Pagtuman sa Atong Ministeryo sa Gingharian sa Kanataran
1 Pinaagi sa mahanasong paggamit sa kamatuoran, atong mapukan ang “mga pangatarongan ug ang matag hatag-as nga butang nga gipatungha batok sa kahibalo sa Diyos.” (2 Cor. 10:5) Ang Watch Tower Publications Index gidesinyo sa pagtabang kanato niining bahina.
2 Ang pangunang ulohan alang sa mga reperensiya sa atong pagsangyaw nga buluhaton maoy “Field Ministry.” Ang matag bahin gikobrehan didto, lakip sa atong personal nga tinamdan, mga introduksiyon, pagbuntog sa mga pagtutol, mga pagbalik-duaw, ug mga pagtuon sa Bibliya. Buot ba nimong iilustrar ang usa ka punto uban sa duha ka maayong mga kasinatian? Imong makita ang imong gikinahanglan ubos sa ulohang “Experiences.”
3 Aduna bay mitultol nga ang Bibliya nagakasumpaki sa iyang kaugalingon, tingali misitar sa espisipikong mga bersikulo nga maorag nagasupakay? Ubos sa “Bible Authenticity,” ang mga sub-ulohang “contradictions” ug “harmony” nagpunting sa mga panaghisgot niini nga pagtutol. Ubos sa sub-ulohang “scriptures harmonized,” imong makita ang usa ka talaan sa indibiduwal nga mga bersikulo nga daw nagakasumpaki ug mga reperensiya nga sa tin-aw nagbatbat niana.
4 Sagad angay natong dag-on ang mga pangatarongan sa Trinidad, impiyernong-kalayo, ug pagkadi-mamatay sa kalag. Adunay pangunang mga ulohan alang sa matag usa niini. Ubos sa “Trinity” ug “Immortality of the Soul,” imong makita ang sub-ulohang “scriptures misapplied to support.” Kini motultol kanimo ngadto sa mga panaghisgot sa indibiduwal nga mga teksto. Ang susamang butang makita ubos sa “Hell” uban sa sub-ulohan niining “scriptures misinterpreted.”
5 Nangandoy ka bang makasugod ug panagtuon sa Bibliya? O may usa ka bang walay pag-uswag? Ubos sa ulohang “Bible studies” mao ang sub-ulohang “starting,” “assisting—,” ug “teaching,” ang matag usa dunay mga reperensiya nga motabang kanimo nga makakaplag ug makadumalag mauswagong mga panagtuon sa Bibliya. Aron tabangan ka nga masayod kon kanus-a labing maayo nga ihunong ang usa ka pagtuon, tagda ang sub-ulohang “terminating unfruitful” ug “discontinuing.”
6 Nagtinguha ka ba nga makab-ot ang dugang mga pribilehiyo diha sa ministeryo sa kanataran? Ang mga ulohang “Full-Time Ministry,” “Auxiliary Pioneers,” “Pioneers,” “Missionaries,” ug “Serving Where Need is Greater” motultol kanimo ngadto sa materyal kon sa unsang paagi makab-ot ang maong mga tumong ug ngadto sa mga kasinatiang napahimuslan niadtong nakabuhat na sa ingon.
7 Ang pagtuman sa atong ministeryo sa Gingharian diha sa kanataran modalag dakong katagbawan. (Juan 4:34) Ang Index motabang kanimo samtang ikaw makig-ambit niining makalipayng buluhaton.