Kingdom News Num. 38 Ipanagtag sa Enero!
1. Unsay mga pangutana sa mga tawo bahin sa patay, ug sa unsang paagi kini tubagon sa Enero?
1 Ang kamatayon kaaway sa tanang tawo, bisan unsa pay ilang tinuohan. (1 Cor. 15:26) Daghan ang nahibulong kon hain ang mga patay ug kon makita pa ba sila pag-usab. Busa, ang mga kongregasyon sa tibuok kalibotan makigbahin sa usa ka bulang pagpanagtag sa Kingdom News Num. 38, nga Mabuhi ba Gyod Pag-usab ang mga Patay? Kining espesyal nga kampanya magsugod sa Pilipinas sa Enero 1, 2014. Human sa kampanya, ang Kingdom News magamit sa ministeryo ingong usa ka tract.
2. Unsay disenyo sa Kingdom News Num. 38?
2 Kon Unsay Disenyo Niini: Ang Kingdom News Num. 38 gipilo nga pataas aron makita sa atubangan ang makapadaning ulohan ug ang mga pulong nga “Unsay imong tubag . . . oo? dili? tingali?” Dihang buksan kini sa magbabasa, iyang makita ang tubag sa Bibliya sa pangutana sa ulohan ug ang mga kaayohan sa saad sa Bibliya alang kaniya. Makita usab ang mga rason kon nganong makatuo siya sa Bibliya. Sa likod sa Kingdom News, dunay makapainteres nga pangutana nga mopukaw sa iyang hunahuna ug magdasig kaniya sa pagkat-on pag dugang.
3. Unsaon pagpanagtag ang Kingdom News?
3 Kon Unsaon Kini Pagpanagtag: Sama kini sa pagpanagtag sa mga imbitasyon sa Memoryal ug distritong kombensiyon. Ang mga ansiyano mohatag ug direksiyon kon unsaon pagkobre ang teritoryo, subay sa sulat kanila nga pinetsahag Abril 1, 2013. Ang mga kongregasyon nga gamay rag teritoryo mahimong motabang sa silingang kongregasyon nga dakog teritoryo. Dihang mokuhag Kingdom News, pagkuha lag igong suplay nga magamit sa usa ka semana. Kini mahimong ipanagtag sa publikong mga dapit human makobrehi ang tanang teritoryo. Kon mahurot na ang mga kopya sa dili pa matapos ang bulan, ang tanyag nga literatura ang gamiton. Ang unang Sabado gamiton nato sa espesyal nga kampanya imbes magsugod ug Bible study. Sa hinapos sa semana, kon haom, kita makatanyag usab ug mga magasin. Andam ka na ba aron bug-os makigbahin niining espesyal nga kampanya?