Ang Binhi Kinahanglang Bisibisan Aron Motubo
1. Unsay kinahanglang bisibisan aron motubo?
1 Ang binhi nga gitanom diha sa tanaman kinahanglang bisibisan aron motubo. Mao man usab ang binhi sa kamatuoran nga gitanom diha sa kasingkasing sa mga tawo sa atong teritoryo. (1 Cor. 3:6) Kon buot natong mogamot, motubo, ug molambo kini, kita kinahanglang magbalikduaw ug magbisibis niini ginamit ang Pulong sa Diyos.
2. Unsaon nimo pagpangandam alang sa sunod nga duaw?
2 Pagpatunghag Pangutana: Sa dihang mangandam ug presentasyon, pag-andam ug makapainteres nga pangutana nga imong tubagon sa imong pagbalik. Human sa inyong panaghisgot, ipangutana kini, ug ingna nga mobalik ka. Daghan ang naggamit ug maayong punto gikan sa librong Gitudlo sa Bibliya aron makasugod ug Bible study.
3. Unsay mahimong iapil sa pagrekord?
3 Paghimog Rekord: Human sa imong unang duaw, paghimog rekord. Isulat ang ngalan ug adres. Isulat usab ang petsa ug oras sa imong pagduaw, kon unsay inyong gihisgotan, ug ang literatura nga imong napahimutang. May gianiban ba siyang relihiyon? Pamilyado ba siya? May gihisgotan ba siyang mga hilig ug mga problema? Kana makatabang kanimo sa pagpahaom sa punto nga imong hisgotan sa sunod duaw. Isulat usab kon kanus-a ka mobalik ug ang pangutana nga imong tubagon.
4. Nganong angay kitang magmalahutayon sa paghaling sa interes?
4 Magmalahutayon: Si Satanas maningkamot gayod sa ‘pagsakmit sa pulong’ nga napugas diha sa kasingkasing sa tawo. (Mar. 4:14, 15) Busa, ayawg kaluya kon nalisdan ka sa pagkontak pag-usab sa interesado. Puwede bang magpadala kag sulat o magbilin ug mubong mensahe kaniya? Nasugdan sa payunir ug pagtuon ang usa ka babaye diha sa ilang pultahan apan wala kini sa iyang pagbalik, busa siya nagpadalag sulat. Sa dihang naabtan ra siya sa sister, miingon ang babaye nga natandog kaayo siya sa gipakitang kahingawa kaniya. Samtang kita magbisibis sa binhi sa kamatuoran, kita malipay kon atong makita nga kini moturok, motubo, ug ‘mobunga ug katloan ka pilo ug kan-uman ug usa ka gatos.’—Mar. 4:20.