Isilsil sa Uban ang Paglaom sa Kinabuhing Walay Kataposan
1 Bisan tuod ang tawo nanukidukig mga pamaagi sa pagpahinay sa proseso sa pagkatigulang ug lugwayan ang iyang gitas-on sa kinabuhi, sa gihapon ang pagkatigulang ug kamatayon dili kapugngan. Pagkamapasalamaton ta nga ang Bibliya nagasaysay kon nganong ang mga tawo matigulang ug mamatay, maingon man kon sa unsang paagi ang malaglagong epekto sa pagkatigulang mabali ug ang kamatayon mahanaw. Kining mga kamatuorana makapakombinsir nga gipresentar sa librong Kahibalo nga Motultol sa Kinabuhing Walay Kataposan. Tin-aw nga gitubag sa libro ang makapalibog nga mga pangutana bahin sa kinabuhi ug kamatayon, nga nagatultol sa magbabasa ngadto sa panahon sa dihang ang Paraiso mapasig-uli.
2 Sa Marso atong itanyag ang Kahibalo nga libro uban ang tumong nga makasugod ug mga pagtuon sa Bibliya sa balay. (Mat. 28:19, 20) Dayon atong balikduawon ang tanan niadtong kinsa nagapakitag interes sa mensahe sa Gingharian. Niining paagiha atong ikasilsil sa uban ang paglaom sa kinabuhing walay kataposan. (Tito 1:2) Sa pagpalampos niini, imong makaplagan ang mosunod nga mga sugyot nga makatabang.
3 Sa unang pagduaw, ikaw makasukna niining pangutanaha:
◼ “Nahibulong ka na ba kon nganong ang mga tawo nangandoy sa mas taas nga kinabuhi? [Tugoting motubag.] Ang mga Budhista, mga Kristohanon, mga Hindu, mga Muslim, ug uban pa tanan adunay paglaom sa usa ka kinabuhi human sa kamatayon.” Buksi ang Kahibalo nga libro sa kapitulo 6, “Nganong Kita Matigulang ug Mamatay?,” ug basaha ang parapo 3. Pangatarongan sa gisitar nga mga kasulatan. Nga magtumong sa duha ka pangutana sa kataposan sa parapo, suknaa ang tagbalay kon buot ba niyang makita ang mga tubag sa iyang kaugalingon. Kon matinguhaon siya niana, ipadayon ang paghisgot sa mosunod pipila ka parapo. Ang usa ka pagtuon nasugdan! Kon dili, ibilin ang libro aron iyang mabasa, ug planoha ang pagbalik, nga gipalabing sulod sa usa o duha ka adlaw, aron mahisgotan ang mga tubag.
4 Sa dihang magpaloap sa napahimutang nga “Kahibalo” nga libro, ikaw makaingon:
◼ “Mibalik ako aron tagdon ang duha ka pangutana bahin sa kamatayon nga atong gibiyaang wala matubag.” Pahinumdomi ang tagbalay sa mga pangutana. Dayon saysayi sa impormasyon sa kapitulo 6 ilalom sa sub-ulohang “Usa ka Daotang Plano.” Mag-agad sa mga kahimtang, mahimong padayonon ang pagtuon o gamita ang kataposang pangutana sa tumoy sa parapo 7 aron ipahimutang ang pundasyon sa sunod nga sesyon. Paghimog tinong mga plano sa pagbalik. Hatagig handbill ang tagbalay, ug sa mubo ilarawan kon sa unsang paagi ginahimo ang mga tigom sa kongregasyon. Sa kamainiton dapita siya sa pagtambong.
5 Magkobre man sa mga pultahan o sa di-pormal nga pagsangyaw, ikaw makasugod ug panaghisgot sa pag-ingon:
◼ “Nahibulong ka na ba kon unsay anaa sa umaabot alang kanato ug sa yuta? [Tugoting motubag.] Ang Bibliya nagsuma sa umaabot sa usa ka pulong—Paraiso! Kini nagsaysay nga sa sinugdanan, ang Diyos naghimo sa usa ka bahin sa yuta ngadto sa usa ka matahom nga paraiso diin iyang gibutang ang tawhanong magtiayon nga iyang gilalang. Ilang pagapun-on ang tibuok yuta, nga sa hinayhinay magbag-o niana ngadto sa usa ka paraiso. Matikdi kining paghubit kon mahisama gayod kini sa unsa.” Buksi ang Kahibalo nga libro sa panid 8, ug basaha ang parapo 9, ilalom sa sub-ulohang “Kinabuhi sa Paraiso.” Dayon isaysay ang mga puntos diha sa parapo 10, ug basaha ang gisitar nga kasulatan, Isaias 55:10, 11. Aghata nga ipadayon ang panaghisgot kon mahisama sa unsa ang kinabuhi sa napasig-uling Paraiso ug sa duyog nga pagkobre sa mga parapo 11-16. O dasiga ang tawo sa pagbasa niana sa iyang kaugalingon, ug hikaya nga magkatagbo pag-usab ug hisgotan kana.
6 Kon ang pagtuon wala kasugdi sa sinugdan, masulayan mo ang pagbuhat sa ingon sa pagbalikduaw pinaagi sa pag-ingon:
◼ “Ingon sa nahisgotan ta sa atong ulahing panaghisgot, maoy katuyoan sa Diyos nga ang tibuok yuta mausab ngadto sa usa ka paraiso. Kana magpatunghag pangutana, Mahisama sa unsa ang Paraiso?” Buksi ang Kahibalo nga libro sa kapitulo 1, ug tun-i ang mga parapo 11-16, ilalom sa sub-ulohang “Kinabuhi sa Napasig-uling Paraiso.” Human niana ipakita ang ilustrasyon sa mga panid 4-5, ug suknaa ang tawo kon buot ba niyang magkinabuhi sa maong matahom nga mga palibot. Dayon basaha ang unang tudlingpulong sa parapo 17 sa panid 10. Mag-agad sa mga kahimtang, mahimong ipadayon ang pagtuon o ingna nga sa imong sunod duaw imong isaysay kon unsay gikinahanglan aron ang usa mabuhi sa napasig-uling Paraiso. Bilini ug handbill, isaysay ang eskedyul sa tigom, ug mainitong dapita ang tawo sa pagtambong sa Kingdom Hall.
7 Ang Kahibalo nga libro maoy ekselenteng himan nga magamit sa pagbutyag ngadto sa uban sa “walay kataposang kinabuhi” nga gisaad sa Diyos. Ang imong pagdumalag mga pagtuon sa Bibliya sa balay uban sa mga tawo makasilsil diha kanila niining dakong paglaom nga gidasig sa Diyos “si kinsa dili makabakak.”