Usa ka Paagi sa Pagtabang Kanila

Ang matuod nga mga Kristohanon nakig-ambit sa publikong ministeryo sa pagpakaylap sa maayong balita. (Filip. 2:17) Ingong usa ka paagi sa pagpalampos niana, ang pipila ka brosyur, mga tract, ug mga artikulo diha sa 20 ka pinulongan gibutang diha sa Internet sa www.watchtower.org. Kini nga Web site wala gidisenyo aron ipanagtag ang bag-ong mga publikasyon ngadto sa mga Saksi ni Jehova. Ang katuyoan niini maoy aron mabatonan sa publiko ang tukmang impormasyon mahitungod sa kon unsay ginatudlo sa mga Saksi ni Jehova gikan sa Bibliya.

Di pa dugay, dunay dakong gidugang sa atong opisyal nga Web site. Kini mao ang brosyur nga Unsay Gikinahanglan sa Diyos Kanato? diha sa kapin sa 220 ka pinulongan. Gawas pa, sugod sa mga gula sa Enero 1 ug Enero 8, 2004, Ang Bantayanang Torre ug Pagmata! diha sa tanang pinulongan nagpatik sa adres sa atong Web diha sa luyo sa kataposang panid.

Sa unsang paagi imong magamit kining maong himan? Aw, hayan makahibalag kag tawo nga morag interesado apan makasabot lamang ug laing pinulongan. Kon makagamit siyag Internet, mahimong isulti nimo ang adres sa Web diha sa mga panid sa luyo sa Ang Bantayanang Torre ug Pagmata! Pinaagi niana masusi niya ang brosyur nga Gikinahanglan diha sa iyang kaugalingong pinulongan hangtod makabalik ka dala ang literatura sa iyang pinulongan. O mahimong ipaduaw mo ang maong tawo sa kongregasyon o grupo nga maoy nagdumala sa iyang pinulongan.