Panlimbasogi nga Makapaminaw Gayod ang mga Tawo

¹ Daghang tawo nga atong mahibalag sa atong balaybalay nga ministeryo wala magahunahuna sa espirituwal nga mga butang. Mahimong sila puliki sa ilang kaugalingong mga suliran. Aron makasugod ug panaghisgot, sagad labing maayo ang paghisgot sa mga butang nga gikaikagan sa daghan nianang dapita. Ang mga pangutana magamit aron pagpukaw sa interes. Ang punto-de-bista nga mga pangutana nga dili makapakaulaw sa mga tawo mao ang labing epektibo.

² Mabatonan mo ang mapaminawong tawo pinaagig paggamit sa pagduol nga susama niini:

◼ “Maayong buntag. Ang akong ngalan mao si _____. Nagpuyo ra ko sa duol. Daghan nga akong gikaestorya niining buntaga ang nabalaka bahin sa [hisgoti ang kinabag-ohang balita nga nahitabo sa kasilinganan o butang nga gikabalak-an sa lokal]. Gihunahuna ba nimong gituyo sa Diyos ang kalibotan nga mahisama niini?” Tugoting motubag. Niining puntoha ang tract nga Kinabuhi sa Malinawong Bag-ong Kalibotan mahimong ikapaila. Sa mubo tagda ang ilustrasyon sa panid 1 ug ang impormasyon sa mga parapo 1-3 segon sa itugot sa panahon. Kon napalig-on ang interes, ang librong Mabuhing Walay Kataposan mahimong ikatanyag. Madala mo ang pagtagad ngadto sa Salmo 37:9, 10 ingon sa gikutlo sa panid 157 ug basaha kana diha sa libro. Nga maggamit sa binatid nga hulagway sa mga panid 156-7, isaysay ang matarong nga mga kahimtang nga molungtad sa tibuok yuta sa dihang mahanaw na ang pagkadaotan.

³ Magmaandam kanunay sa pagtanyag sa Ang Bantayanang Torre ug Pagmata! Ang mga tawo bisan diin nabalaka sa pagkahugno sa moral. Samtang basahon mo ang Septiyembre 8 nga Pagmata!, pagpilig pipila ka punto nga gibati mong makapukaw sa interes taliwala sa katawhan sa inyong teritoryo. Sulting positibo mahitungod sa mga kaayohan sa pagsunod sa tambag sa Pulong sa Diyos. Sa ulahi sa bulan, sa dihang magapaila sa Septiyembre 22 nga Pagmata!, dalhang pagtagad ngadto sa usa ka artikulo nga nagapatugbaw sa tambag sa Bibliya sa mga butang nga nakaapektar kanato. Ang kinabag-ohan maingon man ang daandaang mga gula sa Ang Bantayanang Torre ug Pagmata! mahimong ikapaila sa bisan unsang panahon nga dugang pa sa espesyal nga mga adlaw nga gigahin alang sa pagtanyag ug mga magasin.

⁴ Hinumdomi nga ang atong tumong mao ang pagpukaw sa interes sa mensahe sa Gingharian. Aron nga mabuhat kini kinahanglan nga atong kuhaon pag-una ang atensiyon sa tagbalay ug palihokon ang iyang panghunahuna. Kini makatukmod sa samag-karnerong mga tawo nga buot pang maminaw ug dugang mahitungod sa katuyoan ni Jehova alang sa katawhan.​—Sal. 85:8.