Bag-ong Programa sa Sirkitong Asembliya

Kita gustong patuohon sa kalibotan nga ang presenteng sistema sa mga butang dili mahanaw. Apan, sukwahi ang gitug-an kanato sa Pulong sa Diyos. (1 Juan 2:15-17) Kini motabang kanato sa pagsabot nga ang ‘pagtigom ug mga bahandi dinhi sa yuta’ maoy kawang nga pangagpas. Aron malig-on ang katawhan sa Diyos, ang programa sa sirkitong asembliya nga magsugod sa Pebrero, 2007 maghisgot sa tema nga ‘Pagtigom ug mga Bahandi sa Langit.’—Mat. 6:19, 20.

Ang materyalistikanhong panghunahuna maoy lakip sa gihisgotan sa Efeso 2:2 nga “awtoridad sa hangin, ang espiritu nga nagalihok karon diha sa mga anak sa pagkadili-masinugtanon.” Maingon nga ang literal nga hangin anaa bisan asa, nga dali rang mahanggap, “ang espiritu sa kalibotan” kaylap usab niining kalibotana. (1 Cor. 2:12) Tungod kay kusganon man kaayo ang impluwensiya niini, kini giingon nga adunay “awtoridad.” Ang bag-ong programa sa sirkitong asembliya motabang kanato sa paglikay sa materyalistikanhong panghunahuna sa kalibotan ug sa pagsentro kanunay sa atong hunahuna sa kon unsay labing hinungdanon. (Mat. 6:33) Dugang pa, ang programa motabang kanato sa pagsalig kang Jehova samtang atong tumanon ang atong ministeryo bisan pa sa mga kalisdanan ug mga pagsulay nga atong maatubang.

Paneguroa nga ikaw makatambong sa duha ka adlaw ug ‘makahatag ug labaw pa kay sa kasagarang pagtagad.’ (Heb. 2:1) Pagkuhag mugbong mga nota bahin sa mga punto nga imong mapadapat sa kaugalingon nimong kinabuhi ug sa imong ministeryo. Pinaagi sa pagtambong gikan sa sinugdan hangtod sa kataposan niining makapatugob-sa-espirituwal nga programa, ikaw madasig ug mapalig-on sa pagpadayon sa ‘pagtigom ug mga bahandi sa langit’!