Balika Aron Luwason ang Pipila
1 Maoy kabubut-on sa Diyos “nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Tim. 2:4) Unsay atong mahimo aron sa pagtabang? Maghimog mga balikduaw uban sa tumong sa pagtudlo sa kamatuoran. Unsa may imong isulti? Ang mosunod nga mga sugyot hayan makabulig kanimo.
2 Kon imong nabilin ang librong “Pagpangita sa Katawhan sa Diyos,” mahimong ipadayon mo ang panaghisgot pinaagig pag-ingon:
◼ “Sa akong ulahing duaw nahisgotan ta ang lima ka pangutana nga mobulig kanato sa pagsusi kon ang atong relihiyon gipasukad ba sa Bibliya. Nakahigayon ka ba sa pagtino niini? [Tugoting motubag.] Sanglit ikaw puliki man kaayo, tingali imong makuha ang imong libro ug atong tan-awon ang unang pangutana sa panid 17.” Dayon ipatin-aw kon unsa ang giingon sa Bibliya bahin sa kalag, nga nagagamit sa Genesis 2:7 ug Ezekiel 18:4. Kon ang tagbalay nagapakitag interes, hikayang mobalik sa sunod semana ug padayonon ang inyong panaghisgot.
3 Ania ang laing sugyot nga basin gusto mong sulayan:
◼ “Sa miagi naghisgot ta sa usa sa mga timailhan sa matuod nga relihiyon. Mahinumdoman ba nimo kon unsa kadto? [Tugoting motubag ang tagbalay.] Karon ania ang laing timailhan, nga gihisgotan sa Juan 13:34, 35. [Basaha.] Sa hunahuna mo ang tanan bang relihiyon nagapakita niining matanga sa gugma sa usag usa? Ang libro nga akong nabilin kanimo nagahisgot niini gayong ulohana diha sa kapitulo 15, dinhi sa panid 344. Gusto ko nga ipakita ang pipila ka puntos nga akong napahimuslan nianang kapituloha.” Hisgoti ang pipila ka parapo ug unya hikaya ang umaabot nga panaghisgot.
4 Sa dihang moduaw sa usa nga midawat sa librong “Matuod nga Kalinaw ug Kasegurohan—Sa Unsang Paagi Imong Makaplagan?” hayan ipunting mo pag-usab ngadto sa ilustrasyon sa panid 4 ug suknaon ang tagbalay:
◼ “Human sa dugang pagsusi sa libro nga akong nabilin kanimo ug sa pagpalandong sa saad sa Diyos sa usa ka paraisong yuta, unsa ang imong pagbati maylabot niining kahibulongang mga saad nga gihimo sa Diyos alang sa katawhan?” Human tagda ang sanong sa tagbalay ug sa pagkomentog mubo niana, mahimong ipatagad mo ang mga kapitulo 2 ug 3 ug isugyot nga tagdon kon nganong ang mga panlimbasog sa tawo alang sa kalinaw ug kasegurohan, apil nianang iya sa kahimtang relihiyoso, nangapakyas.
5 Hinumdomi nga ang tumong sa paghimog mga balikduaw mao ang pagsugod ug mga pagtuon sa Bibliya. Mahimong masugdan ang usa ka pagtuon diha sa bisan unsang kapitulo sa librong Pagpangita sa Diyos, apan sa kasagaran buot natong tultolan sila ngadto sa mga kapitulo 15 ug 16. Unya, human sa pipila ka pagtuon, hayan gusto natong dad-on ang pagtagad ngadto sa usa ka librong tun-anan nga nagahisgot sa pasukaranang mga doktrina. Atong makaplagan ang dakong kalipay samtang kadtong nagatuon makakat-on sa pagtawag kang Jehova alang sa kaluwasan.—Buh. 2:21.