Ang Tibuok Kasulatan Mapuslanon sa Pagpanudlo
1 Ang kaalam sa tambag sa Bibliya dili mahitupngan. Ang moral nga mga sukdanan nga gipasiugda niini dili mahilabwan. Ang mensahe niini kusganon, “arang makaila sa mga hunahuna ug mga tuyo sa kasingkasing.” (Heb. 4:12) Unsaon nato sa pagtabang sa uban nga masabtan ang panginahanglan sa pagsusi pag-ayo niining libroha? Hayan buot nimong sulayan ang mosunod nga mga sugyot sa dihang itanyag ang New World Translation uban ang librong Ang Bibliya—Pulong sa Diyos o sa Tawo? sa Nobyembre.
2 Sanglit daghang tawo ang nabalaka sa pagkab-ot sa ilang sukaranang mga panginahanglan, hayan kining paagiha makakuha sa ilang pagtagad:
◼ “Daghang tawo nga akong gikasulti karong mga adlawa ang nabalaka bahin sa ilang pagkab-ot sa pinansiyal nga mga obligasyon. Kinsa sa imong hunahuna ang makahatag kanato sa labing maayong tambag niining mga butanga? [Tugoting motubag.] Akong nakaplagang ang Bibliya nagatanyag ug praktikal nga tambag nga makatabang kanato sa paglikay sa wala-kinahanglanang mga problema. Tugoting ipakita ko kanimo ang usa ka ehemplo.” Paklia ang panid 163 sa librong Ang Bibliya—Pulong sa Diyos o sa Tawo? ug basaha ang 1 Timoteo 6:9, 10, nga gikutlo sa parapo 3.
3 Ania ang laing sugyot nga hayan imong magamit:
◼ “Sa matag higayon nga atong mabasa ang pamantalaan o maminaw sa mga balita atong madunggan ang laing problema nga makapabalaka kanato. [Hisgoti ang pipila ka makapatugaw nga hitabo nga bag-o pang gibalita.] Unsaon nato sa pagsagubang sa mga problema nga sama niini? [Tugoting motubag.] Niadtong 1983, ang presidente sa Tinipong Bansa miingon nga ang Bibliya naundan sa labing bantogang mensahe nga nasulat sukad ug nga ‘sulod sa mga panid niini anaa ang tanang tubag sa tanang problema nga sukad nahibaloan sa tawo.’ Kini nagapahinumdom kanato kon unsa ang giingon sa Bibliya. [Basaha ang 2 Timoteo 3:16, 17.] Tugoti ko nga ipakita kanimo kon nganong makasalig kita sa Bibliya.” Ipakita ang pipila ka puntos gikan sa Kapitulo 1 sa libro ug itanyag kana.
4 Kon adunay daghang di-relihiyoso nga mga tawo sa inyong teritoryo, hayan imong sulayan kining paagiha:
◼ “Daghang tawo dinhing dapita ang nagaisip sa Bibliya nga nagakasumpaki ug usa ka sugilambong lamang. Ilang nakita ang daghan kaayong daotang mga butang nga nahimo sa ngalan sa relihiyon mao nga dili na sila mosalig sa Bibliya. Sa pagkamatuod, nagakadaghang tawo ang nahibulong kon ang Bibliya Pulong ba sa Diyos o sa tawo. Unsa ang imong opinyon?” Tugoting motubag. Depende sa sanong sa tagbalay, paklia ngadto sa usa ka bahin sa librong Ang Bibliya—Pulong sa Diyos o sa Tawo? nga nagahisgot sa maong pagsupak o panghunahuna sa tagbalay, ug hisgoti ang usa o duha ka puntos. Pananglitan, hayan makahigayon ka sa paggamit sa mga parapo 27-9, magsugod sa panid 66 ilalom sa sub-ulohang “Si Jesus—Usa ka Matuod nga Persona.”
5 Ang pagtabang sa uban sa pagpabili sa tinuod nga kahinungdanon sa Bibliya maoy usa sa labing maayong mga butang nga atong mahimo sa pagbulig kanila; kini makaluwas sa ilang mga kinabuhi.—Prov. 1:32, 33.