Mabuhat Mo ba Kana?
1 ‘Buhaton ang unsa?’ mangutana ka. Ang Proverbio 3:27 nagatubag: “Ayawg ihikaw ang kaayohan gikan kanila diin kini gikinahanglan, sa diha nga kini anaa sa gahom sa imong kamot ang pagbuhat niini.” Kana ba “anaa sa gahom sa imong kamot” nga mapalapad ang imong mga kalihokan ug makig-ambit diha sa oksilyare o sa regular payunir nga pag-alagad? Mabuhat mo ba kana?
2 Pagkamakapadasig gayod ang pagbasa sa 1993 Yearbook nga dihay abereds nga 22,205 ka payunir sa Pilipinas, usa ka ratio nga 1 ka payunir sa 5 ka magmamantala. Oo, 3,697 ang misulod sa payunir nga pag-alagad sa miaging tuig. Kini mikabat ug kapin sa 10 ka magmamantala kada adlaw nga nagsusi sa ilang mga kahimtang ug nakakaplag nga sila makabuhat ug labaw pa diha sa ministeryo.
3 Ang pag-oksilyare payunir maoy usa ka bahin sa pagbuhat ug maayo ngadto sa uban. Sa miaging tuig dihay usa ka kinatas-ang 17,009 nga mga oksilyare payunir. Kana maoy ekselente. Daghang magmamantala nagapangitag mga paagi nga makaoksilyare payunir nga mas sagad sa tibuok tuig.
4 Aron pagtino kon ikaw “makabuhat ba niana” o dili, gikinahanglan mong tagdon pag-una ang imong kinasingkasing nga tinguha. (Mat. 22:37-39) Ang Buhat 20:35 nag-ingon: “Adunay labaw nga kalipay diha sa paghatag kay sa anaa sa pagdawat.” Sa walay duhaduha, kadtong nagahatag ug espirituwal nga pag-abag nga mahinatagon gikan sa kasingkasing adunay hustong tinguha. Aron mahimong malamposong magmamantala o payunir, kanang maong tinguha mahinungdanon.
5 Ikaduha, tagda ang imong presenteng mga kahimtang. Mahimo ba nimo ang mga pagpasibo sa imong inadlawng mga kalihokan aron makaalagad nga bug-os panahon? Dili ang tanan makahimo. Apan human sa mainampoong pagsusi sa kaugalingon, kada tuig linibo ang nakakaplag ug paagi sa “pagbuhat niini.” (Col. 4:5) Pananglitan, ang pipila ka pamilya nagapilig tinong mga bulan alang sa pipila o sa tanang membro sa pamilya nga makaoksilyare payunir. Ang ubang mga pamilya nagapaluyo sa usa sa ilang mga membro ingong usa ka regular payunir. Ang imo bang pamilya nagpamalandong niining mga posibilidara?—Tan-awang Proverbio 11:25.
6 Ang pagtabang sa uban nga makahibalo sa kamatuoran mao ang makadalag tiunay nga katagbawan, bisan kon ikaw nagaalagad ingong usa ka magmamantala o ingong usa ka payunir. Kita nasayod nga ang matuod nga kalipay nagasumikad sa pagbuhat ug maayo ngadto sa uban, ilabina kon kana mahitabo nga ‘anaa sa gahom sa imong kamot ang pagbuhat niini.’