Unsa ang Tumong sa Pagdumalag mga Pagtuon sa Bibliya?
1 Nganong kita magdumalag mga pagtuon sa Bibliya sa balay? Aron ba lamang magpaambit ug kahibalo, magpauswag sa mga kinabuhi sa mga tawo, o aron maglamdag sa ilang panglantaw sa umaabot? Dili. Ang atong pangunang tumong mao ang paghimog mga tinun-an ni Jesu-Kristo! (Mat. 28:19; Buh. 14:21) Kana ang hinungdan kon nganong ang mga tawo nga atong ginatun-an kinahanglang makig-uban sa kongregasyon. Ang ilang espirituwal nga pag-uswag deretsong nalangkit sa ilang pagpabili sa Kristohanong organisasyon.
2 Kon Unsaon sa Pagkab-ot Niana: Gikan gayod sa sinugdan, padayong agdaha ang estudyante sa pagtambong sa mga tigom sa kongregasyon. (Heb. 10:24, 25) Ipatin-aw kon sa unsang paagi kini maglig-on sa iyang pagtuo, magtabang kaniya sa pagbuhat sa kabubut-on sa Diyos, ug magtagana kaniyag maayong panag-ubanay sa uban nga nagtinguha usab sa pagdayeg kang Jehova. (Sal. 27:13; 32:8; 35:18) Ang imong personal nga mga kapahayagan sa gugma ug pagpabili alang sa kongregasyon ug sa mga tigom magpukaw sa iyang tinguha nga motambong.
3 Kinahanglang masabtan sa mga bag-ohan nga ang organisasyon ni Jehova maoy usa ka internasyonal nga panag-igsoonay. Ipasalida kanila ang mga video nga Jehovah’s Witnesses—The Organization Behind the Name ug Our Whole Association of Brothers. Tabangi sila sa pagpabili nga si Jehova naggamit sa milyonmilyong dedikadong mga indibiduwal sa tibuok kalibotan aron palamposon ang iyang katuyoan. Ipahibalo niining mga bag-ohan nga sila gidapit sa pag-alagad usab sa Diyos.—Isa. 2:2, 3.
4 Usa gayod ka hinungdan sa dakong kalipay nga makitang ang usa ka estudyante sa Bibliya mahimong tinuod nga tinun-an ni Jesus. Mao kana ang atong tumong!—3 Juan 4.