Pagtabang sa Uban nga Makakat-on sa mga Kinahanglanon sa Diyos
“Ang panginahanglan gikapatong ibabaw kanako. Sa pagkatinuod, alaot ako kon wala ko ipahayag ang maayong balita!”—1 CORINTO 9:16.
1, 2. (a) Sa unsang duha-ka-bahing buluhaton nga si Jehova nagbaod kanato nga makig-ambit? (b) Unsay kinahanglang makat-onan sa matinud-anon-ug-kasingkasing nga mga tawo aron mahimong mga sakop sa Gingharian sa Diyos?
SI Jehova may maayong balita alang sa katawhan. Siya may usa ka Gingharian, ug buot niyang madungog kini sa tanang tawo bisan diin! Sa dihang atong makat-onan kining maayong balita, ang Diyos nagbaod nga ipaambit nato kini ngadto sa uban. Duha kini ka bahin nga buluhaton. Una, kinahanglang imantala nato ang maayong balita sa Gingharian sa Diyos. Sa iyang tagna bahin “sa katiklopan sa sistema sa mga butang,” si Jesus miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”—Mateo 24:3, 14.
2 Ang ikaduhang bahin niining buluhatona maglakip sa pagtudlo niadtong mosanong nga may pag-uyon sa pagmantala sa Gingharian. Human sa iyang pagkabanhaw, gisultihan ni Jesus ang dakong panon sa iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo. Ug, tan-awa! ako uban kaninyo sa tanang mga adlaw hangtod sa katiklopan sa sistema sa mga butang.” (Mateo 28:19, 20) Ang ‘mga butang nga gisugo ni Kristo’ dili gikan kaniya; siya nagtudlo sa uban nga sundon ang mga sugo, o mga kinahanglanon sa Diyos. (Juan 14:23, 24; 15:10) Ang pagtudlo sa uban sa ‘pagsunod sa mga butang nga gisugo ni Kristo’ sa ingon maglakip sa pagtabang kanila nga makakat-on sa mga kinahanglanon sa Diyos. Ang matinud-anon-ug-kasingkasing nga mga tawo kinahanglang makakab-ot sa mga kinahanglanon sa Diyos aron mahimong mga sakop sa iyang Gingharian.
3. Unsa ang Gingharian sa Diyos, ug unsay malampos niini nga maghimo sa mensahe sa Gingharian nga maayong balita?
3 Unsa ang Gingharian sa Diyos? Ug unsay mapalampos niini nga maghimo sa mensahe sa Gingharian nga maayong balita? Ang Gingharian sa Diyos maoy usa ka langitnong kagamhanan. Bililhon kaayo kini sa kasingkasing ni Jehova, kay mao kini ang paagi nga mabalaan niya ang iyang ngalan, nga maghinlo niini sa tanang kaulawan. Ang Gingharian maoy instrumento nga gamiton ni Jehova sa pagtuman sa iyang kabubut-on sa yuta maingon man sa langit. Kana ang hinungdan nga gitudloan kita ni Jesus sa pag-ampo nga moabot ang Gingharian sa Diyos ug nag-awhag kanato sa pag-una niini sa atong mga kinabuhi. (Mateo 6:9, 10, 33) Nasabtan ba nimo kon nganong hinungdanon kaayo kang Jehova nga kita magtudlo sa uban bahin sa iyang Gingharian?
Usa ka Hagit Apan Dili Mabug-at
4. Unsaon nato pag-ilustrar nga ang atong obligasyon sa pagsangyaw sa maayong balita dili mabug-at?
4 Mabug-at ba ang pagwali niining maayong balita? Dili gayod! Sa pag-ilustrar: Ang usa ka amahan may obligasyon sa pagtaganag materyal sa iyang pamilya. Ang dili pagtuman niana katumbas sa pagsalikway sa Kristohanong pagtuo. Si apostol Pablo nagsulat: “Tino nga kon si bisan kinsa wala magatagana alang kanila nga iyang kaugalingon, ug ilabina alang kanila nga mga membro sa iyang panimalay, siya nagalimod sa pagtuo ug mas daotan pa kay sa tawong walay pagtuo.” (1 Timoteo 5:8) Apan mabug-at ba kana nga obligasyon sa Kristohanong tawo? Dili kon nahigugma siya sa iyang pamilya, tungod kay nianang kahimtanga buot niyang tagan-an sila.
5. Bisag obligasyon ang buluhatong pagsangyaw ug paghimog tinun-an, nganong kita malipay sa pagpakig-ambit niini?
5 Sa susama, ang buluhatong pagsangyaw ug paghimog tinun-an maoy usa ka obligasyon, usa ka kinahanglanon, nga niana nagadepende mismo ang atong mga kinabuhi. Gisulti kana ni Pablo niining paagiha: “Ang panginahanglan gikapatong ibabaw kanako. Sa pagkatinuod, alaot ako kon wala ko ipahayag ang maayong balita!” (1 Corinto 9:16; itandi ang Ezequiel 33:7-9.) Ugaling, ang atong motibo sa pagsangyaw mao ang gugma, dili lamang katungdanan. Sa panguna kita nahigugma sa Diyos, apan nahigugma usab kita sa atong mga silingan, ug kita nasayod kon unsa ka hinungdanon nga sila makadungog sa maayong balita. (Mateo 22:37-39) Mohatag kini kanila ug paglaom sa umaabot. Ang Gingharian sa Diyos sa dili madugay magtul-id sa mga inhustisya, magpapas sa tanang pagdaogdaog, ug magpasig-uli sa pakigdait ug panaghiusa—ang tanan alang sa walay kataposang panalangin niadtong magpasakop sa matarong nga pagmando niini. Dili ba kita malipay, oo mahinam, sa pagpaambit nianang maayong balita sa uban?—Salmo 110:3.
6. Nganong ang buluhatong pagsangyaw ug paghimog-tinun-an nagtanyag ug tinuod nga hagit?
6 Sa samang panahon, kining buluhatong pagsangyaw ug paghimog-tinun-an motanyag ug tinuod nga hagit. Magkalahi ang mga tawo. Dili tanan ang may samang mga interes o mga katakos. Ang uban maayong pagkaedukar, samtang ang uban diyutay lamang kaayo ang edukasyon. Ang pagbasa—nga niadto usa ka paboritong pasatiempo—karon sagad gilantaw na ingong trabaho. Ang aliterasiya, nga gihubit ingong “ang kalidad o kahimtang nga makamaong mobasa apan walay kaikag sa pagbuhat niana,” maoy usa ka nagdakong problema, bisan sa mga nasod nga nanghambog ug taas nga porsiyento sa mga makamaong mobasa. Nan, unsaon nato pagtabang sa mga tawong may nagkalainlaing mga kagikan ug mga interes sa pagkakat-on sa mga gikinahanglan sa Diyos?—Itandi ang 1 Corinto 9:20-23.
Hustong Nasangkapan sa Pagtabang sa Uban
7. Sa unsang paagi ang “kasaligan ug mabuot nga ulipon” nagsangkap kanato sa pagtabang sa uban nga makakat-on sa mga kinahanglanon sa Diyos?
7 Ang usa ka makahahagit nga tahas mas sayong buhaton kon ikaw may hustong mga galamiton o kasangkapan. Ang usa ka galamiton nga haom sa usa ka partikular nga trabaho karong adlawa mahimong bag-ohon o pulihan pa ugma tungod sa nagakausab nga mga panginahanglan. Susama kini sa atong komisyon sa pagmantala sa mensahe bahin sa Gingharian sa Diyos. Latas sa katuigan, ang “kasaligan ug mabuot nga ulipon” nagtagana kanato sa haom gayod nga mga galamiton, mga publikasyon nga linaing gidisenyo aron gamiton sa pagdumalag mga pagtuon sa Bibliya sa balay. (Mateo 24:45) Busa kita nasangkapan sa pagtabang sa mga tawo “sa tanang kanasoran ug mga tribo ug . . . mga dila” aron makakat-on sa mga kinahanglanon sa Diyos. (Pinadayag 7:9) Sa matag karon ug unya, ang dugang mga instrumento gitagana aron nga matagan-an ang nagakausab nga mga panginahanglan sa natad sa kalibotan. Atong tagdon ang pipila ka pananglitan.
8. (a) Unsay bahin sa librong “Pasagdi ang Diyos Maminatud-on” sa pagpalambo sa edukasyon sa Bibliya? (b) Unsang instrumento sa buluhatong pagtuon sa Bibliya ang gitagana niadtong 1968, ug sa unsang paagi linain kini nga gidisenyo? (c) Sa unsang paagi ang librong Kamatuoran nakatabang sa buluhatong paghimog tinun-an?
8 Sukad sa 1946 hangtod sa 1968, ang librong “Pasagdi ang Diyos Maminatud-on” gigamit ingong gamhanang instrumento sa edukasyon sa Bibliya, ug mga 19,250,000 ka kopya ang gipatik sa 54 ka pinulongan. Giluwat sa 1968, ang librong Ang Kamatuoran nga Motultol sa Kinabuhing Dayon sa daghang katuigan gigamit nga epektibo sa pagtuon sa Bibliya uban sa mga interesado. Sa miagi, komon sa pipila ang pagtuon uban sa mga Saksi ni Jehova sa daghang tuig nga dili magpabawtismo. Apan kini nga instrumento gidisenyo aron ilangkit ang estudyante, dasigon siya nga ipadapat ang iyang nakat-onan. Ang resulta? Ang librong Mga Saksi ni Jehova—Mga Magmamantala sa Gingharian sa Diyos nag-ingon: “Sulod sa tulo ka tuig sa pag-alagad sugod sa Septiyembre 1, 1968, ug natapos sa Agosto 31, 1971, ang gidaghanong 434,906 ka tawo ang nabawtismohan—kapin sa duha ka pilo sa gidaghanong nabawtismohan sa panahon sa miaging tulo ka tuig sa pag-alagad!” Sukad sa pagluwat niini, ang librong Kamatuoran nakakab-ot sa makapakurat nga sirkulasyon—kapin sa 107,000,000 sa 117 ka pinulongan.
9. Unsang linaing bahin ang nabatonan sa librong Mabuhing Walay Kataposan, ug unsay epekto niini sa panon sa mga magmamantala sa Gingharian?
9 Sa 1982 ang librong Ikaw Mabuhing Walay Kataposan sa Paraiso sa Yuta nahimong pangunang libro nga gigamit sa pagdumala sa mga pagtuon sa Bibliya. Kini nga galamiton may kapin sa 150 ka makitang mga ilustrasyon, ang matag usa may makahuloganong mga kapsiyon nga sa mubo nagpasiugda sa nagatudlong punto sa mga hulagway. Ang Oktubre 1982 nga isyu sa Atong Ministeryo sa Gingharian nag-ingon: “Sa mga duolan sa 20 ka tuig nga ang ‘Pasagdi ang Diyos Maminatud-on’ maoy atong pangunang tun-anang libro (sukad sa 1946 hangtod sa tungatunga sa katuigang 1960) kapin sa 1,000,000 ka bag-ong magmamantala sa Gingharian ang nadugang sa atong panon. Dayon laing 1,000,000 ka magmamantala ang nadugang sa dihang Ang Kamatuoran nga Motultol sa Kinabuhing Dayon nahimong atong pangunang tun-anang libro human sa pagluwat niini niadtong 1968. Pinaagi sa paggamit sa atong bag-ong tun-anang libro, Ikaw Mabuhing Walay Kataposan sa Paraiso sa Yuta, makita ba nato ang susamang pagdako sa panon sa mga magmamantala sa Gingharian? Segurado, kon kini kabubut-on ni Jehova!” Dayag nga kabubut-on gayod kini ni Jehova, sanglit sukad sa 1982 hangtod sa 1995, kapin sa 2,700,000 ang nadugang sa panon sa mga magmamantala sa Gingharian!
10. Unsang bag-ong galamiton ang gitagana niadtong 1995, ug nganong kini makapaarang sa mga estudyante sa Bibliya nga makahimog kusog nga pag-uswag sa espirituwal?
10 “Dako ang anihon, apan diyutay ang mga mamumuo,” miingon si Jesus. (Mateo 9:37) Dako gayod ang alanihon. Dako pa gihapon ang buluhaton. Sa ubang kayutaan ang mga tawo kinahanglang magpalista alang sa mga pagtuon sa Bibliya. Busa uban ang tinguha sa pagpakaylap sa kahibalo sa Diyos nga mas dali, sa 1995 “ang kasaligan ug mabuot nga ulipon” nagtagana ug usa ka bag-ong galamiton, ang 192-panid nga libro nga nag-ulohang Kahibalo nga Motultol sa Kinabuhing Walay Kataposan. Kining bililhong instrumento wala magpunting sa bakak nga mga doktrina. Kini nagtanyag sa mga kamatuoran sa Bibliya sa positibong paagi. Gilaoman nga kini makaarang sa mga estudyante sa Bibliya nga makahimog kusog nga pag-uswag sa espirituwal. Ang librong Kahibalo nakaapektar na sa natad sa kalibotan nga may 45,500,000 ka kopya ang napatik sa 125 ka pinulongan ug padayong ginahubad ngadto sa dugang 21 ka pinulongan.
11. Unsang epektibong galamiton ang gitagana sa pagtabang nga matudloan kadtong dili makamaong mobasa o makamao rag diyutay, ug sa unsang paagi kini nakaamot ug dako sa atong tibuok-yutang programa sa pagpanudlo?
11 Sa matag karon ug unya, ‘ang kasaligang ulipon’ nagtaganag mga galamiton nga gidisenyo sa espesipiko, o limitado, nga mamiminaw. Pananglitan, komosta ang mga tawo nga tingali nagkinahanglag linaing tabang tungod sa ilang kultural o relihiyosong kagikan? Unsaon nato pagtabang kanila nga makakat-on sa mga kinahanglanon sa Diyos? Sa 1982 nadawat nato ang gikinahanglan gayod nato—ang 32-panid nga brosyur nga Tagamtama ang Kinabuhi sa Yuta sa Walay Kataposan! Kining daghag ilustrasyong publikasyon nahimong epektibong galamiton sa pagtudlo niadtong dili makamaong mobasa o makamao rag diyutay. Kini naundan sa yano kaayo ug sayon-sabtong presentasyon sa pangunang mga pagtulon-an sa Kasulatan. Sukad sa pagluwat niini, ang brosyur nga Kinabuhi sa Yuta nakaamot ug dako sa atong tibuok yutang programa sa pagpanudlo. Kapin sa 105,100,000 ka kopya ang napatik diha sa 239 ka pinulongan, nga naghimo niining ang labing kaylap nga nahubad nga publikasyon nga gipatungha sa Watch Tower Society hangtod karon!
12, 13. (a) Sukad sa 1990, ang ‘kasaligan nga ulipon’ nagtaganag unsang bag-ong paagi sa pag-abot sa nagkatag nga mamiminaw? (b) Unsaon nato paggamit ang mga video sa Sosyedad diha sa atong ministeryo sa kanataran? (c) Unsang bag-ong galamiton ang gitagana sa dili pa dugay sa pagtabang sa atong buluhatong paghimog tinun-an?
12 Dugang pa sa pinatik nga mga publikasyon, sugod sa 1990 ‘ang kasaligan nga ulipon’ nagtagana kanato sa paagi sa pagtudlo nga nagtanyag ug bag-ong paagi sa pag-abot sa nagkatag nga mamiminaw—mga videocassette. Sa Oktubre nianang tuiga, ang 55-minutong video nga Jehovah’s Witnesses—The Organization Behind the Name giluwat—ang unang video nga sukad gipatungha sa Watch Tower Society. Ang maanindot, matulon-anong presentasyon, nga mabatonan sa 35 ka pinulongan, nagpakita sa tibuok yutang organisasyon sa debotadong katawhan ni Jehova nga nagatuman sa sugo ni Jesus sa pagmantala sa maayong balita sa tibuok yuta. Ang video ilabinang gidisenyo sa pagtabang sa atong buluhatong paghimog tinun-an. Ang mga magmamantala sa Gingharian wala mag-usik ug panahon sa paggamit niining bag-ong galamiton diha sa ministeryo sa kanataran. Ang uban nagdala niini diha sa ilang mga bag sa libro, nga andam sa pagpakita o pagpahulam niini ngadto sa interesadong mga tawo. Wala magdugay human sa pagluwat niini, usa ka nagapanawng magtatan-aw misulat: “Ang mga video nahimong ika-21ng siglo nga paagi sa pag-abot sa mga hunahuna ug mga kasingkasing sa minilyong tawo, busa among gilaoman nga kini nga video maoy una lamang sa daghang video nga gamiton sa Sosyedad sa pagpakaylap sa tibuok-yutang buluhaton sa Gingharian.” Sa pagkatinuod, dugang mga video ang gitagana, lakip na ang tulo-ka-bahing serye sa The Bible—A Book of Fact and Prophecy ug Jehovah’s Witnesses Stand Firm Against Nazi Assault. Kon ang mga video sa Sosyedad mabatonan sa imong pinulongan, gigamit ba nimo kini sa imong ministeryo sa kanataran?a
13 Dili pa dugay usa ka bag-ong galamiton, ang brosyur nga Unsay Gikinahanglan sa Diyos Kanato?, gitagana sa pagtabang sa atong buluhaton nga paghimog tinun-an. Nganong gipatik kini? Unsaon kini paggamit?
Pagsusi sa Bag-ong Galamiton
14, 15. Alang kang kinsa gidisenyo ang Gikinahanglan nga brosyur, ug unsay kaundan niini?
14 Ang bag-ong publikasyong Unsay Gikinahanglan sa Diyos Kanato? gidisenyo alang sa mga tawong nagtuo na sa Diyos ug nagtahod sa Bibliya. Ang mga magtatan-aw sa sirkito ingon man ang gibansay sa Gilead nga mga misyonaryo nga may kasinatian na sa daghang katuigan sa nagakaugmad nga mga nasod mitabang sa pag-andam niini nga brosyur. Naundan kini sa malukpanong kurso sa pagtuon, nga nagkobre sa pangunang mga pagtulon-an sa Bibliya. Ang pamulong mainiton, yano, ug direkta. Sa samang panahon, ang teksto wala himoang yano kaayo. Nagtanyag kini dili lamang sa “gatas” apan usab sa “gahing pagkaon” gikan sa Pulong sa Diyos sa paagi nga ang kadaghanang tawo makasabot.—Hebreohanon 5:12-14.
15 Sa dili pa dugayng katuigan ang mga magmamantala sa Gingharian sa daghang kayutaan naghangyo gayod sa ingon niana nga publikasyon. Pananglitan, ang sanga sa Watch Tower Society sa Papua New Guinea misulat: “Ang mga tawo naglibog sa nagkasumpaking mga pagtulon-an sa relihiyon. Sila nagkinahanglan ug mubong mga pulong sa kamatuoran, nga gipaluyohan sa daghang teksto sa Bibliya nga masusi nila sa ilang kaugalingong mga Bibliya. Gikinahanglan nila ang tin-aw ug espesipikong presentasyon sa kon unsay gikinahanglan sa Diyos sa matuod nga mga Kristohanon ug haing mga batasan ug mga buhat ang dili dalawaton kaniya.” Ang Gikinahanglan nga brosyur mao gayod ang atong gikinahanglan sa pagtabang sa maong mga tawo nga makakat-on sa mga kinahanglanon sa Diyos.
16. (a) Kinsa sa partikular ang makabenepisyo sa yanong mga pagpatin-aw sa bag-ong brosyur? (b) Sa unsang paagi mahimong makabenepisyo kadtong anaa sa imong teritoryo gikan sa Gikinahanglan nga brosyur?
16 Unsaon nimo paggamit kining bag-ong instrumento? Una, kini magamit sa pagtuon uban sa mga tawo nga maglisod sa pagbasa o tingali walay hilig sa pagbasa.b Ang maong mga indibiduwal mahimong makabenepisyo sa yanong mga pagpatin-aw sa brosyur. Human repasoha nga abante ang kopya niini nga publikasyon, ang mga sanga sa Watch Tower misulat sa mosunod: “Ang brosyur mapuslanon kaayo sa daghang bahin sa nasod diin ang mga tawo dili kaayo kiling sa matubayong pagbasa.” (Brazil) “Adunay daghang lalin nga dili makabasa sa ilang lumad nga pinulongan ug naglisod pa gihapon sa pagbasag Pranses. Kini nga brosyur mahimong magamit ingong tabang sa pagtuon uban kanila.” (Pransiya) Makahunahuna ka ba sa mga tawo sa imong teritoryo nga tingalig makabenepisyo gikan sa Gikinahanglan nga brosyur?
17. Sa unsang paagi mahimong mapuslanon ang bag-ong brosyur sa daghang nasod, ug ngano?
17 Ikaduha, sa daghang kayutaan ang brosyur mahimong mapuslanon sa pagsugod ug mga pagtuon sa Bibliya uban sa mahinadlokon-sa-Diyos nga mga tawo bisan pa kon unsa ka edukado sila. Siyempre, angayng maningkamot nga makasugod ug pagtuon diha sa librong Kahibalo nga Motultol sa Kinabuhing Walay Kataposan. Apan sa pipila ka kahimtang tingalig mas sayon ang pagsugod ug usa ka pagtuon sa brosyur. Dayon sa nahiangay nga panahon, ang pagtuon angayng ibalhin sa librong Kahibalo, ang atong panguna ug piniling tabang sa pagtuon. Mahitungod niining paggamit sa Gikinahanglan nga brosyur, ang mga sanga sa Watch Tower misulat: “Ang pagsugod ug mga pagtuon sa Bibliya malisod, ug ang purohan nga makasugod ug pagtuon daw mas maayo kon ang mga magmamantala magsugod diha sa brosyur.” (Alemanya) “Kining matanga sa brosyur mahimong epektibo kaayo sa pagsugod ug bag-ong mga pagtuon sa Bibliya, nga unya ikapadayon pinaagi sa librong Kahibalo.” (Italya) “Bisag edukado kaayo ang mga Hapones, ang kadaghanan limitado kaayog kahibalo sa Bibliya ug sa pangunang mga pagtulon-an niini. Ang brosyur usa gayod ka maayong tikanganan sa librong Kahibalo.”—Hapon.
18. Unsay angay natong hinumdoman bahin sa pagkab-ot sa mga kinahanglanon sa Diyos?
18 Ang mga sanga sa Sosyedad sa tibuok kalibotan naghangyo niini nga brosyur, ug ang pag-uyon gihatag sa paghubad niini ngadto sa 221 ka pinulongan. Hinaot kining bag-ong publikasyon mapamatud-ang hinungdanon sa pagtabang kanato sa pag-abag sa uban nga makakat-on sa gikinahanglan ni Jehova nga Diyos kanila. Sa atong bahin, atong hinumdoman nga ang pagkab-ot sa mga kinahanglanon sa Diyos, lakip ang sugo sa pagsangyaw ug paghimog mga tinun-an, mohatag kanatog usa ka bililhong higayon nga ipakita kang Jehova ang atong dakong gugma kaniya. Oo, ang gikinahanglan sa Diyos kanato dili mabug-at. Kini maoy labing maayong paagi sa pagkinabuhi!—Salmo 19:7-11.
[Mga footnote]
a Ang librong Mga Saksi ni Jehova—Mga Magmamantala sa Gingharian sa Diyos nag-ingon: “Ang mga videocassette dili gayod makahulip sa dapit sa pinatik nga panid o personal nga pagpanaksi. Ang mga publikasyon sa Sosyedad nagpadayon sa pagdulag bililhong papel sa pagpakaylap sa maayong balita. Ang balay-ug-balay nga buluhaton sa mga Saksi ni Jehova nagpabiling malig-ong Kasulatanhong bahin sa ilang ministeryo. Hinunoa, ang mga videocassette karon nagatabang niini ingong hinungdanong mga galamiton sa pag-ugmad ug pagtuo sa bililhong mga saad ni Jehova ug pagpasibot sa pagpabili sa iyang ginabuhat sa yuta sa atong adlaw.”
b Sa pagpatin-aw kon unsaon pagdumala sa usa ka pagtuon sa brosyur nga Gikinahanglan, tan-awa ang artikulong “Usa ka Bag-ong Galamiton sa Pagtabang sa mga Tawo nga Makakat-on sa mga Kinahanglanon sa Diyos,” sa panid 16-17.
Makapatin-aw Ka Ba?
◻ Unsang duha-ka-bahing buluhaton nga si Jehova nagbaod sa iyang mga alagad nga makig-ambit?
◻ Nganong ang atong obligasyon sa pagsangyaw ug paghimog mga tinun-an dili mabug-at alang kanato?
◻ Ang “kasaligan ug mabuot nga ulipon” nagtaganag unsang mga galamiton nga magamit sa atong buluhatong pagsangyaw ug paghimog tinun-an?
◻ Alang kang kinsa gidisenyo ang Gikinahanglan nga brosyur, ug unsaon nato paggamit kini diha sa atong ministeryo?
[Hulagway sa panid 24]
Ang atong buluhatong pagsangyaw ug paghimog tinun-an dili mabug-at
[Hulagway sa panid 26]
“Pasagdi ang Diyos Maminatud-on” (1946, girebisar 1952): 19,250,000 sa 54 ka pinulongan
“Ang Kamatuoran nga Motultol sa Kinabuhing Dayon” (1968): 107,000,000 sa 117 ka pinulongan (Pranses gipakita)
“Ikaw Mabuhing Walay Kataposan sa Paraiso sa Yuta” (1982): 80,900,000 sa 130 ka pinulongan (Ruso gipakita)
“Kahibalo nga Motultol sa Kinabuhing Walay Kataposan” (1995): 45,500,000 sa 125 ka pinulongan (Aleman gipakita)