Pagplano Karon Alang sa Espesyal Ting-init nga Kalihokan
1 Pinasukad sa kasinatian kita nahibalo nga ang maayong mga resulta magagikan sa mabinantayong pagplano. (Prov. 20:18; 21:5) Si Jehova nagapasalig kanato nga siya motabang kanato sa pagpalampos sa atong dalan.—Prov. 16:3.
2 Sagad ang mga bulan sa Enero ngadto sa Mayo sa kada tuig adunay maayong tiempo, ug sulod sa pipila sa maong panahon ang atong mga batan-on adunay bakasyon gikan sa tunghaan. Busa kini maoy maayong panahon sa pagplano alang sa dugang teokratikanhong kalihokan. Maayong magplano nga abante sa pagtino kon unsang mga buluhatona ang unahon gayod kay sa uban. (Luc. 14:28-30) Maoy dayag, sa pagtino kon unsa ang importante, ang intereses sa Gingharian pagaunahon kay sa ubang tagdononon.—Mat. 6:33; 1 Ped. 2:11.
3 Pagplano sa Pag-oksilyare Payunir: Ang ting-init nga mga bulan nagataganag ekselenteng higayon sa katabang nga pagpayunir. Gidasig ang mga batan-on nga nagabakasyon sa paggugol sa labing menos sa usa ka bulan niining ting-inita ingong mga oksilyare payunir. Nganong di pakuyogon sa pagsangyaw ang ubang interesadong mga batan-on niadtong nagpatala sa pagpayunir? Ang gigugol nga panahon niining paagiha mopadugang sa espirituwal nga tingusbawan sa usa.
4 Sa miaging Abril diha kitay 15,730 ang nag-oksilyare payunir ug unya sa Mayo atong nabatonan ang 11,494. Pagkamaayo kaayong pagsanong! Tali sa Enero ug Hunyo, ang usa ka total nga 45,306 ang nagpakig-ambit niining buluhatona. Kumosta man niining tuiga? Among ginarekomendar nga ang tanan mosugod na sa pagplano karon sa ilang mga kalihokan. Ang pipila hayan makaarang sa pagpayunir sa pipila ka bulan, samtang ang uban basin makahimo niana sa usa ka bulan lamang o duha. Hibalo kita nga si Jehova dagayang magapanalangin kon unsa man ang imong maarangan sa pagbuhat diha sa iyang buluhaton niining ting-inita.
5 Sa Panahon sa Memoryal: Ang saulog sa Memoryal niining tuiga himoon sa Biyenes, Abril 17, 1992, human sa pagsalop sa adlaw. Hinumdomi nga ang pagpasa sa mga emblema dili gayod sugdan hangtod sa pagkahuman sa pagsalop sa adlaw, bisan tuod ang pakigpulong mahimong magsugod nga sayosayo pa. Kini maoy maayo kaayong higayon sa mga bag-ohan nga makasugod sa pagpakig-uban sa organisasyon ni Jehova, busa kita gayod sa linain magmasiboton sa buluhatong pagsangyaw sulod niining panahona. Makadawat kamog pinatik nga mga imbitasyon sa Memoryal nga magamit sa ulahi, ug inyong magamit kini sa pagdapit niadtong wala pa sukad makatambong sa mga miting.
6 Ang maayong panahon usab magpaposible sa pagkobre sa teritoryo nga lagyo nga malisod sa pag-abot sa ting-ulan. Nganong di himoon ang espesyal nga panlimbasog sa pagkobre sa tanan sa maong teritoryo sa panahon sa Memoryal?
7 Samtang atong planohon ang atong mga kalihokan sa ting-init kita mobuhat niana uban sa mainampoong tinamdan sa Salmo 90:12. Sa matapos na ang panahong ting-init kita dili magbasol kon kita sa maalamon nakaplano ug nakagamit sa atong panahon nga mapuslanon. Atong mahuptan ang bahandi sa makapalipay, teokratikanhong mga handumanan.