Tibuok-Kalibotang Kampanya nga Mag-anunsiyo sa “Ang Kaluwasan Haduol Na!” nga Distritong Kombensiyon
Ang mga Magmamantala sa Matag Kongregasyon Managtag sa Espesyal nga Handbill
1 Niining tuiga, sa 2006-2007 nga serye sa distritong mga kombensiyon nga gipahigayon diha sa mga 155 ka nasod, usa ka kampanya ang ginahimo aron ianunsiyo kining mga kombensiyona pinaagig espesyal nga handbill.
2 Tungod kay kita nagkinabuhi na sa hinapos nga bahin sa kataposang mga adlaw, ang mga kombensiyon nga nagpasiugda sa gisaad sa Diyos nga kaluwasan gikan niining daotang sistema, kinahanglang makadani gayod sa tanang tawo nga mahiligon sa pagkamatarong. Ang mensahe angayng makapalihok kanila sa paghunahuna kon unsay mahitabo sa umaabot. Aron mahatagag kahigayonan ang milyonmilyong tawo nga makabati sa mensahe sa kahupayan ug paglaom, ang kapin sa 98,000 ka kongregasyon sa mga Saksi ni Jehova sa tibuok kalibotan giawhag nga masibotong makigbahin sa pag-anunsiyo sa kombensiyon nga ilang tambongan.
3 Ang mga kongregasyon padad-an ug igong mga handbill aron ang tanang magmamantala makadawat ug tag-20 ka kopya. Ang tanang sobra mahimong ipanagtag sa mga payunir sa kongregasyon. Sa matag kongregasyon, ang kampanya magsugod tulo ka semana sa dili pa ang kombensiyon nga tambongan sa kongregasyon.
4 Among gisugyot nga ang tanang ginatun-an sa Bibliya ug ang ilang mga pamilya, ug ang uban pang interesadong mga tawo diha sa teritoryo, maduaw ug mahatagag imbitasyon sa distritong kombensiyon. Dugang pa, hangtod nga duna pay suplay, ang mga handbill kinahanglang itanyag sa balaybalay diha sa inyong teritoryo. Paningkamoting ikapanagtag ang tanang handbill sulod sa tulo ka semana.
5 Masaligon kami nga ikahatag ang dakong pagpamatuod tungod niining tibuok-kalibotang paningkamot sa pag-anunsiyo sa “Ang Kaluwasan Haduol Na!” nga Distritong Kombensiyon. Kami nanghinaot nga dagayang panalanginan ni Jehova ang inyong mga paningkamot sa pagpakigbahin niining tibuok-kalibotang kampanya.