Ako Gustog Usa ka Pagtuon sa Bibliya!
1 Daghan kanato mipahayag ug tinguha alang sa usa ka pagtuon sa Bibliya, ug sa maayong katarongan. Molampos kita sa pagkab-ot sa atong tumong sa paghimog bag-ong mga tinun-an pinaagi sa buluhaton sa pagtuon sa Bibliya. (Mat. 28:19, 20) Ug bisan pa niana daghan kanato ang nagpalabay ug mga bulan, tingali mga tuig, nga wala makasinati ug linaing kalipay nga nagasumikad sa pagtudlo sa usa sa kamatuoran. Unsay atong mahimo bahin niini sulod sa Nobyembre? Sanglit ang Kahibalo nga libro maoy ginatanyag niining bulana, makahimo kitag linaing paningkamot sa paggamit niana sa pagsugod ug bag-ong mga pagtuon sa Bibliya.
2 Paggahin ug Usa o Dugang mga Hinapos sa Semana: Among dasigon ang matag usa sa paggahin ug pipila ka panahon niining bulana sa pagpunting nga makasugod ug usa ka bag-ong pagtuon sa Bibliya. Ang mga nagdumala sa Pagtuon sa Libro sa Kongregasyon angayng magpili ug hinapos o mga hinapos sa semana nga linaing magamit alang niini nga katuyoan ug dayon organisahon ang ilang mga grupo aron linangkob nga manikaysikay diha sa buluhaton sa pagbalikduaw.
3 Dad-a ang imong mga rekord sa balikduaw ngadto niining mga tigoma sa dayon na ang pagsangyaw. Dayon duawa silang tanan nga nagpakitag interes, nakakuhag literatura, o nakatambong sa mga tigom. Buhata ang matag duaw uban ang tinong katuyoan sa pagsugod ug usa ka pagtuon.
4 Ipasunbayag ang Pagtuon sa Bibliya: Diha sa piniling mga tigom sa dayon na ang pagsangyaw, ang maayong-pagkaandam nga pasundayag kinahanglang ipresentar, nga magpakita kon unsaon pagsugod ang usa ka pagtuon diha sa balikduaw. Ikaw makaingon: “Daghang tawo dunay Bibliya, apan wala sila makaamgo nga kini nagbaton sa mga tubag sa hinungdanong mga pangutana nga kitang tanan nagaatubang sa kinabuhi. [Ipakita ang kaundan diha sa Kahibalo nga libro, ug basaha ang mga ulohan sa mga kapitulo 3, 5, 6, 8, ug 9.] Ginamit kini nga tabang sa pagtuon sa usa o kapin pang oras sa usa ka semana, makabaton ka ug paninugdang pagsabot sa Bibliya sa pipila lamang ka bulan. Kon buot kang mopili sa usa niining mga temaha, ako malipay sa pagpakita kanimo kon sa unsang paagi himoon ang programa.” Kon ang tawo magduhaduha sa pagtuon tungod kay dunay puliking eskedyul, isaysay nga kita usab adunay gipamubo nga programa. Ipaila ang Gikinahanglan nga brosyur, ug tanyagi sa pagtuon ug usa ka mubong leksiyon sulod sa 15-30 minutos sa matag semana.
5 Kon kitang tanan maghimog hiniusang panlimbasog sa pagsugod ug mga pagtuon ug kon kita mag-ampo alang sa panalangin ni Jehova sa atong paningkamot, kita seguradong makakaplag ug bag-ong mga pagtuon! (1 Juan 5:14, 15) Kon buot ka ug usa ka pagtuon sa Bibliya, mahimong kini na ang imong kahigayonan nga makasugod ug usa.