Unsay Imong mga Plano sa Panahong Bakasyon?

Sa dihang maghunahuna kitag panahong bakasyon, mahunahuna nato ang init nga panahon ug mga plano sa kalingawan o malipayong pagbisita sa mga paryente ug mga higala. Sa dihang magahimo sa imong mga plano sa bakasyon, ania ang pipila ka pahinumdom nga hayan makatabang nimo sa pag-una gayod sa intereses sa Gingharian:

◼ Kon ikaw mopanaw alang sa usa ka bakasyon, planohang motambong sa mga tigom diha sa lokal nga kongregasyon ug moambit diha sa ministeryo. Paneguroang itunol ang imong mga taho sa pag-alagad; kon gikinahanglan, ipadala kana sa koreyo ngadto sa inyong sekretaryo sa kongregasyon.

◼ Ang usa ka duaw sa mga paryente kinsa wala sa kamatuoran basin mohatag kanimog kahigayonan sa paghimog di-pormal nga pagpanaksi. Dad-a gayod ang imong Bibliya ug literatura.

◼ Nahunahuna ba nimo ang pagtabang sa duol nga kongregasyon nga nanginahanglag tabang sa pagkobre sa teritoryo niini? Makigsulti sa mga ansiyano o sa magtatan-aw sa sirkito sa pagkuhag impormasyon bahin sa mga panginahanglan sa inyong dapit.

◼ Ang mga bakasyon sa eskuylahan nagataganag maayong kahigayonan alang sa mga batan-on sa pagpalapad sa ilang kalihokan sa pag-alagad. Mga batan-on, kamo ba makapatala ingong mga oksilyare payunir?

◼ Uban ang maayong panahon ug mas taas nga gidugayon sa kahayag sa maadlaw, hayan mahuptan mo ang maayong mga resulta pinaagi sa paghimog dugang pagsangyaw sa magabii sa dihang daghang tawo ang anaa sa balay.

◼ Ang mga ansiyano kinahanglang alisto nga padayong maayong pagkaorganisar ang mga kalihokan sa kongregasyon, hikayon nga may usa nga moatiman sa mga responsabilidad nga gikatudlo kanila kinsa may lakaw.

Hinumdomi nga “ang mga hunahuna sa makugihon nagapadulong ngadto sa pagkadagaya.” (Prov. 21:5) Planoha ang paghimog maalamong paggamit sa imong panahon sa bakasyon.