Pagtanyag sa Maayong Balita​—Pagtanyag sa Pagpangita sa Katawhan sa Diyos

¹ Samtang kita nagasangyaw sa pamalaybalay, sa kadalanan, ug sa impormal nga paagi, usahay atong mahibalag ang mga tawo nga iya sa di-Kristohanong relihiyon. Kon diyutay ra ang atong kahibalo sa ilang relihiyon, mahimong malisdan kita sa paghatag ug epektibong pamatuod bahin sa Gingharian. Karon, uban sa bag-ong publikasyong Pagpangita sa Katawhan sa Diyos, atong mas pang masabtan ang dagkong mga relihiyon sa kalibotan ug ang mga pagtulon-an niining mga tawhana. Kita masangkapan sa pagbulig sa daghan nga atong maarangan sa paggula “gikan sa lit-ag sa Yawa.”​—2 Tim. 2:24-26; Tito 3:2.

² Sa atong mahibalag ang mga Muslim, mga Hudiyo, mga Hindu, Sikhs, mga Budhista, o uban pa, sa kalulot matagad ta ang ilang mga pagtulon-an ug tingali moingon: “Makapainteres sa paghibalag sa mga tawo sa daghan nagkadaiyang mga relihiyon. Ang pagpangita sa katawhan sa Diyos nakahimog daghan lainlaing mga dulnganan. Apan di ka ba mouyon nga sagad ang mga tawo nagasunod sa relihiyon sa ilang mga ginikanan, inay kay sila mismo ang mangita sa Diyos? Sa laing pagkasulti, ilang namat-an ang pagsunod sa maong relihiyon. Mao kini ang punto nga gipasiugda sa unang kapitulo niining basahong Pagpangita sa Katawhan sa Diyos. [Ipakitang panid 8, parapo 12.] Ang pagkakat-on ug dugang bahin sa ubang mga relihiyon makapainteres man. Kining libroha nagapatin-aw sa sinugdanan, mga kabuhatan, ug mga pagtulon-an sa dagkong mga relihiyon sa kalibotan.” Dayon paklia ngadto sa mga panid nga nagapakita sa pipila ka ilustrasyon sa relihiyon nga giangkon sa tagbalay. Ipatin-aw nga ikaw usa ka boluntaryo ingong bahin sa tibuok-kalibotang panlimbasog sa pagtabang sa mga tawo sa ilang pagpangita sa Diyos. Palig-ona ang maong tawo sa pagbasa sa libro.

³ Hayan ang laing paagi mao ang diretso nga pag-abli sa kapitulo nga naghisgot sa kaugalingong relihiyon sa tagbalay. Tino nga ang usa ka Hindu madani ngadto sa mapa sa India sa panid 123 ug sa mga hulagway sa mga panid 96 ug 117. Basin mahibalag ta ang usa ka Sikh nga may turbante. Ang mga panid 100-101 nagapresentar ug mubong sumaryo sa maong pagtuo.

⁴ Ang usa ka Muslim hayan masurprisa sa pagkakita sa mga litrato sa Mecca ug sa Kaʽbah sa panid 289 ug sa mga pangutlo gikan sa Qurʼan sa panid 288 ug uban pang mga panid. Ang mga Budhista basin magpakitag interes sa kapitulo 6 ug sa mga ilustrasyon sa mga panid 141 ug 157. Ang mga tawong ang kagikan Intsek angayng moapresyar sa kapitulo 7, bahin sa Taoismo ug Confucianismo, ug sa mga ilustrasyon sa mga panid 171 ug 173. Kadaghanan sa mga Hapon mopabili sa mga hulagway diha sa mga panid 190 ug 195 sa kapitulo maylabot sa “Shinto​—Pagpangita sa Diyos sa Hapon.”

⁵ Kon mahibalag ta ang mga atiyesta ug mga agnostiko, ang kapitulo 14, nga nag-ulohang “Modernong Kawalay Pagtuo​—Kinahanglan ba Magpadayon ang Pagpangita?,” mosaler ngadto sa mga sinsero nga anaa sa ilang taliwala. Ang mga argumento nga dapig sa pagtuo sa Diyos makaplagan gikan sa panid 334 paunahan.

⁶ Alang kang bisan kinsa nga nagaangkon ug relihiyon sa Kakristiyanohan, ang kapitulo 10 hayan magpainteres. Ang panid 236 misukna sa pangutana, “Jesus​—Unsa ang Iyang mga Kredensiyal?” Ang mga panid 243 ug 251 naghulagway sa duha sa mga milagro nga gibuhat ni Kristo. Sa unsang paagi kita nahibalo nga si Jesus nakahupot sa pag-uyon sa Diyos? Ang ilustrasyon sa panid 253 nagatubag sa maong sukna.

⁷ Maoy dayag, nga aron makapahiangay sa atong presentasyon ngadto sa kada tawo, gikinahanglan ta ang pagkasayod sa mga sulod o kaundan sa maong libro ug masinati sa han-ay sa mga kapitulo ug mga ilustrasyon niana. (Sa dugang mga sugyot paklia ang Nangatarongan Pinasukad sa Kasulatan, mga panid 21-4.) Nan makahimo kita sa pagpugas sa binhi sa kamatuoran pinaagig mataktikanhong presentasyon niining bag-ong basahon. (1 Cor. 9:19-23; Col. 4:5, 6) Sanglit kay ang Bibliya sagad mang gikutlo alang sa pagtandi sa katibuk-an nianang maong libro, adunay maayong pasukaranan alang sa pagsugod ug mga pagtuon sa Bibliya. Ang usa ka artikulo sa sunod bulang Atong Ministeryo sa Gingharian mosugyot kon sa unsang paagi atong mahimo ang mga balikduaw aron makasugod ug mga pagtuon uban sa mga tawo nga iya sa daghang tinuohan.