Tabangi ang Uban sa Pagkaplag ug Kahupayan
1 Gikapoyan na ang daghang tawo sa pagpaminaw bahin sa mga katalagman, mga gubat, krimen, ug pag-antos. Ang kahupayan, bisan tuod di-makaplagan sa mga balita karong adlawa, maoy butang nga gikinahanglan gayod sa katawhan. Ang paghupay nagakahulogang “paghatag ug kusog ug paglaom ngadto sa” ug “pagpuypoy sa kaguol o kasamok sa” uban. Ingong mga Saksi ni Jehova, kita nasangkapan sa pagtabang sa mga tawo niining paagiha. (2 Cor. 1:3, 4) Ang atong pinasukad-sa-Bibliyang mga brosyur nga atong itanyag sa Hulyo ug Agosto nasudlan sa makapahupay nga mga mensahe sa kamatuoran. (Roma 15:4) Aniay pipila ka sugyot sa pagpresentar niini ilalom sa nagkalainlaing mga kahimtang:
2 Ang makapasubong balita makalalang ug kahigayonan sa paghatag ug pamatuod ug magdalag kahupayan sa uban, hayan pinaagi sa imong pag-ingon ug sama niini:
◼ “Sa dihang mahitabo ang maong mga butang, ang pipila mahibulong kon tinuod bang naglungtad ang Diyos ug, kon siya naglungtad man, siya ba nagatagad kanato. Unsay imong hunahuna? [Tugoting motubag.] Usa ka paagi sa pagtino kon anaa bay Diyos mao ang pag-aplikar sa naandan kaayong prinsipyo.” Basaha ang Hebreohanon 3:4. Ipunting ang ubang mga butang palibot kanato nga tin-awng nanginahanglag magbubuhat. Unya ipadayon: “Ako adunay usa ka brosyur nga nasayod akong imong makaplagang makapahupay. Nag-ulohan kinig Tinuod Bang May Pagtagad ang Diyos Kanato? [Basaha ang mga pangutana sa hapin.] Nasudlan kini sa makapakombinsir nga pamatuod dili lamang nga ang Diyos naglungtad kondili nga siya sa dili madugay magtapos sa tanang di-maayong mga kahimtang nga atong giatubang karong adlawa. Buot ba nimong basahon kini?” Hikaya nga mobalik.
3 Sa pagbalikduaw, ikaw hayan makaingon:
◼ “Naghisgot kita bahin sa pamatuod sa paglungtad sa Diyos sa dihang akong gibilin ang brosyur nga Tinuod Bang May Pagtagad ang Diyos Kanato? Tingali imong namatikdan kining puntoha diha sa panid 7. [Ipakita ang larawan ug sumaha ang parapo 15.] Usa lamang kini ka pananglitan nga nagpakita nga ang usa ka matinagdanong Diyos nagalungtad gayod. [Basaha ang parapo 27 sa panid 9.] Ang usa ka personal nga pagtuon sa Bibliya nakatabang kanako sa pagsagubang sa matag adlawng mga suliran sanglit kini nagahatag sa panglantaw sa Diyos sa mga butang.” Itanyag nga ipasundayag ang usa ka pagtuon.
4 Ang telepono nga pagsangyaw mahimo man ginamit ang brosyur nga “Unsa ang Katuyoan sa Kinabuhi—Sa Unsang Paagi Makaplagan Nimo Kini?” Imong ikapailaila ang kaugalingon ug moingon:
◼ “Mitawag ako kanimo uban ang mahinungdanong mensahe sanglit dili ako makaanha sa pagpakigkita kanimo sa personal.” Basaha ang unang parapo sa panid 4 sa brosyur, nga magabasa niana sa natural nga paagi, nga samag nakigsulti ka sa personal uban sa indibiduwal. Suknaa siya kon unsay iyang panghunahuna, ug tugoting motubag. “Bukas ang akong Bibliya sa Isaias 45:18. Kining bersikuloha nagapakita nga ang yuta gilalang nga kita ang anaa sa hunahuna. Mahimo bang basahon ko kini kanimo?” Human niana, isaysay ang katuyoan sa brosyur, ug suknaa kon unsaon nga imong ikahatod ang usa ka kopya.
5 Sa pagtawag ug balik, hayan masulayan mo kining paagiha aron masugdan ang pagtuon:
◼ “Buot kong ipadayon ang atong ulahing panaghisgot pinaagig pagpakita kon kinsa ang makasulti kanato sa katuyoan sa kinabuhi. [Ibatbat sa ubay-ubayng pulong ang mga parapo 1 ug 2 sa panid 6 diha sa Katuyoan sa Kinabuhi nga brosyur.] Ang Pinadayag 4:11 nagasaysay nga si Jehova nga Diyos mao ang atong Maglalalang. [Basaha.] Aduna gayod siyay katarongan sa paglalang kanato. Ang mga tawong buot masayod kon unsa kanang katarongana nagtuon sa sinulat nga Pulong sa Diyos, ang Bibliya. Gusto ko nga itanyag kanimo ang maong kahigayonan.” Isaysay kon sa unsang paagi gidumala ang atong libreng kurso sa pagtuon sa Bibliya sa balay ug paghimog mga kahikayan aron masugdan ang pagtuon.
6 Kining positibong paagi hayan makapahupay niadtong kinsa nakasinati sa kamatayon sa usa ka minahal:
◼ “Nagahimo akog serbisyo publiko alang sa tanan kinsa nawad-ag usa ka minahal diha sa kamatayon. Sanglit mahimong usa kini sa malisod kaayong mga butang nga sagubangon gayod ni bisan kinsa kanato, kining brosyura nga Sa Dihang ang Imong Minahal Mamatay giandam. Nakatabang na kinig milyonmilyong tawo. Buot kong ipakita kanimo kon unsay giingon niini bahin sa makapalipayng saad nga gihimo ni Jesu-Kristo. [Basaha ang ikalimang parapo sa panid 26, lakip na ang Juan 5:21, 28, 29.] Matikdi kining larawan sa panid 29 nga naghulagway sa asoy sa Ebanghelyo ni Jesus nga aktuwal nga nagbanhaw kang Lazaro gikan sa mga patay. Kon buot kang mobasa niining makapahupay nga brosyur, malipay akong ibilin kini kanimo.”
7 Sa imong pagbalik, ikapakita mo pag-usab ang larawan sa panid 29 sa brosyur nga “Sa Dihang ang Imong Minahal Mamatay” ug moingon:
◼ “Hinumdomi ang atong panaghisgot bahin sa pagbanhaw ni Kristo kang Lazaro. [Basaha ang kapsiyon sa panid 28, ug tagda ang materyal ilalom sa sub-ulohang “Nahitabo ba Gayod Kini?”] Kon ang imong kasingkasing nangandoy sa pagtuo nga imong makita pag-usab ang namatay nga minahal, tugoti akong tabangan ka sa pagbaton ug pagtuo diha sa paglaom sa pagkabanhaw.” Itanyag ang usa ka pagtuon sa Bibliya sa balay.
8 Hinaot nga atong buhaton ang ato gayong maarangan sa mga bulan nga umaabot sa pagsundog kang Jesus pinaagi sa ‘paghupay sa tanang nanagbakho.’—Isa. 61:2.