prospects for Longer Life?” (Abril 22). Uban niining ekselenteng materyal kita gayod mapalig-on sa paggugol sa tanang lima ka Sabado sa Marso diha sa buluhatong magasin ug sa paghikay sa bug-os nga bulan diha sa ministeryo sa Abril!
6 Ang dugang panlimbasog gikinahanglan aron sa pagbaton ug dugang pakig-ambit diha sa ministeryo sa kanataran. Bisan pa kon ikaw dili makapayunir, maoy tukma nga himoon ang personal nga tumong sa oras para sa Marso, Abril ug Mayo. Imong bang mahikay ang dugang panahon alang sa ministeryo pinaagig pagtibhang sa personal nga mga pangagpas ug lulinghayaw? Panikaysikay gayod. Hangyoa si Jehova sa paglig-on kanimo ug sa pagpanalangin kanimo. Kadtong adunay lawasnong kabaldahan makakaplag nga pinaagig tabang sa uban, sila usab makahupot ug dugang pakig-ambit niini nga kampanya.
7 Alang kanatong tanan, ang Marso ug Abril kinahanglang maoy puliki kaayong panahon sa pag-alagad kang Jehova. Ang mga ansiyano magmakugihon nga organisahon pag-ayo ang tanang butang. Ang mga panginahanglan sa literatura pagaorderon nga abante pa. Paneguroa nga ang ekstra nga mga magasin, ilabina ang Abril ug Mayo nga mga gula, mabatonan aron magamit kana. Sa Abril, maayo nga susihon sa pagka-Abril 8 kon kinsa pa ang wala makasangyaw sa maong panahon, aron ang hamtong nga mga magmamantala makabulig kanila ug makaarang sa daghan nga maarangan sa pagpakig-ambit sa buluhaton sa Abril. Hikayon ang teritoryo ug mga tigom sa dayon na nga pagsangyaw, apil na ang mga pagsangyaw sa magabii. Samtang kita maikagon nga nagaampo sa panalangin ni Jehova, gamiton ta nga maalamon ang panahon ngadto sa iyang kadayegan.