Pangandam ug Tagamtama ang mga Tigom sa Kongregasyon
1 Ingong kapunongan sa mga igsoon, kita maalamong nagatigom nga makanunayon sa atong senemanang mga tigom. (1 Tim. 4:15, 16) Unsaon nato sa pagtagamtam ug pagkuha sa kinalabwang benepisyo gikan niini?
2 Ang panahon kinahanglang igahin sa regular nga paagi alang sa pagpangandam sa mga tigom. Bisan unsa pa kita ka puliki, maoy maalamon sa pagkaplag ug pipila ka panahon sa pagpangandam sa mga tigom. Ang pagpangandam nga tingob ingong usa ka pamilya ilabinang makaayo.—Efe. 5:15, 16.
3 Alang sa Tunghaan sa Teokratikanhong Ministeryo: Panlimbasogi nga makanunot sa eskedyul sa senemanang pagbasa sa Bibliya. (Jos. 1:8) Repasoha ang materyal nga pagahisgotan, ug dal-a ang gikinahanglang mga publikasyon aron imong masundan ang mga mamumulong.
4 Alang sa Tigom sa Pag-alagad: Tan-awa ang tanang programa nga gilaraw diha sa Atong Ministeryo sa Gingharian. Basaha ang mga artikulo nga pagahisgotan. Kon ang materyal gikan sa Bantayanang Torre maoy pagatagdon, subaya kana ug basaha usab. Kon ang mga presentasyon sa pag-alagad sa kanataran ipasundayag, repasoha kini sa abante aron nga ikaw andam sa paggamit niini sa imong ministeryo.
5 Alang sa Pagtuon sa Bantayanang Torre: Basaha sa bug-os ang tun-anan nga abante, nga nagamatikod sa mga tubag sa mga pangutana. Tan-awa ang gisitar nga mga teksto. Palandonga kon sa unsang paagi ang ginatun-an mohaom sa imo nang nasayran daan. Andama ang mugbong mga komento sa usa o duha ka parapo. Kini maoy hinungdanong paagi sa paghimog “pagpahayag sa dayag bahin sa atong paglaom.”—Heb. 10:23.
6 Alang sa Pagtuon sa Libro sa Kongregasyon: Una, subaya ang materyal; tagda ang ulohan sa kapitulo ug mga ubos nga ulohan. Matikdi ang yawing mga ideya. Repasoha ang nagsuportar nga mga bersikulo sa Bibliya. Sulayi sa pagtubag ang mga pangutana sa imong kaugalingong mga pulong. Unya repasoha ang tun-anan sa imong hunahuna.—2 Tim. 2:15.
7 Tagamtama ang mga Tigom: Sa pagtagamtam sa mga tigom nga bug-os, hinungdanon ang pagkatukma sa panahon aron makaambit sa unang awit ug pag-ampo, nga nagahangyo alang sa espiritu ni Jehova. Kon ikaw walay gagmayng kabataang atimanon, lagmit mas maayo alang kanimo nga molingkod duol sa atubangan sa plataporma diin diyutay ra ang mga kabaldahan. Ang mga ginikanan kinsa adunay gagmayng kabataan nga hayan kinahanglang dalhon sa gawas panahon sa panagkatigom makapamenos sa kabaldahan pinaagi sa paglingkod duol sa agianan o sa likod nga bahin.
8 Sulaying makapahulay sa dili pa motambong aron padayon kang nagamata ug alisto. Ang pagpangita sa mga Kasulatan nga ginabasa makatabang nimo sa paghinumdom kon unsa ang imong napatalinghogan. Pakigsulti sa imong pamilya ug mga higala bahin sa imong nakat-onan. Ang pagpadapat niining mga sugyota makahimo sa mga tigom nga mas makalilipay, ug tinuod gayod kining “magpasibot [kanato] sa paghigugma ug sa maayong mga buhat.”—Heb. 10:24, 25.