Tibuok-Kalibotang Pag-anunsiyo sa “Sunda si Kristo!” nga Distritong Kombensiyon
Duna na Usay Ipanagtag nga Espesyal nga Handbill ang mga Magmamantala
1 Sa miaging tuig ang tibuok-kalibotang kampanya sa pag-anunsiyo sa “Ang Kaluwasan Haduol Na!” nga Distritong Kombensiyon nakahatag ug dako kaayong kaayohan sa mga interesado. Kadtong midawat sa espesyal nga imbitasyon ug mitambong sa unang higayon nakasinati sa dagayang espirituwal nga kombira sa mga Saksi ni Jehova. (Isa. 65:13) Sila nalipay sa pagkasinati sa atong mainiton ug nagkahiusang Kristohanong panag-igsoonay. (Sal. 133:1) Aron matabangan ang mas daghan pa sa pagtambong sa “Sunda si Kristo” nga Distritong Kombensiyon, kita managtag na usab sa espesyal nga handbill sa tibuok kalibotan.
2 Nahimo sa Miaging Tuig: Segun sa tibuok-kalibotang report, ang pag-anunsiyo sa “Ang Kaluwasan Haduol Na!” nga Distritong Kombensiyon nakapatunghag maayong mga resulta. Pananglitan, usa ka mantalaan diha sa usa ka siyudad ang nagpatik ug unom-ka-lindog nga artikulo bahin sa maong kampanya, nga nag-ingon: “Aron mahatagan ang tanan sa dili pa ang kombensiyon, ang mga Saksi naningkamot pag-ayo pinaagi sa paggahin ug mas daghang oras sa pagsangyaw, pagbaktas sa mas lagyong mga dapit, ug paghatag ug mas mugbong mga presentasyon.” Sa laing siyudad, labing menos tulo ka mantalaan ang naghatag ug maayong taho bahin sa atong kalihokan sa wala pa ang kombensiyon. Usa ka reporter misulat ug taas nga mga artikulo nga kapin sa duha ka panid diha sa Dominggo nga edisyon sa usa ka mantalaan. Kini naghisgot bahin sa atong mga pagtulon-an, organisasyon, pagpanagtag sa handbill, ug sa kombensiyon. Sa dihang gipresentar sa usa ka magmamantala ang imbitasyon diha sa usa ka balay, ang tagbalay misagbat: “Mao pa gyoy pagbasa nako bahin niana diri sa mantalaan!” Ang laing tagbalay miingon: “Bag-o ra kong nakabasa bahin ninyo, ug nia na dayon mo! Akoa ba kana nga imbitasyon?” Dayon siya midugang, “Dalayegon kaayo kining gihimo sa mga Saksi ni Jehova.”
3 Daghang interesado ang nakitang nangadto sa giasembliyahan nga nagbitbit sa imbitasyon. Ang pipila ka interesado naggikan pa sa lagyong mga siyudad aron makatambong sa mga sesyon. Ang atong makugihong paningkamot nakaamot sa pag-uswag sa gidaghanon sa nanambong, nga sa usa ka nasod dihay 27 porsiyentong pag-uswag sa nanambong sa kombensiyon kay sa miaging tuig. Dinhi sa Pilipinas, usa ka bag-ong kinatas-ang ihap nga 340,215 ang mitambong sa atong mga kombensiyon sa miaging tuig.
4 Pagkobre sa Teritoryo: Mahimong sugdan ninyo ang pagpanagtag sa handbill tulo ka semana sa dili pa ang inyong kombensiyon. Paningkamoti ninyong makobrehan ang tibuok teritoryo sa inyong kongregasyon. Sa mga kongregasyon nga daghag teritoryo, ang mga magmamantala makabilin ug handbill sa mga balay nga walay tawo sa kataposang semana sa dili pa ang kombensiyon. Paningkamotan sa mga kongregasyon nga mapanagtag ang tanang handbill ug makobrehan ang tibuok teritoryo kutob sa mahimo. Ang sobra mahimong ihatag sa mga payunir aron sila nay managtag niana.
5 Kon Unsay Isulti: Mahimong kini ang imong isulti: “Nakigbahin kami sa tibuok-kalibotang pagpanagtag niini nga imbitasyon para sa usa ka hinungdanong okasyon. Kini ang imong kopya. Palihog basaha ang uban pang mga detalye nga anaa nianang imbitasyona.” Mas daghan ang mapanagtag kon mubo ra ang presentasyon. Siyempre, kon may mga pangutana ang tagbalay, tubaga kana. Kon interesado, isulat ang iyang ngalan ug adres ug baliki dayon siya.
6 Pagkahinungdanon nga kita maningkamot sa pagsunod kang Kristo! (Juan 3:36) Ang atong umaabot nga distritong kombensiyon motabang kanatong tanan sa paghimo niana. Makaseguro gayod kita nga usa ka dakong pagpamatuod ang mahatag pag-usab ingong resulta niining hiniusang paningkamot sa pag-anunsiyo sa “Sunda si Kristo!” nga Distritong Kombensiyon. Busa, magmakugihon sa pagdapit ug daghang tawo kutob sa maarangan. Hinaot dagayang panalanginan ni Jehova ang imong mga paningkamot samtang makigbahin ka niining tibuok-kalibotang kampanya.