Sinatia ang Bag-ong mga Basahong Giluwatan sa Kombensiyon
1 Duha ka bag-ong basahong giluwatan ang gikadugang sa atong dagayang suplay sa espirituwal nga pagkaon. Nga giluwatan didto sa “Putling Pinulongan” Distritong mga Kombensiyon, kining bag-ong mga publikasyon makatabang sa tanan kanato aron isulti ang putling pinulongan nga mas matin-aw pa.—Sof. 3:9.
2 Sa giluwatan ang bag-ong brosyur bahin sa dugo, ang mamumulong miingon: “Diha sa ministeryo sa kanataran sagad kita gisukna kon nganong dili kita magpadugang ug dugo. Aron sa pagbulig kaninyo sa pagtubag nianang pangutanaha, maoy usa ka kalipay nga luwatan kining bag-ong basahon. Mao kining magasin-gidak-ong brosyur, How Can Blood Save Your Life?” Gibasa mo bag maayo kining brosyura? Importante nga basahon gayod kini aron mapalig-on ang imong kaugalingong pagtuo ug maandam sa pagtabang sa uban nga makasabot sa Kristohanong panghunahuna maylabot sa dugo.—Buh. 15:28, 29.
3 Kining brosyura magsangkap kanimo sa pagpatin-aw sa imong baroganan ngadto sa bisan kinsang doktor. Apan, dili kini una gayod alang sa mga doktor ug mga abogado. Kini gidesinyo para sa publiko. Gisugyot nga magdala ka ug usa o duha ka kopya diha sa kanataran. Gamita sa bug-os kining bililhong impormasyon alang sa imong personal nga kaayohan ug sa pagtabang sa uban sa pagpakitag hustong pagtahod dapig sa dugo.
USA KA BAG-ONG BASAHON
4 Handurawa lamang ang kabililhon sa bag-ong librong Mankind’s Search for God diha sa atong ministeryo. Kini makatabang kanato sa mas pang nasangkapan sa pagwali ngadto sa katawhan diha man sa Kakristiyanohan o kanilang nagatapot sa ubang mga relihiyon. Tungod sa dagkong mga kalihokan sa mga molupyo niining ika-20 nga siglo, mahimong atong makaplagan ang katawhan sa daghan lainlaing mga linguwahe ug mga relihiyon diha sa atong teritoryo. Uban sa tabang niining libroha, dili kinahanglan nga bation tang magka-edar-edar sa dihang mahibalag ta ang mga tawo sa lainlaing relihiyosong mga kagikan.
5 Ang impormasyon niining bag-ong librong gidukiduki na ug girepaso sa mga tawo kinsa sinati sa mga ulohan nga gihisgotan. Busa, kita makasulti nga may awtoridad sa dihang gamiton ang mga pahayag nga anaa sa maong libro. Maoy tino, sa pagtagana niining impormasyona niining panahona maoy laing pamatuod sa dakong gugma ni Jehova sa katawhan sa tanang kanasoran. Gamiton ta kini nga epektibo sa pagmantala sa maayong balita nga masayran sa tanang matang sa mga tawo diha sa atong teritoryo.—Mat. 28:19, 20; Tito 2:11.