Ipakita ang Personal nga Interes—Pinaagi sa Pagkamapaniiron
1 Si Jehova nga Diyos ug si Kristo Jesus labaw nga nahibalo sa espesipikong mga panginahanglan sa mga tawo ug motabang kanila. (2 Cron. 16:9; Mar. 6:34) Sa dihang atong mahibaloan ang mga gikaikagan ug mga gikabalak-an niadtong atong mahibalag sa dihang kita mosangyaw, ikapahiuyon nato niana ang atong paagi sa pagpresentar sa maayong balita.
2 Magmapaniiron sa mga Detalye: Si Jesus mapaniiron. (Mar. 12:41-43; Luc. 19:1-6) Sa samang paagi, sa dihang moduol kita sa usa ka balay ug atong mamatikdan ang relihiyosong mga dekorasyon, mga eslogan diha sa mga sakyanan, o mga dulaan diha sa lagwerta, makahunahuna dayon kitag mga pamaagi sa paghatag ug epektibong pagpamatuod sa maayong balita.
3 Ang ekspresyon sa nawong ug ang linihokan sa usa ka tawo mahimong magpaila sa iyang mga pagbati. (Prov. 15:13) Tingali nagkinahanglan siyag paghupay tungod sa kamatayon sa usa ka minahal o sa laing makapasubong kahimtang. Malipay tingali siya kon imo siyang basahan ug pipila ka haom nga mga teksto. (Prov. 16:24) Ang tagbalay ba nagdalidali paggawas sa pultahan o nagkugos ug bata nga naghilak? Kon mao, lagmit mas maayo nga moingon ka na lang nga mobalik sa laing higayon. Pinaagi sa pagkamahunahunaon ug ‘pagpakitag pagbati alang sa isigkaingon,’ hayan madasig nato ang maong tawo sa pagpaminaw inigbalik nato.—1 Ped. 3:8.
4 Ipahiuyon ang Imong mga Komento: Namatikdan ni apostol Pablo nga ang siyudad sa Atenas may usa ka halaran nga gipahinungod “Alang sa Usa ka Diyos nga Wala Mailhi.” Iyang gipahiuyon niadto ang iyang paagi sa pagpresentar sa maayong balita, kay siya miingon: “Kini nga sa kawalay-kahibalo inyong ginahatagan ug diyosnong pagkamahinalaron, kini ang akong ginamantala kaninyo.” Ang mataktikanhong paagi sa pagpakig-estorya ni Pablo nagtukmod sa pipila nga presente niadtong tungora sa pagpaminaw sa mensahe sa Gingharian ug nahimong mga magtutuo.—Buh. 17:23, 34.
5 Sa samang paagi, ang atong pagkamapaniiron makatabang kanato sa pag-ila sa mga interes sa usa ka tawo ug sa ingon atong ikapahiuyon ang atong paagi sa pagpakig-estorya. Pagsuknag mga pangutana nga hayan makadasig sa tagbalay sa pagpahayag sa iyang pagbati. Paghunahuna ug mga teksto nga mahimong basahon aron mapukaw ang iyang interes. (Prov. 20:5) Ang atong pagkamapaniiron ug pagpakitag sinserong personal nga interes sa uban makatabang kanato sa pagpaambit sa maayong balita sa mahanasong paagi.