Balikduawa ang Tanang Nagpakitag Diyutayng Interes
1 Daghan kanato ang nakadangat sa kamatuoran karon tungod kay adunay nakamatikod sa atong maayong pagsanong sa mensahe sa Gingharian ug makugihong mibalikduaw—tingali sa makadaghan—aron mahaling ang atong interes. Sa samang paagi, kinahanglang makugihon natong balikan ang tanang nagpakitag diyutayng interes. Sa pagkatinuod, ang pagbalikduaw maoy bahin sa atong buluhaton sa “paghimog mga tinun-an.”—Mat. 28:19, 20.
2 Matikdi ang Interes: Bisan pag ang usa ka tawo dili modawat ug literatura, ang iyang ekspresyon sa nawong, paningog, o sinultihan mahimong magbutyag sa usa ka sukod sa pagpabili sa mensahe sa Gingharian. Tungod niana kita mahimong mobalikduaw. Usa ka brader mibalikduaw sa usa ka tawo sulod sa lima ka sunodsunod nga mga semana nga wala makapahimutang ug literatura. Sa ikaunom nga duaw, ang maong tawo midawat ug literatura, ug sa ngadtongadto usa ka pagtuon sa Bibliya ang nasugdan.
3 Kon may mamatikdan kang interes, balik dayon, tingali sa pipila lang ka adlaw. Ayaw hatagig kahigayonan ang “usa nga daotan” sa pagsakmit sa kon unsay natisok sa kasingkasing sa maong tawo. (Mat. 13:19) Paneguroa nga tumanon ang imong saad nga mobalik sa tinong panahon.—Mat. 5:37.
4 Sa Pagsangyaw sa Kadalanan: Naningkamot ka ba sa pagpaloap sa interes nga imong nakaplagan samtang ikaw nagsangyaw sa kadalanan o sa dihang nagsangyaw sa di-pormal nga paagi? Sa kataposan sa inyong panag-estorya, ikaw makaingon: “Nalipay ako sa atong panag-estorya. Asa kaha ka nako makontak aron magkaestorya ta pag-usab?” Kon nahiangay, ang ubang mga magmamantala mohatag sa ilang numero sa telepono ngadto sa interesadong tawo o kaha pangayoon usab ang numero sa maong tawo. Kon kanunay kang makita sa mga tawo nga nagsangyaw sa kadalanan diha sa samang lugar, sila lagmit dili na magpanuko sa paghatag sa ilang numero sa telepono o adres. Bisan pag dili nila ihatag ang ilang numero sa telepono o adres, ikaw makasulay gihapon sa paghaling sa ilang interes sa sunod higayon nga imo silang mahibalag diha sa dalan.
5 Malipay gayod kita kon atong makita nga ang mga tanom nga atong gibisbisan ug giatiman milambo. Sa samang paagi, kita magmalipayon gayod pinaagi sa pagbalikduaw ug pagtabang sa mga tawo nga mouswag sa espirituwal. (1 Cor. 3:6) Himoang tumong ang pagbalikduaw sa tanang nagpakitag diyutayng interes.