Pagtanyag sa Maayong Balita—Ngadto sa mga Batan-on
1 Kining modernong panahon napamatud-an nga malisod kaayo alang sa mga batan-on sa kasagaran. Apan, sa mga siglo nga milabay ang tawo nga dinasig sa Diyos misulat: “Sa unsang paagi ang usa ka batan-on magahinlo sa iyang dalan? Pinaagig padayong pagbantay sumala sa imong pulong.” (Sal. 119:19) Sa pagkamatuod, ang pagtultol nga gipasukad sa Pulong ni Jehova nakahatag kaayohan sa mga linibo sa mga batan-on karong mga adlawa.
2 Karon ang mga batan-on adunay sayon nga pagbaton sa bililhong tinubdan sa Kasulatanhong impormasyon nga napatik na diha sa bag-ong libro, Mga Pangutanang Gisukna sa mga Batan-on—Mga Tubag nga Mosaler. Unsa may inyong mahimo aron mabatonan kini sa mga batan-on diha sa inyong teritoryo o mga batan-on sa eskuwelahan?
PAGBATON UG INTERES SA MGA BATAN-ON
3 Ang pagdani sa mga batan-on nga pabilhan ang Pulong ni Jehova mahimong mahagiton. (Tan-awang Proverbio 22:15.) Apan, ang apostol nga si Pablo miingon: “Ngadto sa mga Hudiyo ako nahimong ingon sa Hudiyo, aron akong madani ang mga Hudiyo.” (1 Cor. 9:20) Sa susamang paagi, ang pag-abag sa mga batan-on nga makakaplag ug makaapresyar sa maayo espirituwal nga pagtultol nagakinahanglan nga sabton mo ang mga batan-on ug ang ilang mga gumonhap. Gikinahanglan mo nga hunahunaon kon unsa ang makapainteres sa mga batan-on ug kon unsa ang ilang mga suliran sa tunghaan o sa dapit nga ilang gipuy-an o gitrabahoan. Sa dihang mosangyaw ngadto sa mga batan-on, kining maong pagsabot mabanaag sa imong mga introduksiyon, mga komento mo ug sa imong mga pangutana. Ang kaundan sa bag-ong basahong Batan-on Nangutana maoy ekselenteng tinubdan sa mga ideya kon unsa ang imong pagahisgotan. Pinaagig pagkasinati niining mga ulohana, ikaw makabaton ug pagsabot kon unsa ang gihunahuna sa daghang batan-on karong mga adlawa.
KON UNSA ANG IMONG IKASULTI
4 Sa dihang ikasulti mo ang usa ka batan-on, magmahigalaon ug tagda siya uban ang dignidad. Human sa pangumosta, ikaw makaingon: “Ako nakig-ambit sa publikong serbisyo sa pagtabang sa mga batan-on sama kanimo aron sa pagbuntog sa mga suliran nga ilang giatubang niini nga komunidad. Nakaplagan ba gayod nimo nga ikaw giawhag sa pagbuhat sa butang nga dili mo gayod gustong buhaton? O ikaw mahilig sa pagbuhat sa mga butang usahay tungod lang kay kana gibuhat sa uban ug dili tungod sa imong kaugalingong pagpili? O imo ba gayong gipalandong kon sa unsang paagi imong mabuntog ang pagpit-os sa isig-kaingon?” Human sa iyang tubag, paklia ang libro sa kapitulo 9. Dayon moingon: “Palihog matikdi ang giingon niining bag-ong basahon sa panid 77. [Basahang tukmang parapo.] Sa hunahuna mo ang usa kaha ka pagtuon sa Bibliya makabulig sa mga batan-on sa pagbuntog niini nga suliran? [Tugoting mokomento.] Matikdi ang giingon sa Bibliya sa Salmo 119:9. [Basaha.] Kining basahona nagapakita kanimo kon sa unsang paagi ang Bibliya makatabang sa mga batan-on sa pagsulbad sa malisod nga mga kahimtang, sama nianang gitala diha sa kaundan. [Itunol kaniya ang libro.] Maimo kini sa amot nga ₱21.00.”
5 Si Jehova “walay tinguha nga malaglag ang bisan kinsa.” (2 Ped. 3:9) Kini nagalakip sa mga batan-on. Apan, daghan sa mga batan-on ang dili makalabang-buhi sa Armageddon. Hinaot ang atong mga panlimbasog sa pagsangyaw ngadto sa mga batan-on sa epektibo moresulta sa kaluwasan sa ubay-ubay sa mga batan-on, ngadto sa kadayegan ni Jehova.