Ang Inosenteng mga Biktima sa Pag-abusar sa Bata

“AKO duol nag 40 anyos karon,” matud ni Eilene.a “Ug bisan pag ang akong problema kapin nag 30 anyos, kini nagahasol gihapon kanako. Tungod sa akong problema ako nasuko, mibati nga sad-an, ug may mga suliran sa akong kaminyoon! Mosulay ang mga tawo sa pagsabot, apan dili gayod sila makasabot.” Problema ni Eilene? Siya biktima sa seksuwal nga pag-abusar sa pagkabata, ug alang kaniya ang mga epekto nahimong malungtaron.

Si Eilene wala gayod mag-inusara. Gipaila sa mga surbi nga ang makalisang nga gidaghanon sa mga babaye​—ug mga lalaki—​nakaagom sa maong pag-among-among.b Busa diay, nga dili gayod talagsaong hiwi nga kagawian, ang seksuwal nga pag-abusar sa bata maoy kanat nga sakit, usa nga mosuhop sa tanang sosyal, ekonomikanhon, relihiyoso, ug rasanhong mga pundok.

Maayo na lang, ang kinabag-ang mga lalaki ug mga babaye wala gayod maghunahuna sa pag-among-among sa usa ka bata niining paagiha. Apan ang peligrosong minoriya nagbaton niining daotang kiling. Ug sukwahi sa mga naandang hulagway, diyutay rang tig-abusar ug bata maoy dayag dili-normal nga mga tawo nga may mga kiling sa pagpatay nga nagpahipi diha sa mga dapit dulaanan. Ang kinabag-an maoy mga tawo nga nakaugmad ug makapatuo gawas nga panagway sa pagkanormal. Gitagbaw nila ang ilang hiwi nga kaulag pinaagi sa pagtumong sa inosente, mosalig-dayon, waymahimong mga bata​—kasagaran ang kaugalingon nilang mga anak babaye.c Sa dayag, sila tingali magtratar kanila sa maluluton, malumong paagi. Sa pribado, sila magpailalom kanila sa mga bahad, kapintasan, ug makauulaw, daotang mga matang sa seksuwal nga pag-atake.

Tinuod, lisod ang pagsabot nga ang maong makalisang nga mga hitabo mahitabo diha sa daw respektableng mga panimalay. Hinuon, bisan sa panahon sa Bibliya, ang mga bata gigamit “alang sa umalagi nga pagtagbaw . . . sa unodnong pangibog.” (The International Critical Commentary; itandi ang Joel 3:3.) Ang Bibliya mitagna: “Apan hibaloi ninyo kini, nga sa kataposang mga adlaw moabot ang mga panahon nga lisod sagubangon. Kay ang mga tawo mahimong mga mahigugmaon sa ilang kaugalingon . . . walay gugma nga kinaiya . . . walay pagpugong-sa-kaugalingon, mapintas, walay gugma sa pagkamaayo.” Busa, dili angay nga kita matingala nga ang pag-abusar sa bata nagakahitabo sa dakong sukod karong adlawa.​—2 Timoteo 3:1, 3, 13.

Ang pagmolestiya sa bata tingali dili magbilin ug lawasnong mga ulat. Ug dili tanang hamtong nga nabiktima samtang bata pa sa panggawas naguol. Apan sumala sa giingon sa usa ka karaang proverbio: “Bisan sa pagkatawa ang kasingkasing basin may kagul-anan.” (Proverbio 14:13) Oo, daghang biktima dunay lalom emosyonal nga mga ulat​—tinagong mga samad nga nagngutngot sa kahiladman. Hinuon, nganong ang pagmolestiya sa bata mopahinabo sa maong kadaot sa pipila? Nganong ang paglabay sa panahon lamang dili makapaayo sa mga kadaot niini? Tungod sa kadako sa maong makaguol nga suliran kinahanglang atong tagdon kini. Tinuod, ang bahin sa kon unsay mosunod tingali dili nindot basahon​—ilabina kon ikaw nabiktima sa pag-abusar sa pagkabata. Apan saligi nga adunay paglaom, nga ikaw maulian ra.

[Mga footnote]