Padayong Pangagpasa ang Teokratikanhong mga Kalihokan sa Mayo
1 Ang Mayo nagataganag mga kahigayonan sa pagpakig-ambit sa nagkadaiyang mga kalihokan. Daghan ang buot magpahimulos sa bakasyon sa tunghaan ug maayong panahon pinaagig pagpahimulos sa pipila ka lulinghayaw. Bisan pa niana, kita kinahanglang magbantay batok sa pagtugot nga mabalda ang atong naandan teokratikanhong kalihokan.—Filip. 3:16.
2 Kon ikaw may bakanteng panahon, sama sa usa ka bakasyon sa tunghaan, gihunahuna ba nimo ang pagpangab-ot alang sa mas dakong pagpakig-ambit sa ministeryo? Daghan ang nakakaplag niini nga usa ka maayong panahon sa pagpalista ingong oksilyare nga mga payunir. Sagad kini nagbukas sa dalan ngadto sa mas dakong mga pribilehiyo ingong regular nga mga payunir. Ang mga pamilya makasinatig tinuod nga kalipay sa duyog nga paggugol ug bug-os nga mga adlaw diha sa ministeryo. Tungod kay madugaydugay man nga magabii, dugang pa ang makaarang gayod sa pag-ani ug mga kaayohan sa pagpakig-ambit sa magabiing pagsangyaw.
3 Unsa na man ang bahin sa pagtabang sa usa ka kongregasyon nga nanginahanglan ug bulig sa pagkobre sa teritoryo niini? Hayan ang uban sa inyong kongregasyon buot nga moduyog kanimo sa pag-alagad sa usa o duha ka semana sa dapit nga adunay mas dakong panginahanglan. Kon gamay ra ang inyong grupo, tingali ang mga magmamantala sa silingang kongregasyon buot nga mouban kanimo. Kon limitado ang gilay-on nga imong mabiyahe, ang magtatan-aw sa sirkito makarekomendar sa usa ka duol nga kongregasyon nga moapresyar sa imong pag-abag.
4 Nagaplano ka ba ug usa ka bakasyon nga halayo sa balay? Kon mao, nagaplano ka ba sa pagtambong sa mga tigom sa dapit nga imong pagaduawon? Unsa na man ang pagduyog sa pagsangyaw uban sa mga kaigsoonan didto? Ang paglakip niini sa imong bakasyon magantihon kaayo kanimo ug sa uban. (Roma 1:11, 12) Usab, mahimo ba nimo ang impormal nga pagpamatuod samtang ikaw nagabiyahe? Seguroang madala nimo ang imong Bibliya ug usa ka suplay sa basahon. Gamita ang pipila sa imong libreng panahon sa pagbasa ug pagtuon sa Bibliya. Hinumdomi nga bisan pag kinahanglan nato usahay ang usa ka bakasyon gikan sa sekular nga mga pangagpas, dili nato buot nga mobakasyon sa pag-alagad kang Jehova.
5 Ang mga ansiyano angayng magmaalisto sa paghupot nga maayong pagkaorganisar ang mga kalihokan sa kongregasyon. Kon ang bisan kinsang mga ansiyano o ministeryal nga mga alagad molakaway, ang mga kahikayan kinahanglang himoon alang sa uban sa pag-atiman sa ilang mga kaakohan. Ang pagpahibalo kanunay sa nagadumalang magtatan-aw nga abante pa sa mga petsa sa dihang kining mga igsoona mahilayo makatabang kaniya sa paghimog tukmang mga pagpasibo.
6 Oo, ang panahon sa bakasyon mahimong puliki kaayo nga panahon. Apan ang mga kabaldahan dali rang makabungkag sa imong maayong kalihokan sa pag-alagad sa Gingharian. Pahimusli ang imong libreng panahon niining bulana. Tinoa kon unsa ang labing hinungdanong mga butang ug ibutang kana nga una sa imong eskedyol.—Filip. 1:10.