Sampol nga mga Presentasyon

Sa Pagsugod ug Pagtuon sa Bibliya sa Unang Sabado sa Hulyo

“Sa di pa dugayng katuigan, nagkadaghan ang nainteres sa mga anghel. Motuo ka bag anghel? [Patubaga.] Matikdi ang giingon niini nga magasin.” Itunol sa tagbalay ang Hulyo 1 nga Bantayanang Torre, ug hisgoti ninyo ang unang sub-ulohan sa panid 16 ug basaha bisag usa lang sa mga teksto. Itanyag ang mga magasin, ug ingnang mobalik ka aron hisgotan ang sunod nga pangutana.

Ang Bantayanang Torre Hulyo 1

Basaha ang Salmo 65:2. Dayon isulti kini: “Daghan ang mouyon nga ang Diyos ‘Tigpatalinghog sa pag-ampo,’ ug moampo sila kada adlaw. Apan ang uban nahibulong, ‘Kon dunay Diyos, nganong daghan kaayong problema sa kalibotan?’ Unsay imong hunahuna? Duna bay Diyos nga mamati sa atong mga pag-ampo? [Patubaga.] Kining magasina naghisgot kon unsay tubag sa Bibliya niining pangutanaha: ‘Nganong ang Tigpatalinghog sa pag-ampo nagtugot sa pag-antos?’”

Pagmata! Hulyo

“Kon duna kay gahom, unsay imong bag-ohon sa kalibotan? [Patubaga.] Gipakita sa Bibliya kon nganong limitado ra ang mahimo sa tawo. [Basaha ang Jeremias 10:23.] Kining magasina nagsaysay kon unsang mga kausaban ang himoon sa Diyos.”