Unsaon man Nila sa Pagkadungog Gawas kon Kita Mobalik?
1 “Unsaon . . . nila pagkadungog kon walay magwali?” (Roma 10:14) Sa pagkamatuod, unsaon nila sa pagkasabot sa kamatuoran gawas kon maghimo kitag epektibong mga balikduaw? Niining bulana mahimong atong masundal ang atong unang panaghisgot nga dala ang dugang Kasulatanhong mga puntos gikan sa unsa mang brosyur nga atong napahimutang, ug kana hayan motultol ngadto sa usa ka pagtuon sa Bibliya.
2 Kon napahimutang mo ang brosyur nga “Unsa ang Katuyoan sa Kinabuhi?,” mahimong madala mo ngadto sa usa ka pagtuon sa Bibliya niining paagiha. Ikaw makasukna:
◼ “Gusto ba nimo ug sa imong banay sa pagpuyo diha sa kalibotan nga sama niining ilustrasyona sa panid 31 sa brosyur nga akong nabilin kanimo? [Ipakitang ilustrasyon ug tugoting motubag.] Ang tanan kanato nagabaton niining tinguhaa, bisan tuod daghan ang nagaduhaduha kon kini posible ba. Alang sa Diyos, kini dili imposible.” Paklia ngadto sa panid 29 ug basahang Salmo 145:16 gikan sa parapo 1. Ipadayon ang paghisgot sa sunod pipila ka parapo, ug ibutyag ang usa ka pagtuon sa Bibliya. Hikaya ang balikduaw sa di-madugay aron sa pagpadayon sa panaghisgot.
3 Sa dihang mobalik ka human mapahimutang ang brosyur nga “Tinuod Bang May Pagtagad ang Diyos Kanato?,” hayan ang sama niini mahimong epektibo:
◼ “Sa miagi ko nga duaw, nahisgotan ta ang pangutana, Tinuod bang may pagtagad ang Diyos kanato? Sa hunahuna mo nagatagad ba gayod ang Diyos kanato aron taposon ang pag-antos ug kabangis? [Tugoting motubag. Dayon paklia ngadto sa bahin 10 sa maong brosyur sa panid 22, ug padayon.] Nagsaad ang Diyos nga pulihan kining daotang kalibotan uban sa bag-o nga ginapuy-an sa maayong mga tawo kinsa makahimo sa pagpuyo diha sa kalinaw. [Basahang Salmo 37:11.] Ikaw ug ako makatagamtam usab ug kinabuhi nianang bag-ong kalibotan kon nagatuo kita sa Bibliya ug nagapadapat sa tambag niana.” Ipatin-aw ang atong programa sa pagtuon sa Bibliya.
4 Sa dihang mobalikduaw ka human mapahimutang ang brosyur nga “Tan-awa! Ginabag-o Ko ang Tanang Butang,” hayan makasugod ka pinaagig pagpakita sa hulagway nga anaa sa hapin ug unya mosukna sa pangutana:
◼ “Sa hunahuna mo mahasama sa unsa ang pagpuyo diha sa usa ka hingpit nga kalibotan? [Pakomentoha ang tagbalay.] Kon unsa ang makita mo niining hulagwaya dili kay handurawan lamang; kini gipasukad sa tinong mga saad nga gibungat diha sa Bibliya. [Basahang Pinadayag 21:4 ug Salmo 37:11, 29.] Buot kong ipatin-aw kon unsaon mo ug sa imong pamilya ang pagtagamtam niining panalangina.” Kon magpakitag interes ang tagbalay, ipadayon ang panaghisgot, ug itanyag ang pagtuon sa Bibliya.
5 Sa makaplagan ta ang mga tawo nga nagapangita sa kamatuoran, atong ginapakita ang dalisay nga gugma pinaagig pagbalik aron dugang tabangan sila. Ang mga kamatuoran nga gikatugyan kanato magpaluwas diay kanato ug kanila nga nagapatalinghog kanato.—1 Tim. 4:16.