Ibutyag ang mga Pakiglabot ni Jehova
1 “Ibutyag taliwala sa katawhan ang iyang mga pakiglabot. Ipahayag nga ang iyang ngalan ginabayaw . . . , kay siya nakabuhat ug maayo uyamot.” (Isa. 12:4, 5) Sa unsang paagi mosanong ka niining awhaga? Sa dihang atong pamalandongon ang mga pakiglabot ni Jehova kanato ingon nga katawhan ug ingon nga indibiduwal, dili ba mapalihok ang atong mga kasingkasing sa pagsulti sa uban? Mga 73 ka tuig kanhi, si Jehova mipahigawas sa iyang katawhan sa Babilonyanhong kaulipnan. Sukad sa 1919 ang matuod nga pagsimba lig-on nang napahimutang ug mikaylap na karon sa tanang bahin sa yuta, sa gilapdon nga labaw sa atong pagdahom. Ingon nga indibiduwal, makabuhat ka pa bag dugang sa pagbutyag sa iyang mga pakiglabot ug pagbayaw sa iyang ngalan?
2 Ang panahon sa Memoryal nagapahinumdom sa usa ka balaang buhat nga kitang tanan sa walay kataposan magmapasalamaton. Ang mga bulan sa Abril ug Mayo maoy ilabinang tukmang panahon sa pagpakita kang Jehova sa atong apresasyon pinaagig pagpalista ingong oksilyare payunir.
3 Sagad, ang mga kahikayan mosaler pag-ayo kon ang mga grupo sa mga magmamantala magpalista ingong oksilyare payunir. Ang usa ka maayong eskedyol mahimong ipatuman aron ang tanan adunay ikakuyog sa pagsangyaw, ug ang mga sister nga may gagmayng kabataan makahikay nga magbinuligay ang usag usa. Uban sa maayong pagplano, daghan ang nakakaplag nga dili kaayo lisod ang pagkab-ot sa 60-oras nga kinahanglanon. Kini nagapasabot sa paggugol ug aberids nga duha lamang ka oras sa kada adlaw o 15 ka oras sa usa ka semana nganha sa ministeryo. Ang pipila ka oksilyare payunir nagsangyaw sa usa ka oras o duha una pa o human sa ilang sekular nga trabaho ug adunay mas taas nga panahon sa pag-alagad sa mga hinapos-semana.
4 Bisan kon dili ka makahimo sa pag-oksilyare payunir, mapauswag man nimo ang imong kalihokan sa pag-alagad sa kanataran. Usab, pinaagig pag-abag sa transportasyon o pagduyog sa uban nga nagapayunir, ikaw makapadasig kanila. Bisan unsa man ang atong mabuhat sa pagbutyag sa mga pakiglabot ni Jehova dili gayod mataligam-an (masayloan) sa atong mapabilhong Diyos.—Mal. 3:16.