Tabangi ang mga Ginatun-an sa Bibliya nga Makapangandam Alang sa Ilang Pagtuon
1 Ang mga estudyante sa Bibliya nga mangandam alang sa ilang pagtuon kada semana sagad mas kusog nga mouswag kay sa niadtong wala magapangandam. Usahay ang usa ka estudyante wala magapangandam kay wala siya mahibalo kon unsaon. Hayan gikinahanglan nga tudloan siya kon unsaon pagpangandam. Sa unsang paagi kini mahimo?
2 Gikan sa sinugdan, paggugol ug pipila ka panahon sa pagseguro nga ang estudyante nakasabot nga ang pagpangandam nagalangkit ug personal nga pagtuon. Daghang tawo ang wala matudloi kon unsaon pagtuon. Ang mga panid 33-43 diha sa Giya sa Tunghaan sa Teokratikanhong Ministeryo nagataganag makatabang nga mga sugyot nga mahimong ikapasa mo ngadto sa estudyante ingon sa gikinahanglan.
3 Ipakita sa Estudyante ang Bili sa Pagtuon: Ipakita sa estudyante ang imong libro ug kon giunsa nimo paglinya ang pangunang mga pulong. Ipakita kaniya kon sa unsang paagi kining tiniman-ang mga bahin makapahinumdom kaniya sa mga puntos nga ikapahayag niya sa iyang kaugalingong mga pulong. Sa ingon dili siya matintal sa pagbasa gikan sa libro sa dihang magatubag. Ang tukmang pagbansay magabulig kaniya sa paghimog maayong mga komento sa ulahi diha sa mga tigom. Ang iyang mga komento magabanaag sa apresasyon alang sa materyal ug magpakita sa kalalom sa iyang pagsabot.
4 Tudloi Siya sa Paggamit sa Bibliya: Ang estudyante gikinahanglang makakat-on kon unsaon pagpangita sa mga kasulatan diha sa tun-anang materyal. Sa dihang makahimo na siya pagbuhat niini nga labawng mahanason, pabilhan niya sa mas bug-os pa nga siya usa gayod ka estudyante sa Bibliya. Bisan pag sa sinugdan tingali siya maanad sa listahan sa mga basahon sa Bibliya diha sa atubangan sa Bibliya, ang estudyante angayng dasigon sa pagkat-on sa pagkasunodsunod sa 66 ka basahon sa Bibliya. Sa dihang siya magabasa ug usa ka teksto sa kasulatan, tabangi siya sa pag-ila sa bahin nga nagasuportar sa punto nga gipunting sa parapo ug dili mapasimang sa mga bahin nga walay laktod nga kalabotan sa pagtuon.
5 Samtang ang estudyante magauswag, dasiga siya sa pagbasa sa Bibliya gikan sa sinugdan ngadto sa kataposan. Ipasiugda nga ang tibuok Bibliya mao ang inspiradong Pulong sa Diyos ug nga ang matuod nga mga Kristohanon kinahanglang mapalagsik sa espirituwal pinaagi niini.—Mat. 4:4; 2 Tim. 3:16, 17.
6 Ipaila ang Ubang Teokratikanhong mga Reperensiya: Sa dihang igo-igo nang miuswag ang estudyante, siya makasugod sa paggamit sa ubang teokratikanhong mga reperensiya. Dasiga siya sa pagpangita ug dugang impormasyon diha sa mga basahon sa Sosyedad nga iyang mailhan samtang magatambong siya sa mga tigom sa kongregasyon. Tudloi siya kon unsaon paggamit ang espesyal nga mga bahin sa New World Translation, sama sa “Bible Words Indexed.” Samtang siya magaugmad sa iyang kaugalingong teokratikanhong librarya, ipakita kaniya kon unsaon paggamit ang Comprehensive Concordance, Nangatarongan Pinasukad sa Kasulatan, ang Index, ug ang Insight nga mga tomo.
7 Kon tudloan nato ang mga ginatun-an sa Bibliya kon unsaon pagpangandam alang sa ilang pagtuon sa Bibliya, kita magasangkap kanila sa padayong pag-uswag sa kamatuoran bisan sa matapos na ang ilang personal nga pagtuon sa Bibliya sa balay.