Pagsugod sa Panaghisgot sa Dihang Mobalik Ka
1 Aron epektibong makighisgot sa usa nga nagpakitag interes, sulayi ang pagdugang sa imo nang nahisgotan sa unang duaw. Ang tumong mao ang pagbulig sa tawo nga makapabili sa mga puntos ug basahon nga gibilin kaniya sa miagi.
2 Gahinig panahon sa pag-andam alang sa paghimog balikduaw. Pagpilig makapapukaw-interes nga mga komento nga anaa sa basahon nga imong ginatanyag. Tagda ang mosunod nga mga tema sa dihang nagabalikduaw sa napahimutang nga librong Worldwide Security:
3 Unsang mga kahimtang sa umaabot ang atong madahom sa yuta kon kini mao gayoy malungtarong puy-anan sa tawo? Kini nga panaghisgot gibase sa Isaias 11:6-9 ug 65:25, ingon sa gisaysay sa librong Worldwide Security mga panid 172-5.
Ang panaghisgot mahimong masugdan pinaagig pag-ingon:
◼ “Sa miagi nakong duaw, atong nahisgotan kon sa unsang paagi ang Diyos mituyo nga ang yuta molungtad sa walay kataposan. Apan nagbilin kog usa ka pangutana nga imong mapamalandong: Unsang mga kahimtang ang kinahanglan unyang maglungtad? Malipay ko nga ipaambit kanimo sa mubo ang tubag sa Bibliya.”
4 Kon unsay kinahanglan natong buhaton aron makapahimulos sa kinabuhi ubos sa Gingharian sa Diyos. Kining temaha matagik pinaagig paggamit sa Juan 17:3 ug Jeremias 31:34, ingon sa gisaysay sa librong Worldwide Security sa mga panid 119-20.
Sa pagsugod, makaingon ka:
◼ “Ako nalipay sa akong pakighisgot uban kanimo bahin sa saad sa Diyos sa pagtapos sa pagkadaotan. [Hangyoa ang tawo nga kuhaon ang iyang Worldwide Security nga libro.] Usa ka pangutanang magpabalaka sa matag usa kanato mao, Unsa may atong mabuhat aron makapahimulos gikan niining kausabana? Matikdi kon unsay giingon ni Jesus sa Juan 17:3, ingon sa gikutlo diha sa imong libro sa panid 120.”
5 Unsang mga panginahanglan ang tagbawon sa Paraisong yuta? Magamit mo ang bisan hain sa Salmo 65:9-13 ug 72:16 o Isaias 11:6-9 ug 65:25. Ang tukmang mga komento gihimo diha sa librong Worldwide Security sa mga panid 174-5.
Ang imong pangbukas nga mga pulong maingon niini:
◼ “Niadtong dinhi ko sa miaging [isulti ang adlaw], atong nahisgotan ang saad sa Diyos sa pagbanhaw sa mga patayng minahal diha sa usa ka Paraisong yuta. Unsa man ang pipila ka panalangin nga mapahimuslan unya? Ang imong libro motug-an kanato.” Basaha ang usa o duha ka teksto gikan sa Bibliya ug mga komento gikan sa libro, tingali ang mga parapo 7-10.
6 Daghang tawo nagpakitag interes sa mensahe sa Gingharian nga atong giwali. Busa, paghimog mga balikduaw sa tanan nga nagpakitag interes, ug sulaying tudloan sila sa kamatuoran.—Mat. 10:11; 28:19, 20; Juan 21:17; Pin. 22:17.