Padayong Isulti ang Kamatuoran
1 Ang mga apostol mipahayag: “Dili kami makahunong sa pagsulti sa mga butang nga among nakita ug nadungog.” (Buh. 4:20) Karon kita adunay daghang literatura sa Bibliya nga magamit sa atong ministeryo, apan kinahanglan usab nga padayon kitang mosulti sa kamatuoran. Ania ang pipila ka paagi sa paghimo niini samtang atong balikduawon kadtong midawat sa bag-ong mga isyu.
2 Sa dihang balikon ang napahiluna nga espesyal Abril nga “Pagmata!” uban ang ulohan niining “Sa Dihang ang mga Gubat Mawala Na,” hayan ikaw makaingon:
◼ “Sa miagi, atong nahisgotan ang bahin sa mga gubat ug pag-apil sa mga relihiyon niana. Imo bang naamgohan nga ang maong mga hitabo nagapamatuod nga kita nagakinabuhi sa kataposang mga adlaw? [Ipakita ang librong Kahibalo. Basaha ang unang parapo sa kapitulo 11, ug ipakita ang kahon sa panid 102.] Kining libroha nagasaysay niining ulohana ug sa 18 uban pa nga gilista dinhi sa mga kaundan. [Ipakitang panid 3.] Buot kong ipakita kon sa unsang paagi kining libroha makatabang kanimo.” Kon tugotan, sugdi ang pagtuon sa panid 6.
3 Kon inyong nahisgotan ang bahin sa usa ka segurong kinabuhi diha sa Mayo 15 “Bantayanang Torre” sa imong unang duaw, tingali imong masulti ang sama niini:
◼ “Sa una natong panagtagbo, gibasa nato ang usa ka teksto gikan sa Bibliya nga nagahatag kanatog paglaom sa kaugmaon. Karong adlawa buot kong isaysay kon kinsa ang arang makahatag kanatog usa ka pagbati sa kasegurohan sa pagkakaron.” Basahang Salmo 4:8. Paklia ang librong Kahibalo sa panid 168 ug basaha ang parapo 19. Unya mosukna: “Malipay ka bang makabaton ug usa ka libreng pagtuon sa Bibliya aron kaplagon kining matanga sa kasegurohan sa imong kinabuhi?” Kon ang tubag maoy oo, paklia sa kapitulo 1.
4 Kon inyong nahisgotan ang Mayo 22 nga “Pagmata!” bahin sa panaghigala sa imong unang duaw, tingali imong masulti ang mosunod sa imong balikduaw:
◼ “Sa miagi atong nahisgotan kon sa unsang paagi atong mahuptan ang maayong mga higala. Apan unsay mahitabo sa dihang adunay motunghang mga di-pagsinabtanay? Kini ba magtapos sa panaghigalaay? [Tugoting motubag.] Sa artikulong gihisgotan ta sa miaging semana, adunay usa ka bahin maylabot sa ‘Sa Dihang Motungha ang mga Problema.’ Mahimo bang kuhaon nimo ang imong kopya palihog?” Hisgoti ang artikulo sa mubo ug basahang Efeso 4:26. Unya dad-a ngadto sa panaghisgot sa librong Kahibalo, tingali maggamit sa mga puntos sa panid 166.
5 Makahimo kag usa ka diretsong pagtanyag ug usa ka pagtuon diha sa pagbalikduaw pinaagi sa pag-ingon:
◼ “Among gipanagtag ang among mga magasin sa pagpahibalo sa katawhan kon unsa ang ginatudlo sa Bibliya. Kon mopabili ang katawhan kon unsay ilang makat-onan, kami nagatanyag ug usa ka libreng pagtuon sa Bibliya sa balay. [Ipunting sa kahong ‘Buot ba Nimong Duawon?’ diha sa likod nga hapin sa Ang Bantayanang Torre.] Ginagamit namo kining libroha, Kahibalo nga Motultol sa Kinabuhing Walay Kataposan, ingong usa ka giya. Tugoti kong ipakita kanimo kon unsaon sa pagdumala ang usa ka pagtuon.”
6 Kon padayon kitang mosulti sa kamatuoran, kita makapanegurong adunay pipila kinsa maminaw ug mosanong nga mauyonon.—Mar. 4:20.