Dako ba ang Teritoryo sa Inyong Kongregasyon?
1 Gikan sa mga siyudad sa Judea hangtod sa kabanikahan sa Galilea, bug-os nga gisangyawan ni Jesus ang dakong teritoryo sa karaang Israel. (Mar. 1:38, 39; Luc. 23:5) Kinahanglan usab natong sangyawan sa maayong balita ang daghang tawo kutob sa atong mahimo. (Mar. 13:10) Hinunoa, kini mahimong malisod nga tahas. Ngano man?
2 Daghang kongregasyon sa Pilipinas adunay teritoryo nga nakatag sa halapad nga mga lugar, nga kadaghanan niini kabukiran ug lisod adtoon. Unsay atong mahimo sa pagtabang sa maong mga tawo nga nagpuyo sa halapad nga mga teritoryo aron sa pagkat-on sa kamatuoran bahin kang Jehova, Jesus, ug sa Gingharian?
3 Planohag Maayo: Ang magtatan-aw sa pag-alagad ug ang alagad sa teritoryo kinahanglang magdumala sa mga paningkamot sa kongregasyon aron mapalampos ang labing maayo. Tingali ang linaing mga Sabado mahimong ieskedyul sa dihang ang kadaghanan makaarang sa paggahin sa tibuok adlaw alang sa maong buluhaton. Sa dihang mosangyaw sa lagyong mga teritoryo, planoha nga mogugol ug dugaydugayng panahon sa pag-alagad sa kanataran kon posible, nga magdalag paniudto. Mahimo kamong magtigom alang sa pagsangyaw nga sayosayo kay sa naandan aron mahatagag panahon ang pagbiyahe ngadto sa teritoryo o himoon ang tigom sa dayon nang pagsangyaw duol sa lugar nga sangyawan. Hikaya ang pagkobre sa banikanhong mga dapit sa dihang maayo ang panahon ug ang mga karsada dili malisod.
4 Kon ang mga ansiyano may nahibaloang duol nga kongregasyon nga subsob nga nagkobre sa ilang teritoryo, mahimong imbitahon nila sila sa pagduyog sa inyong kongregasyon sa pagsangyaw sa lagyong mga teritoryo, ilabina sa mga bulang ting-init. Ang maong pagtambayayongay mahimong makalingaw ug mabungahon.
5 Paneguroa nga magdalag igoigong literatura. Kon ang teritoryo talagsa rang masangyawan, mahimong haom ang pagbilin ug tract o daandaang magasin sa mga tawong wala sa balay. Itanyag ang tract nga Gusto Ka Bang Makabaton ug Dugang Kahibalo Bahin sa Bibliya? ngadto sa tanan nga inyong mahibalag.
6 Makigtambayayong sa Bug-os: Ang pagsangyaw sa dakong teritoryo nagkinahanglag kooperasyon sa tanan diha sa kongregasyon. Kon gikinahanglan ang lagyong pagbiyahe, kadtong magkauban sa biyahe mahimong mag-ambitay sa galastohan sa gasolina. Ang maayong panghukom angayng gamiton sa dihang makaplagan ninyo ang mga tagbalay nga gustong makig-estorya. Hunahunaa kanunay nga kinahanglang inyong maabot ang tanan diha sa teritoryo, ug magmahunahunaon niadtong naghulat sa inyong grupo. Kon buot mong ipadayon ang panaghisgot uban sa interesadong tawo sa taastaas nga panahon, mahimo ba ang mga kahikayan aron ang nahibilin sa grupo makapadayon pa sa pagsangyaw?
7 Paghimog tinong mga kahikayan aron mapaloap ang tanang nagpakitag interes. Ilista ang adres para sa sulat aron ikapadayon ninyo ang pagpamatuod pinaagig sulat. Kon walay ngalan ang banikanhong mga karsada o walay numero ang mga balay, ayoha paghimo ang mapa o isulat ang kahubitan kon unsaon pagkaplag ang maong interesado sa dihang mobalikduaw.
8 Pagkadako sa atong pribilehiyo sa pagtuman sa mga gimbut-an ni Jesus: “Sa bisan unsang siyudad o balangay nga kamo mosulod, pangitaa kon kinsa didto ang takos”! (Mat. 10:11) Segurado nga si Jehova magapanalangin sa inyong mga paningkamot samtang kinabubut-on ninyong gamiton ang inyong kaugalingon alang niining labing magantihong buluhaton!