“Laktora ang Hisgotan” Ta!
1 Nakasinati ka na ba sukad sa usa ka tagbalay nga mibalda sa imong naandam pag-ayong presentasyon pinaagig mga pulong: “Unsay tuyo mo? Laktora ang hisgotan!” Unsay atong makat-onan gikan sa maong kasinatian?
2 Daghang tawo karong adlawa di-mapailobon. Buot nilang masayran kon kinsa kita ug nganong mianha kita. Sa dihang ilang mahibaloan nga ang tuyo sa atong pagduaw mao ang pagpakighisgot sa Bibliya, sila tingali modumili sa pagpaminaw. Ang pagbasa sa Bibliya ug espirituwal nga mga panaghisgot dili hinungdanong mga butang diha sa mga kinabuhi sa daghang tawo. Unsaon nato sa pagkombinsir ang maong mga tagbalay nga angay nilang gahinan ug pipila ka minutos aron hisgotan ang usa ka topiko sa Bibliya uban kanato?
3 Kon Unsay Mosaler nga Labing Maayo: Ang yawi mao ang pagpakita sa tagbalay nga ang Bibliya nagtaganag praktikal nga mga solusyon sa mga problema nga nakapabalaka kaniya ug isaysay kana sa pipila ka pulong kutob sa mahimo. Ang labing epektibong mga presentasyon nagpasiugda sa espesipikong pangutana nga gituyo sa pagpahunahuna sa tagbalay, nga sundan ug usa ka kasulatan nga magtubag sa pangutana. Ikaw tingali malipay nga sulayan ang pipila sa mosunod nga mga sugyot. Kini gituyo sa pagtabang kanato nga ‘laktoron ang paghisgot’ gilayon samtang gipukaw ang interes sa tagbalay.
4 Sa teritoryo diin ang mga tawo sagad moingon nga sila dili interesado, mosukna ug usa ka pangutana nga naglangkit kanila sa personal:
◼ “Samtang kita taliabot sa sunod nga milenyo, ikaw ba mibating malaomon o maduhaduhaon? [Tugoting motubag.] Ang Bibliya nagtagna sa makapatugaw nga mga hitabo nga atong makita karong adlawa maingon man ang sangpotanan niini.” Basaha ang 2 Timoteo 3:1, 2, 5 ug Proverbio 2:21, 22.
◼ “Gikabalak-an pag-ayo niining nasora ang bahin sa pag-atiman sa panglawas. Nahibalo ka ba nga ang Diyos nagsaad nga iyang sulbaron sa bug-os ang tanang suliran sa panglawas?” Basaha ang Pinadayag 21:3, 4.
◼ “Sa hunahuna mo ang ato bang komunidad mabenepisyohan kon ang matag usa nga nagpuyo dinhi magpadapat sa mga prinsipyo sa Bibliya?” Basaha ang Mateo 22:37-39.
5 Sanglit ang atong buluhaton mao ang pagwali sa maayong balita sa Gingharian, sa bisan unsang panahong posible angay natong ipatagad kon unsay palamposon sa Gingharian. Tingali ikaw moingon:
◼ “Nahibalo ka ba nga ang labing karaang basahon sa kalibotan, ang Bibliya, nagtagna nga aduna unyay usa ka kagamhanan alang sa tibuok nga kalibotan?” Basaha ang Daniel 2:44.
◼ “Sa imong hunahuna mahimong sama unya sa unsa ang mga kahimtang kon si Jesu-Kristo magmando sa yuta?” Basaha ang Salmo 72:7, 8.
6 Sa teritoryo diin ang mga tawo maoy relihiyoso, masulayan mo ang usa niini nga mga pasiuna:
◼ “Daghang tawo nag-antos ug pagpihigpihig tungod sa ilang relihiyon o kolor sa panit. Sa hunahuna mo unsay bation sa Diyos sa maong pagpihigpihig?” Basaha ang Buhat 10:34, 35.
◼ “Kita nahibalo nga si Jesu-Kristo naghimog daghang milagro sa iyang adlaw. Kon ugaling makahangyo ka niya sa paghimog usa pa ka milagro, unsa man kana?” Basaha ang Salmo 72:12-14, 16.
7 Kon ang tagbalay nagpanuko sa pag-abli sa pultahan, hayan makasugod ka sa panaghisgot sa pag-ingon:
◼ “Kadaghanang tawo karong adlawa gikapoy na sa pagpaminaw bahin sa mga problema. Buot nilang maminaw bahin sa mga solusyon. Sa walay duhaduha tinuod kana kanimo. Apan asa kita makakaplag ug tinuod nga mga solusyon sa atong mga problema?” Tugoting motubag. Basaha ang 2 Timoteo 3:16, 17.
8 Nganong Dili Sulayan Kini? Kasagaran ang yano, laktod nga pangutana mao lang ang gikinahanglan sa pagpukaw sa interes sa tagbalay. Usa ka babaye nga kanhi misupak mipasulod sa duha ka sister ngadto sa iyang balay human nga ang usa kanila nangutana: “Makatino ka ba sa Gingharian nga imong giampo diha sa Pag-ampo sa Ginoo?” Ang babaye nainteres sa pangutana, ug siya midawat ug pagtuon sa Bibliya. Siya karon usa na ka dedikadong alagad ni Jehova!
9 Sa dihang nagapakigsulti ka sa tagbalay, magmalunsayon sa imong mga pahayag. Sulti nga matim-oson. Ang mga tawo lagmit gayod nga mosanong nga mauyonon sa dihang sila makombinsir nga kita interesado gayod kanila.—Buh. 2:46, 47.
10 Ang buluhatong pagwali sa maayong balita maoy usa ka hagit karong adlawa. Ang pipila ka tagbalay matahapon sa mga langyaw. Ang uban adunay magubtanong mga kinabuhi ug diyutay rag libreng panahon. Bisan pa niana, kita makaseguro nga aduna pay daghang takos nga mga tawo nga makaplagan. (Mat. 10:11) Ang atong mga paningkamot sa pagpangita kanila lagmit nga dugang magmalamposon kon atong huptang mubo ang atong mga presentasyon ug ‘laktoron ang hisgotan!’