Pagpauswag sa Atong Kahanas sa Ministeryo—Paghimog Rekord sa mga Interesado

“Tagda kanunay ang imong kaugalingon ug ang imong pagpanudlo.” (1 Tim. 4:16) Kining inspiradong tambag ni apostol Pablo kang Timoteo nagpasabot nga angay tang maningkamot nga mouswag, bag-ohan man ta o eksperyensiyado. Aron matabangan tang mouswag, adunay bag-ong serye sa Atong Ministeryo sa Gingharian nga nag-ulohang “Pagpauswag sa Atong Kahanas sa Ministeryo.” Ang matag artikulo maghisgot ug usa ka kinahanglanong kahanas ug pipila ka sugyot kon unsaon kini pag-ugmad. Sulod sa bulan, ang tanan gidasig nga ugmaron ang maong kahanas. Pagkatapos sa bulan, adunay usa ka bahin sa Tigom sa Pag-alagad diin kita makakomento bahin sa mga kaayohan sa paggamit sa maong kahanas. Karong bulana, kita gidasig sa paghimog rekord sa mga interesado.

Kon Nganong Hinungdanon: Aron matuman ang gisugo kanato, dili igo ang pagsangyaw lamang. Kinahanglang balikan nato ang mga interesado aron tudloan sila, sa ingon magbisibis sa mga binhi sa kamatuoran nga atong gitanom. (Mat. 28:19, 20; 1 Cor. 3:6-9) Kini naglangkit sa atong pagpakigkita pag-usab sa interesado, paghisgot sa iyang gikabalak-an, ug pagpadayon sa gihisgotan sa miagi. Busa, inigkakita natog interesado, kinahanglang mohimo tag rekord bahin kanila.