Tabangi Sila nga Makaalagad Pag-usab
1 Ang apostol nga si Pablo nagsulat sa iyang kaubang mga Kristohanon: “Maoy takna na aron kamo momata gikan sa pagkatulog, kay karon ang atong kaluwasan mas duol kay sa dihang kita nahimong mga magtutuo.” (Roma 13:11) Si Pablo nabalaka sa iyang mga igsoon kinsa nagduka sa espirituwal; siya matinguhaon sa pagpukaw kanila alang sa napauswag nga kalihokan.
2 Mahimo gayong ikaingon nga ang kagabhion niining daang kalibotan lawom na kaayo ug ang banagbanag sa bag-ong kalibotan duol na kaayo. (Roma 13:12) Aduna kita ing maayong katarongan nga mabalaka bahin sa atong mga igsoon kinsa miundang na sa pagpakig-uban kanato ingong mga magwawali sa maayong balita. Sa miaging tuig sa pag-alagad, sa Pilipinas lamang, labaw sa 3,000 ka magmamantala ang nahimong aktibo pag-usab. Sa unsang paagi makatabang kita sa ubang mga di-aktibo sa pag-alagad kang Jehova pag-usab?
3 Kon Unsay Mahimo sa mga Ansiyano: Kadaghanan sa mga di-aktibo wala magsalikway sa kamatuoran; sila mihunong lamang sa pagsangyaw tungod sa pagkaluya, personal nga mga problema, materyalismo, o mga kabalaka sa kinabuhi. (Luc. 21:34-36) Kon maarangan, mas maayo ang pagtabang kanila sa dili pa sila mahimong di-aktibo. Ang sekretaryo sa kongregasyon angayng magpahibalo sa konduktor sa Pagtuon sa Libro sa Kongregasyon sa dihang ang usa ka magmamantala mahimong di-regular sa pag-alagad. Ang pagpalig-on nga duaw pagahimoon. Ang mga ansiyano kinahanglang motino sa hinungdan sa problema ug kon sa unsang paagi ang tabang mahimo.—Tan-awang Septiyembre 15, 1993, Bantayanang Torre, mga panid 20-3.
4 Kon sa Unsang Paagi Makatabang ang Uban: Kadaghanan nato adunay nailhan kinsa nahimong di-aktibo. Tingali usa ka tawong suod natong higala kaniadto. Unsay mahimo ta sa pagtabang? Nganong dili mohapit sa mubong pagduaw. Sultihi siyang gimingaw ka sa iyang pakig-uban. Magmahigalaon ug positibo. Ipadayag ang imong kabalaka nga walay pagpasabot nga siya masakiton sa espirituwal. Isaysay ang makapadasig nga mga kasinatian diha sa kongregasyon. Itanyag nga magkuyog mo ngadto sa mga tigom. Pahibaloa ang mga ansiyano sa sanong nga imong nadawat.
5 Sa dihang ang di-aktibo motambong sa mga tigom, lagmit bation niyang bakikaw sa dihang mahibalag ang uban nga iyang nailhan sa miagi. Ayaw siyag suknaa, “Diin ka man mipaingon?” Hinunoa, pabatia siyang giabiabi. Ilangkit siya sa panaghisgot. Ipailaila siya ngadto kanilang wala niya mailhi. Tupari siya sa paglingkod sa panahon sa tigom, paneguroang aduna siyay songbok ug materyal nga pagatun-an. Dasiga siyang mobalik, ug itanyag ang imong tabang.
6 Tungod sa pagbaton ug mainitong pagbati alang kanilang nahisalaag, si Jehova ug si Jesus magamaya sa dihang kining maong mga tawo mapasig-uli sa espirituwal. (Mal. 3:7; Mat. 18:12-14) Atong matagamtam ang samang kangaya kon kita magmalamposon sa pagtabang sa uban nga moalagad kang Jehova pag-usab.