Mga Pangutana Gikan sa mga Magbabasa

Unsay gipaila sa Bibliya bahin sa silot nga kamatayon alang sa mga kriminal?

Masabtan, ang matag usa kanato mahimong adunay personal nga mga pagbati bahin niini, pinasukad sa atong eksperyensiya o kahimtang sa kinabuhi. Apan, ingong mga Saksi ni Jehova, kinahanglang maningkamot kita sa pagpahiuyon sa mga hunahuna sa Diyos bahin sa silot nga kamatayon, samtang nagpabiling neyutral labot sa politikanhong baroganan nga malangkit niini nga isyu.

Sa prangka nga pagkasulti, diha sa iyang sinulat nga Pulong, ang Diyos wala magpaila nga sayop ang silot nga kamatayon.

Sayo pa sa kasaysayan sa tawo, gipaambit na ni Jehova ang iyang mga hunahuna bahin sa maong butang, sama sa atong mabasa sa Genesis kapitulo 9. Kini naglangkit kang Noe ug sa iyang pamilya, nga nahimong mga kagikanan sa tibuok tawhanong pamilya. Human sila mogula sa arka, ang Diyos nag-ingon nga sila makakaon sa mga hayop​—sa ato pa, ang mga hayop mahimong patyon, paagasan sa ilang dugo, ug kan-on. Dayon, sa Genesis 9:​5, 6, ang Diyos miingon: “Gawas pa niana, ang inyong dugo sa inyong mga kalag pagapanilngon ko. Gikan sa kamot sa tanang buhing linalang pagapanilngon ko kini; ug gikan sa kamot sa usa ka tawo, gikan sa kamot sa matag usa nga iyang igsoon, pagapanilngon ko ang kinabuhi sa tawo. Ang bisan kinsa nga magaula ug dugo sa tawo, pinaagi sa tawo ang iyang dugo pagaulaon, kay sa dagway sa Diyos gibuhat niya ang tawo.” Busa nag-awtorisar si Jehova ug silot nga kamatayon sa mga mamumuno.

Samtang ang Diyos nakiglabot sa Israel ingong iyang katawhan, daghang uban pang bug-at nga sala batok sa hinatag sa Diyos nga balaod may silot nga kamatayon. Sa Numeros 15:​30, atong mabasa kining linangkob nga pahayag: “Ang kalag nga nagabuhat sa butang nga tinuyo, lumad man siya o langyawng molupyo, siya nga nagapasipala kang Jehova, tungod niana kanang kalaga pagaputlon gikan sa taliwala sa iyang katawhan.”

Apan komosta human nga matukod ang Kristohanong kongregasyon? Aw, nasayod kita nga gitugotan ni Jehova ang paglungtad sa tawhanong mga kagamhanan, ug gitawag niya sila ingong superyor nga mga awtoridad. Ngani, human awhaga ang mga Kristohanon nga magmasinugtanon sa maong mga awtoridad sa kagamhanan, ang Bibliya nag-ingon nga sila nag-alagad ingong “mga ministro sa Diyos nganha kanimo alang sa imong ikaayo. Apan kon ikaw nagabuhat kon unsay daotan, pagkahadlok: kay dili sa walay katuyoan nga kini nagadala sa espada; kay kini ministro sa Diyos, usa ka tigpanimalos sa pagpahayag ug kapungot nganha sa usang nagabuhat kon unsay daotan.”​—Roma 13:​1-4.

Kana ba nagpasabot nga ang mga kagamhanan awtorisado bisan sa pagpatay niadtong nakahimog grabeng mga krimen? Gikan sa mga pulong sa 1 Pedro 4:​15, kita makahinapos nga, oo. Nianang tekstoha ang apostol nagtambag sa iyang mga igsoon: “Ayaw tugoti nga adunay kinsa man kaninyo nga magaantos ingon nga usa ka mamumuno o usa ka kawatan o usa ka mamumuhat sa daotan o ingon nga usa ka hilabtanon sa mga butang labot sa uban.” Namatikdan ba ninyo, “ayaw tugoti nga adunay kinsa man kaninyo ang magaantos ingon nga usa ka mamumuno”? Wala magsugyot si Pedro nga ang mga kagamhanan walay katungod sa pagpaantos sa usa ka mamumuno tungod sa iyang krimen. Sa kasukwahi, iyang gipaila nga ang usa ka mamumuno sa makataronganon mahimong makadawat sa angayang silot. Kana ba naglakip sa silot nga kamatayon?

Mahimong naglakip kana. Dayag kini gikan sa mga pulong ni Pablo nga makaplagan sa Buhat kapitulo 25. Gisumbong sa mga Hudiyo nga si Pablo nakasala batok sa ilang Balaod. Sa pagpadala sa iyang binilanggo, si Pablo, ngadto sa Romanong gobernador, ang komander sa militar nagtaho, ingon sa gitala sa Buhat 23:​29: “Akong nakaplagan siya nga gisumbong bahin sa mga gikalantugian sa ilang Balaod, apan wala ikiha sa usa ka butang nga takos sa kamatayon o mga gapos.” Paglabay sa duha ka tuig nakaplagan ni Pablo ang iyang kaugalingon sa atubangan ni Gobernador Festo. Atong mabasa sa Buhat 25:​8: “Si Pablo misulti sa pagdepensa: ‘Wala ako makahimog bisan unsa nga sala batok sa Balaod sa mga Judio ni batok sa templo ni batok kang Cesar.’” Apan karon tagda pag-ayo ang iyang mga pahayag bahin sa silot, bisan ang silot nga kamatayon. Atong mabasa ang Buhat 25:​10, 11:

“Si Pablo nag-ingon: ‘Ako nagabarog atubangan sa lingkoranan-sa-paghukom ni Cesar, diin ako angayng hukman. Ako walay nahimong sala batok sa mga Hudiyo, ingon usab sa imong nasuta pag-ayo. Kon, sa usa ka bahin, ako sa pagkatinuod usa ka magbubuhat ug sayop ug nakahimog bisan unsa nga takos sa kamatayon, dili ako mohangyo nga mapahigawas sa pagkamatay; kon, sa laing bahin, walay usa nga naglungtad sa mga gisumbong kanako niining mga tawhana, walay tawo nga makatugyan kanako ngadto kanila ingong pabor. Ako moapelar kang Cesar!’”

Si Pablo, nga nagbarog sa atubangan sa tinudlong awtoridad, midawat nga si Cesar adunay katungod sa pagsilot sa mga mamumuhat ug daotan, bisan sa pagpatay kanila. Wala siya motutol sa silot sa iyang kaso kon siya sad-an. Dugang pa, wala siya mag-ingon nga si Cesar makagamit sa silot nga kamatayon alang lamang sa mga mamumuno.

Sa pagkatinuod, ang Romanhong hudisyal nga sistema dili hingpit; ni ang tawhanong mga sistema sa korte karong adlawa. Ang pipila ka inosente balik niadto ug karon gihukmang sad-an ug gisilotan. Bisan si Pilato nag-ingon bahin kang Jesus: “Ako walay nakaplagang bisan unsa nga takos sa kamatayon diha kaniya; busa akong kastigohon ug buhian siya.” Oo, bisag ang mga awtoridad sa kagamhanan miadmitir nga si Jesus maoy inosente, kining inosenteng tawo gipatay.​—Lucas 23:​22-25.

Ang maong mga inhustisya wala makapahinabo kang Pablo o Pedro sa pagpangatarongan nga ang silot nga kamatayon sa pasukaranan imoral. Hinunoa, ang hunahuna sa Diyos bahin sa butang mao nga hangtod maglungtad ang superyor nga mga awtoridad ni Cesar, sila ‘nagadala sa espada sa pagpahayag ug kapungot nganha sa usang nagabuhat kon unsay daotan.’ Kana naglakip sa pagpadapat sa espada sa diwa nga mogamit ug silot nga kamatayon. Apan kon bahin sa kontrobersiyal nga pangutana kon kaha ang bisan unsang kagamhanan sa kalibotan mogamit sa katungod niini sa pagpatay sa mga mamumuno, ang tinuod nga mga Kristohanon maampingong magpabiling neyutral. Dili sama sa klero sa Kakristiyanohan, likayan nila ang pagpakigdebate niining butanga.