Ang mga Presentasyon nga Mopasanong
1 Ang mga presentasyon nga mopasanong mao kadtong nagapakita kon sa unsang paagi ang ulohan nagalangkit sa tagbalay, nga kana maoy butang nga iyang gikinahanglan o magamit. Buligi ang tagbalay nga makaamgo, “Kini nagalangkit kanako.” Sa pag-andam ug presentasyon, kinahanglang suknaon ta ang kaugalingon: ‘Unsang mga ulohan ang nagapabalaka sa katawhan sa akong teritoryo? Unsay ilang mga panginahanglan? Unsaon nako pagpresentar ang mensahe sa pagpakita nga anaa sa hunahuna ni Jehova ang ilang mga panginahanglan?’ Gihan-ay sa ubos ang pipila ka butang nga makapaikag sa katawhan karon. Magamit ba nimo ang usa niini sa imong presentasyon? Matikdi usab kon sa unsang paagi ikasumpay ang mga puntos gikan sa kinabag-ohang Bantayanang Torre.
2 Kabalaka Bahin sa Kakulang sa Kalipay: “Kami nakigsulti sa mga tawo nga nabalaka sa mga suliran sa kinabuhi sa atong komunidad. Daghan ang wala gayod malipay sa ilang bahin sa kinabuhi. Gihunahuna ba nimong posible ang pagbatog usa ka tinuod malipayong kinabuhi? [Tugoting makatubag.] Usa sa mga yawi sa kalipay makaplagan sa Bibliya sa Pinadayag 1:3. [Basaha.] Ang pagsabot kon unsay giingon sa Pinadayag bahin sa umaabot makapalipay kanimo. Matikdi ang usa lang sa mga tagna niini.” Basahang Pinadayag 21:3, 4 ug unya ipunting ang panid 14, parapo 23 sa Abril 1, 1992 nga Bantayanang Torre.
3 Kabalaka Bahin sa Kaugmaon: “Kami nagapaningkamot sa pagpaambit uban sa among mga silingan sa usa ka positibong panglantaw sa kaugmaon. Mao ba kana ang paagi nga gilantaw mo ang kinabuhi? [Tugoting makatubag.] Sumala sa Bibliya, kita adunay katarongan nga magmalaomon kon atong buhaton ang iyang giingon sa Pinadayag 1:3.”
4 Kabalaka Bahin sa Paghupot ug Kahimsog sa Panglawas: “Daghan sa among silingan ang mabalak-on sa paghupot ug kahimsog sa panglawas. Hinuon, bisan pa sa atong pag-amping, mag-antos gihapon ta sa sakit. Buot ba nimong magpuyo sa usa ka kalibotan nga ang matag usa magapahimulos sa hingpit nga kahimsog ug kabaskog? Ang Bibliya nagapakita nga sa di na gayod madugay ang Diyos magatagana niini.” Basaha ang Isaias 35:5, 6 ug unya ipunting ang mga parapo 7 ug 8 sa mga panid 10 ug 11 sa Abril 1 nga Bantayanang Torre mahitungod sa mga tagana sa kinabuhi sulod sa Usa ka Libo ka Tuig nga Pagmando ni Kristo.
5 Kabalaka Bahin sa Polusyon ug Kahimtang-Palibot: “Sa pakigsulti sa atong mga silingan, nakaplagan namong daghan ang nabalaka kon sa unsang paagi ang atong hangin, tubig, ug pagkaon nahugawan. Gihunahuna ba nimong ang mga kagamhanan makaarang gayod sa pagpahunong niini? [Tugoting makatubag.] Makapadasig ang pagmatikod sa Bibliya nga maoy katuyoan sa Diyos alang sa mga maaghop sa paghimo sa yuta nga paraiso, ingon sa gipakita sa Isaias 65:17-25.” Mahimo dayon nimong ipunting sa parapo 11 sa panid 11 sa Abril 1 nga Bantayanang Torre.
6 Samtang tiunay mong panlimbasogan nga maabot ang kasingkasing sa imong mga mamiminaw, kadtong gigutom sa kamatuoran ug pagkamatarong mosanong.—Mat. 5:3, 6.