Pagdumalag Mauswagong mga Pagtuon sa Bibliya Sa Balay
1 Unsay gikausahan sa usa ka nars sa Tanzania, usa ka batan-on sa Argentina, ug usa ka inahan sa Latvia? Ang 1997 Yearbook (p. 8, 46, ug 56) nagtaho nga ang tulo nakahimog kusog nga pag-uswag sa ilang mga pagtuon sa Bibliya sa balay, tungod sa ilang pagkaandam sa pagtuon dili lang kas-a sa matag semana diha sa librong Kahibalo. Girekomendar nga kon mahimo, ang mga magmamantala maningkamot sa paghisgot ug usa ka kapitulo sa libro sa panahon sa matag pagtuon. Ugaling, ang pipila nakakaplag nga lisod kanang buhaton. Bisan tuod mag-agad ug dako sa mga kahimtang ug sa katakos sa matag estudyante, ang may kasinatiang mga magtutudlo nakakaplag ug kalamposan sa pagpadapat sa mosunod nga mga sugyot.
2 Ingon sa gipatin-aw sa pasukip sa Hunyo 1996 nga Atong Ministeryo sa Gingharian, kinahanglang bansayon ang imong mga estudyante sa pagpangandam alang sa pagtuon. Sa pagsugod pa lamang, maayong ipatin-aw ug ipasundayag kon sa unsang paagi kini himoon. Ipakita kanila ang imong personal nga kopya sa librong Kahibalo. Duyog nga andama ang unang leksiyon. Tabangi ang mga estudyante nga makita ang yawing mga pulong o mga prase nga direktang nagtubag sa pinatik nga pangutana ug dayon linyahe o timan-i kini. Ang pipila ka magmamantala naghatag pa gani sa ilang mga estudyante ug igtitimaan nga magamit. Dasiga sila nga tan-awon ang tanang kasulatan samtang sila mangandam sa pagtuon. Sa pagbuhat niini, ikaw magabansay usab kanila sa pagpangandam sa pagtambong sa Pagtuon sa Libro sa Kongregasyon ug sa Pagtuon sa Bantayanang Torre.—Luc. 6:40.
3 Ang maayong magtutudlo magpalihok sa estudyante nga mopahayag ug dili kaayo mosultig daghan sa iyang kaugalingon. Likayan niya nga mahitipas sa gagmayng mga punto. Talagsa ra siyang molakbit ug dugang materyal. Hinunoa, iyang ipasiugda ang pangunang mga punto sa leksiyon. Ang pipila nagtagana sa mga estudyante ug dugang literatura aron tabangan sila nga makaplagan ang mga tubag sa mga pangutana. Dugang pa, ang mga interesado makadawat ug dugang detalyadong impormasyon pinaagi sa pagtambong sa mga tigom.
4 Mahimong dili kinahanglanon nga tan-awon ang tanang gisitar nga kasulatan diha sa leksiyon. Ang pipila ka pangunang mga punto mahimong ikapatin-aw gikan sa gikutlong mga teksto sa parapo. Sa panahon sa pagrepaso, ipasiugda ang pangunang kasulatan nga gihisgotan ug dasiga ang estudyante nga hinumdoman kini.
5 Unsa ka Dugay ang Matag Sesyon?: Ang pagtuon dili kinahanglang limitado sa usa ka oras. Ang pipila ka tagbalay may libreng panahon ug tingali nagtinguha ug taastaas nga pagtuon. O tingalig buot sa estudyante ang pagtuon nga dili lang kas-a sa usa ka semana. Kini mapuslanon niadtong makahimo niana.
6 Ingon sa gihulagway sa Isaias 60:8, karong adlawa gatosan ka linibo ka bag-ong mga magdadayeg kang Jehova ang “nanglupad ingon sa panganod, ug ingon sa mga salampati ngadto sa ilang mga tamboanan” diha sa mga kongregasyon sa iyang katawhan. Tugoting ang tanan kanato magabuhat sa atong bahin sa pagbuhat nga suod duyog kang Jehova samtang iyang ginapadali ang pagpanigom sa mga karnerohon.—Isa. 60:22.