Magamit ba ang Imong Balay?
1 Sa unang siglo, daghang Kristohanon ang nagpagamit sa ilang mga balay aron gamiton alang sa mga tigom sa kongregasyon. (1 Cor. 16:19; Col. 4:15; Filem. 1, 2) Diha sa pipila ka kongregasyon karong adlawa, wala nay igong lokasyon alang sa mga grupo sa Pagtuon sa Libro sa Kongregasyon ug sa mga tigom sa dayon nang pagsangyaw. Tungod niini, ang ubang mga grupo sa pagtuon sa libro dunay 30 o kapin pang manambong, nga daghan ra kaayo kon itandi sa gisugyot nga gidaghanon nga mga 15.
2 Usa ka Maayong Pribilehiyo: Gipalandong ba nimo ang pagpagamit sa imong balay alang sa Pagtuon sa Libro sa Kongregasyon? Ang usa ka hinlong lawak nga may igoigong gidak-on, hayag, ug presko ang hangin maoy maayong luna alang niini nga katuyoan. Sanglit ang pagtuon sa libro maoy usa ka tigom sa kongregasyon ug bahin sa kahikayan ni Jehova sa pagtudlo sa iyang katawhan, ang pagkaadunay pagtuon sa libro sa imong balay maoy usa ka maayong pribilehiyo. Daghang nagtaho nga nakabenepisyo sila sa espirituwal pinaagi sa pagpagamit sa ilang balay niining paagiha.
3 Kon nagtuo ka nga dunay angayang luna sa imong balay, nan ipahibalo gayod kana sa mga ansiyano. Basin nangita pa silag dugang pang mga lokasyon. Kon dili posible nga may pagtuon sa libro sa imong balay, ikapahigayon ba didto ang mga tigom sa dayon nang pagsangyaw? Bisan kon walay panginahanglan sa pagkakaron, pabilhan sa mga ansiyano ang pagkahibalo nga magamit ang imong balay. Mahimong malipay ka sa maong pribilehiyo sa umaabot.
4 Pagpakitag Maayong Pamatasan: Sa dihang magtigom diha sa pribadong balay, ang tanang nanambong kinahanglang magmatinahoron sa propiedad sa tagbalay. Angayng seguroon sa mga ginikanan nga magpabilin ang ilang mga bata diha sa gigahin nga luna alang sa pagtuon, nga dili mosulod sa pribadong mga dapit sa balay. Angayng ipakita usab ang pagkamatinagdanon sa mga silingan, nga magbantay nga dili makatugaw kanila nga wala kinahanglana.—2 Cor. 6:3, 4; 1 Ped. 2:12.
5 Ang Hebreohanon 13:16 nagdasig kanato nga dili kalimtan “ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.” Ang pagpagamit sa imong balay alang sa usa ka tigom sa kongregasyon maoy usa ka paagi sa pagpaambit ug maayong mga butang ngadto sa uban ug sa ‘pagpasidungog kang Jehova pinaagi sa imong bililhong mga butang.’—Prov. 3:9.